မြန်မာ-တရုတ်နယ်စပ်အနီးသို့ စစ်ကောင်စီတပ်မှ လေယာဉ်ဖြင့် ယခုရက်တစ်ပတ်အတွင်း ပျံသန်းမှုများ ပြုလုပ်လာသဖြင့် နမ့်ခမ်းမြို့ပေါ်သို့ လေကြောင်းဖြင့် တိုက်ခိုက်လာမည်ကို ဒေသခံများက စိုးရိမ်နေကြကြောင်း သတင်းရရှိသည်။
ဇူလိုင်လဒုတိယပတ်အတွင်း မြန်မာ-တရုတ်နယ်စပ်အနီးရှိ တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် နမ့်ခမ်းမြို့ပေါ်သို့ စစ်ကောင်စီတပ်မှ လေယာဉ်ဖြင့် ညအချိန်မတော် လူအိပ်မောကျနေစဉ် ပျံဝဲမှုများ ပြုလုပ်လာကြောင်း နမ့်ခမ်းမြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ဒီမနက် ၂ နာရီလောက်မှာ လေယာဉ်တွေ ပြန်လာဝဲနေတာ။ လေယာဉ်တွေက နေ့လည်ဆိုရင် မလာဘူး၊ ညဆိုလာတယ်။ တချို့ရက်တွေလည်း အသံကြားနေရတယ်၊ တချို့ရက်ကျတော့ ငြိမ်နေတယ်”ဟု နမ့်ခမ်းမြို့ ဒေသခံ အမျိုးသားတစ်ဦးက ပြောသည်။
နမ့်ခမ်းမြို့ပေါ်တွင် လေကြောင်းတိုက်ခိုက်မှု အန္တရာယ်အတွက် စိုးရိမ်နေရသည့်အပြင် စစ်ကောင်စီတပ်နှင့် TNLA တို့ နှစ်ဘက်တိုက်ပွဲများ ပြန်လည်ဖြစ်ပွားလာမည်ကိုလည်း စိုးရိမ်ရကြောင်း နမ့်ခမ်းဒေသခံ ၎င်းအမျိုးသားက ဆက်ဆိုသည်။
“ပြည်သူတွေရဲ့ စိုးရိမ်မှု စိတ်ပူမှုတွေက တိုက်ပွဲဖြစ်ပွားနေတဲ့ ၁၀၂၇ စစ်ဆင်ရေး စကတည်းက လူ့အခွင့်အရေးတွေ မကြည့်ဘူး။ လူတိုင်းကတော့ ပြည်သူအတွက်လို့ ပြောတာပဲ။ ပျက်စီးဆုံးရှုံး သွားရင် ပြန်ထူထောင်ဖို့ နေအိမ်၊ မြို့ရွာတွေက ဆယ်စုနှစ်နဲ့ချီ အချိန်ပြန်ယူရတယ်။ နိုင်ငံရေး စစ်ရေးဆိုပေမယ့် ဒါတွေက တိုက်ပွဲတွေ ငြိမ်သွားရင် ပြည်သူကို ဘယ်သူမှ မကြည့်ဘူး”ဟု ၎င်းက ပြောသည်။
လက်ရှိတွင် TNLA ထိန်းချုပ်ထားသည့် ကျောက်မဲ၊ သီပေါ၊ မိုးကုတ်၊ မိုင်းငေါ့မြို့တို့တွင် တိုက်ပွဲဖြစ်ပွားခြင်း မရှိဘဲ စစ်ကောင်စီတပ်မှ လေကြောင်းတိုက်ခိုက်မှု မကြာခဏ လုပ်ဆောင်လာခြင်းကြောင့် ပြည်သူများမှ သတိဝီရိယဖြင့် နေထိုင်သွားလာရန် လိုအပ်ကြောင်း TNLA ဘက်မှ သတိပေးထားသည်။
Leave a Comments