သျှမ်းပြည်မြောက်ပိုင်း နောင်ချိုမြို့ တိုက်ပွဲတွင် စစ်ကောင်စီတပ်မှ စစ်မှုထမ်းတပ်သားသစ် အများ အပြား လက်နက်ခဲယမ်း အပြည့်အစုံဖြင့် ဓနုပြည်သူ့လွတ်မြောက်ရေးတပ်တော် (DPLA) ထံ အလင်းဝင်ရောက်လာကြောင်း ယနေ့(ဇူလိုင်လ ၁၄ ရက်) ရက်စွဲဖြင့် DPLA က ရုပ်သံနှင့်တကွ ထုတ်ပြန်လိုက်သည်။

အဆိုပါ ရုပ်သံထဲတွင် ပြီးခဲ့သည့် ဇွန်လအတွင်း တောင်းခမ်းဒေသမှ နောင်ချိုမြို့ဘက်သို့ ထိုးစစ်ဆင်လာသော စစ်ကောင်စီတပ်သားများသည် DPLA ထံ အများအပြား အလင်းဝင်ရောက်လာကြပြီး ၎င်းတို့ထဲတွင် စစ်ကောင်စီတပ်၏ ပေါ်တာဆွဲခံခဲ့ရသော စစ်မှုထမ်းတပ်သားသစ် အများအပြား ပါရှိနေကြောင်း ဖော်ပြထားသည်။

နောင်ချိုတိုက်ပွဲအတွင်း စစ်ကောင်စီတပ်သားများ DPLA ထံ အလင်းဝင်ရောက်လာသည့် သတင်းနှင့်ပတ်သက်ပြီး သျှမ်းသံတော်ဆင့်မှ DPLF/ DPLA ဥက္ကဋ္ဌ ဦးထွန်းထွန်းနိုင်နှင့် DPLA ဖေ့ဘုတ်လူမှုကွန်ယက်တို့တွင် စာပို့မေးမြန်းထားသော်လည်း ပြန်လည်ဖြေကြားပေးခြင်း မရှိသေးပေ။

ထို့သို့ အလင်းဝင်လာသည့် စစ်ကောင်စီတပ်သားများကို ၎င်းတို့၏ ဆန္ဒအလျောက် နေရပ်သို့ ပြန်လည်ပို့ဆောင်ရန် စီစဉ်လျှက်ရှိကြောင်း၊ စစ်ကောင်စီတပ်သားများသည် နေအိမ်အထိ ပေါ်တာဆွဲနေသောကြောင့် ဂရုစိုက်သွားလာကြရန် အသိပေးကြောင်း ပြောဆိုထားသည်။

ယခုလက်ရှိ နောင်ချိုမြို့တွင် တအာင်း(ပလောင်) အမျိုးသားလွတ်မြောက်ရေးတပ်မတော်(TNLA)၊ ဓနုပြည်သူ့လွတ်မြောက်ရေးတပ်တော်(DPLA) ပူးပေါင်းတပ်နှင့် စစ်ကောင်စီတပ်တို့ ထိတွေ့တိုက်ပွဲ ပြင်းထန်နေကြောင်း သိရသည်။

ယမန်နေ့ (ဇူလိုင်လ ၁၃ ရက်) ညနေပိုင်းမှ စတင်ပြီး တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် နောင်ချိုမြို့ပေါ်ရှိ ပန်ဟက်၊ သပြေရေနှင့် တောင်ရပ်ကွက်အတွင်းသို့ တောင်ခမ်းဘက်မှ ထိုးစစ်ဆင်လာသည့် စစ်ကောင်စီတပ်သားများ ဝင်ရောက်လာခဲ့ကြောင်း စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။