ရုပ်သံဖိုင်အဟောင်းကို အသုံးပြုပြီး ရှမ်းပြည်နယ်မြောက်ပိုင်း နောင်ချိုမြို့ တိုက်ပွဲအတွင်း ဒဏ်ရာရထားသော စစ်ကောင်စီ၏ တပ်ဖွဲ့ဝင်များကို ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) က ကူညီသယ်ယူပို့ဆောင်ပြီး ဆေးဝါးကုသပေးနေကြောင်း ရုပ်သံဖိုင်တစ်ခုနှင့်အတူ သတင်းအမှား ဖြန့်ချိနေပါသည်။

အဆိုပါ အကြောင်းအရာကို လူမှုကွန်ရက်စာမျက်နှာ Facebook Page အကောင့်တစ်ခုမှ ယနေ့ ဇူလိုင် ၁၇ ရက်နေ့တွင် ဖြန့်ချိခဲ့ခြင်း ဖြစ်သည်။

၎င်းက “နောင်ချိုတိုက်ပွဲမှာ ဒဏ်ရာရတဲ့ စစ်ကောင်စီရဲ့ တပ်ဖွဲ့ဝင်တွေကို ကူညီသယ်ယူပို့ဆောင် ဆေးဝါးကုသမှု လုပ်ပေးနေတဲ့ ရှမ်းပြည်တိုးတက်ရေးတပ် (SSPP/SSA) တပ်ဖွဲ့” ဟု (မူရင်းအတိုင်း) ဆိုကာ ရုပ်သံဖိုင်တစ်ခုနှင့် အတူ ရေးသားဖြန့်ချိခဲ့ရာ ကြည့်ရှုသူပေါင်း ၇,၀၀၀ ကျော်နှင့် ပြန်လည်မျှဝေသူပေါင်း ၆၀ ကျော်အထိ ရှိသည်။

မူရင်းလင့်ခ် – https://archive.ph/DUqGi

လူမှုကွန်ရက်စာမျက်နှာပေါ်မှ ပျံ့နှံ့လာသော ရုပ်သံဖိုင်ကို သျှမ်းသံတော်ဆင့်နှင့် MPA တို့ ပူးပေါင်းပြီး InVID Tools ဖြင့် စစ်ဆေးကြည့်သောအခါ အဆိုပါရုပ်သံဖိုင်သည် အဟောင်းဖြစ်နေပြီး အကြောင်းအရာများအား ကွဲလွဲနေကြောင်း စိစစ်တွေ့ရှိခဲ့သည်။

သတင်းစိစစ်ချက်

စစ်ဆေးတွေ့ရှိချက်အရ အဆိုပါရုပ်သံဖိုင်သည် လားရှိုးမြို့ အရှေ့မြောက်တိုင်း စစ်ဌာနချုပ် (ရမခ) မှ ဖမ်းဆီးရမိထားသော စစ်ကောင်စီတပ်သား စစ်သုံ့ပန်း၏ မိသားစုဝင်များကို ကိုးကန့်တပ် MNDAA က ပြန်လွှတ်ပေးခြင်းဖြစ်ပြီး ထိုမိသားစုဝင်များကို ရှမ်းပြည်တိုးတက်ရေးပါတီ SSPP မှ လာရောက်ခေါ်ဆောင်ကာ ကူညီပို့ဆောင်ပေးခြင်း ဖြစ်စဉ်မှ ရုပ်သံဖိုင် ဖြစ်သည်။

မောင်း လူမှုမီဒီယာ page မှ ၂၀၂၄ ဩဂုတ် ၁၂ရက်နေ့တွင် တင်ထားသော “လားရှိုးမြို့မှာ MNDAA က ပြန်လွှတ်ပေးနေတဲ့ စစ်ကောင်စီတပ်သားတွေရဲ့ မိသားစုဝင် ၂ ထောင်ကျော်အထိ ရှိလာ (ရုပ်/သံ)” ဆိုသည့် ခေါင်းစဉ်နှင့် သတင်းတင်ဆက်ထားသည့် ဗီဒီယိုဖိုင်နှင့် ယှဉ်တူနေသည်ကို တွေ့ရှိရပါသည်။

မူရင်းရုပ်သံဖိုင်ကို ဤနေရာတွင် ဝင်ရောက်ကြည့်ရှု့နိုင်ပါသည်။

မောင်း – https://shorturl.at/SeYcF

ထိုအကြောင်းအရာနှင့်ပတ်ပြီး သတင်းမီဒီယာဌာန ဖြစ်သည့် ခေတ်သစ်နှင့် မဲခေါင် သတင်းဌာနတို့က ၂၀၂၄ သြဂုတ် ၁၂ ရက်နေ့တွင် ရေးသားဖော်ပြထားသည်။

သတင်းအပြည့်အစုံကိုမူရင်းလင့်ခ်တွင်ဝင်ရောက်ဖတ်ရှုနိုင်ပါသည်။

ခေတ်သစ်မီဒီယာ- https://yktnews.com/2024/08/178521/

မဲခေါင် သတင်းဌာန- https://shorturl.at/ka2U8

သုံးသပ်ချက်

ထိုကြောင့် နောင်ချိုမြို့ တိုက်ပွဲအတွင်း ဒဏ်ရာရထားသော စစ်ကောင်စီ၏ တပ်ဖွဲ့ဝင်များကို ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) က ကူညီသယ်ယူပို့ဆောင်ပြီး ဆေးဝါးကုသပေးနေသည် ဆိုသည့် အကြောင်းအရာက မှားယွင်းချိတ်ဆက်ထားခြင်းဖြစ်သည်။

အင်တာနက်စာမျက်နှာပေါ်တွင် သတင်း၊ ဓာတ်ပုံ၊ ဗီဒီယိုဖိုင် စသည့် အဟောင်းများကို ယခုဖြစ်နေသည့် အကြောင်းအရာနှင့်ချိတ်ဆက်၍ ပြန်လည်တင်ပြခြင်းဖြင့် သတင်းအမှားဖန်တီးမှုများစွာရှိသည်ကို သတိပြုစေလိုပါသည်။

စာဖတ်သူများအနေဖြင့်လည်း သတင်းတု/သတင်းမှား ဖြစ်ကြောင်း သံသယရှိသည်ဖြစ်စေ၊ မှန်ကန်သည့်သတင်း ဟုတ်၊ မဟုတ်အတည်ပြု မေးမြန်းလို၍ဖြစ်စေ၊ Fact Checking ပြုလုပ်ပေးသော သတင်းဌာန/အဖွဲ့ အစည်းများ၏ Chat Box မှ သွားရောက်မေးမြန်းကြရန် တိုက်တွန်းလိုသည်။

Myanmar Fact-checking Network-MFCN အဖွဲ့ဝင်များကို ဆက်သွယ်မေးမြန်း၍ စစ်ဆေးပေးရန်တောင်းခံနိုင်သလို MFCN ၏ အောက်ပါလင့်ခ်များမှ နေ၍လည်း အချက်အလက်စစ်ဆေးရန် တောင်းဆိုနိုင်ပါသည်။

Web – https://myanmarfactcheckingnetwork.org/
Fb – https://www.facebook.com/myanmarfactcheckingnetwork