သျှမ်းပြည် ကျောက်မဲမြို့ပေါ် နှစ်နေရာသို့ စစ်ကောင်စီတပ်မှ တစ်မနက်တည်းတွင် လေကြောင်းဗုံး ၄ လုံးဖြင့် ကြဲချတိုက်ခိုက်ခဲ့ခြင်းကြောင့် အမျိုးသမီးတစ်ဦး ထိခိုက်ဒဏ်ရာ ရရှိခဲ့ကြောင်း စုံစမ်းသိရသည်။
ယနေ့ (ဇူလိုင်လ ၁၃ ရက်) နံနက် ၆ နာရီကျော်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် ကျောက်မဲမြို့ပေါ် ပိန္နဲကုန်းနှင့် မန်ကောင်းမူး နှစ်နေရာသို့ စစ်ကောင်စီတပ်မှ လေကြောင်းဗုံးကြဲတိုက်ခိုက်ခဲ့ရာ အမျိုးသမီးတစ်ဦး ထိခိုက်ဒဏ်ရာ ရရှိခဲ့ကြောင်း ဒေသခံများက ပြောသည်။
“ဝါဆိုကျောင်းနား ၁ လုံး၊ ကြက်ခြံနား ၁ လုံး၊ ကြက်ငါးကောင် ချောင်းဆိုးပျောက်ဆေး အိမ်အနောက် ၁ လုံးနဲ့ဆို ပိန္နဲကုန်းဘက် ၃ လုံး ချသွားတယ်။ အမက (၁၃) ကျောင်းဘက်နဲ့ဆို အားလုံးပေါင်း (၄) လုံး တစ်မနက်တည်း ခံရတာ” ဟု ကျောက်မဲမြို့မှ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
အဆိုပါ လေကြောင်းဗုံးကြဲမှုကြောင့် အသက် (၆၀) နှစ်အရွယ် အမျိုးသမီးတစ်ဦး ထိခိုက်ဒဏ်ရာရရှိကာ နေအိမ် (၂) အိမ်၊ ဇလပ်ဝါ အချိုခြောက်စက်ရုံ၊ ကား(၃) စီးနှင့် ဆိုင်ကယ် (၅) စီး ထိမှန်ပျက်စီးသွားခဲ့ကြောင်း TNLA သတင်းနှင့် ပြန်ကြားရေးဘက်မှ ထုတ်ပြန်သည်။
အလားတူ ဇူလိုင်လ (၁၁) ရက် နံနက်ပိုင်းတွင်လည်း ကျောက်မဲမြို့ပေါ်ရှိ မြို့မရဲစခန်း၊ ခရိုင်ရဲရုံးနှင့် ခိုမုန်းကျေးရွာရှိ ဟိုတယ်ကောလီ သုံးနေရာကို လေကြောင်းဗုံးကြဲတိုက်ခိုက်ခဲ့ရာ နောင်ချိုစစ်ဘေးရှောင်များထဲမှ တစ်ဦး သေဆုံးပြီး (၅) ဦး ထိခိုက်ဒဏ်ရာရရှိခဲ့ကြောင်း ဒေသခံများက ပြောသည်။
“အဘက်ဘက်ကို ပြောချင်တာတော့ ပြည်သူတွေရှိတဲ့နား ဘယ်စစ်သားမှ အကာအကွယ်ယူပြီး မနေကြဖို့ပေါ့။ အခု ဗုံးကြဲခံရတာဆို ၆ ခါမက ရှိနေပြီ၊ မြို့ထဲနဲ့ ပြည်သူနေတဲ့ နေရာတွေပဲ ထိတယ်။ နောင်ချို ဂုတ်ထိပ်ဘက် စကစ ပြန်ရလို့ ကျောက်မဲဘက် စစ်သားတွေ တက်လာရင် တိုက်ပွဲထပ်ဖြစ်ပြီး ထပ်ပြေးရမှာ ကြောက်တယ်” ဟု ကျောက်မဲမြို့မှ ၎င်းဒေသခံ အမျိုးသမီးက သျှမ်းသံတော်ဆင့်ကို ဆက်ပြောသည်။
စစ်ကောင်စီတပ်သည် ဇွန်လ (၂၄) ရက်မှ ဇူလိုင်လ (၁၂) ရက်အထိ သုံးပတ်အတွင်း ကျောက်မဲမြို့တွင် (၆) ကြိမ်၊ သီပေါမြို့တွင် (၁) ကြိမ် လေကြောင်းဖြင့် လာရောက်ဗုံးကြဲ တိုက်ခိုက်ခဲ့ပြီး အရပ်သား (၁၀) ဦးထက်မနည်း သေဆုံး၍ (၃၀) ကျော် ထိခိုက်ဒဏ်ရာရရှိကြောင်း ဒေသတွင်း လူမှုကူညီရေးအသင်းများထံမှ သိရသည်။
လက်ရှိတွင် တောင်ခမ်းဒေသဘက်မှ ထိုးစစ်ဆင်လာသည့် စစ်ကောင်စီတပ် စစ်ကြောင်းများသည် နောင်ချိုမြို့တောင်ဘက် ကုန်းစံရွာအနီးရှိ မြို့ဝင်ဆိုင်းဘုတ်အထိ ချဉ်းကပ်ရောက်ရှိလာပြီး ဂုတ်ထိပ်ဘက်သို့ ဆက်လက်ထိုးဖောက်လျက်ရှိခြင်းကြောင့် မကြာမီရက်ပိုင်းအတွင်း ကျောက်မဲမြို့ဘက်သို့ စစ်ကောင်စီတပ်မှ မြေပြင်ထိုးစစ် ချီတက်သွားနိုင်ကြောင်း စစ်ရေးသတင်းရင်းမြစ်က သုံးသပ်ပြောဆိုသည်။
Leave a Comments