pတရားဝင် လူဖမ်းစစ်သားစုဆောင်းရန် စစ်ကောင်စီတပ်က စစ်မှုထမ်းဥပဒေကို ပြဋ္ဌာန်းခဲ့သည့် တစ်နှစ်ကျော်ခဲ့ပြီး စစ်မှုထမ်းအတွက် အပတ်စဉ် (၁၅) အထိ ခေါ်ယူပြီးစီးနေပြီဖြစ်ကြောင်း သတင်းရရှိသည်။
နိုင်ငံတဝှမ်း တိုင်းစစ်ဌာနချုပ်နှင့် နယ်မြေများစွာ သိမ်းပိုက်ခံရပြီး စစ်ရှုံးနေသည့ စစ်ကောင်စီတပ်အတွင်း စစ်အင်အား ချိနဲ့လာမှုကို ဖြည့်တင်းရန် ၂၀၂၄ ဖေဖော်ဝါရီလ ၁၀ ရက်တွင် စစ်မှုထမ်းဥပဒေကို အသက်သွင်းခဲ့ခြင်း ဖြစ်သည်။
စစ်မှုထမ်း အပတ်စဉ်တစ်ခုလျှင် သင်တန်းသား ၅,၀၀၀ နှုန်းဖြင့် ယနေ့ ဇူလိုင် ၁၃ ရက်နေ့အထိ စစ်မှုထမ်း အပတ်စဉ် (၁၅) ကြိမ် ဖွင့်လှစ်ထားပြီး အဆိုပါအခမ်းအနားကို ကျိုင်းတုံမြို့ရှိ နယ်မြေခံသင်တန်းကျောင်း၌ ပြုလုပ်ခဲ့ကြောင်း စစ်ကောင်စီက သတင်းထုတ်ပြန်ထားသည်။
ထိုကိန်းဂဏန်း အတိုင်းသာဆိုလျှင် စစ်ကောင်စီတပ်က တစ်နှစ်ကျော်အတွင်း ၇၅,၀၀၀ ဝန်းကျင် စုဆောင်းနိုင်ခဲ့ပြီဖြစ်ကြောင်း သိရသည်။
“အခုလတိုင်းလတိုင်း ရာအိမ်မှူးတစ်ယောက်ကို အနည်းဆုံး ကျပ် ၁၀ သိန်းသွင်းဖို့ ပြောထားတယ်။ လူမကောက်တော့ဘူး၊ ပိုက်ဆံသွင်းခိုင်းတာ။ အဲ့တော့ လတိုင်းလတိုင်း အိမ်တိုင်းကို ပိုက်ဆံကောက်ပေါ့” ဟု အမည်မဖော်လိုသည့် တောင်ကြီးမြို့ အုပ်ချုပ်ရေးမှူးတစ်ဦးက သျှမ်းသံတော်ဆင့်ကို ပြောသည်။
စစ်မှုထမ်းဥပဒေအရ သာမန်အရပ်သားများထဲမှ အသက် ၁၈ နှစ်မှ ၃၅ နှစ်အတွင်း အမျိုးသားနှင့် အသက် ၁၈ နှစ်မှ ၂၇ နှစ်အတွင်း အမျိုးသမီးများကို ၂ နှစ်အထိ စစ်မှုထမ်းရန် စစ်ကောင်စီက ကြေညာထားသည်။
သို့သော် စစ်သားသစ်များထဲတွင် ငွေကြးရယူ၍ လူအစားထိုးလိုက်ရသူ၊ တစ်နည်းနည်းဖြင့် အတင်းအကျပ် ခေါ်ခံရသူမှာ အများစုဖြစ်ပြီး မိမိသဘောဖြင့် ဝင်ရောက်သူမှာ မရှိသလောက်ပင် ဖြစ်ကြောင်း သိရသည်။
စစ်ကောင်စီတပ်သည် စစ်မှုထမ်းသင်တန်းမှ သင်တန်းဆင်းခဲ့သော ပြည်သူ့စစ်မှုထမ်းများကို တာဝန်ကျရာ တပ်ရင်း၊ တပ်ဖွဲ့အသီးသီးပို့ ပို့ဆောင်နေလျက်ရှိသောကြောင့် အသက်အကျုံးဝင်နေသူ အမျိုးသားများသည် ပြည်ပနိုင်ငံများသို့ တိမ်းရှောင်ခြင်း၊ တော်လှန်ရေးတပ်ဖွဲ့ဝင်များအဖြစ် ဝင်ရောက်ခြင်း၊ အုပ်ချုပ်ရေးအဖွဲ့ဝင် များကို ငွေပေး၍ လူအစားထိုး တိမ်းရှောင်ကြခြင်း ပြုလုပ်ကြသည်။
ထိုသို့ စစ်မှုထမ်း ဆင့်ခေါ်ခံရချိန်တွင် ရောက်မလာခြင်း၊ စားရင်းမသွင်းခြင်းကြောင့် ကျန်ရှိသော မိသားစုကို အရေးယူမည်ဟု စစ်ကောင်စီတပ်က ခြိမ်းခြောက်ထားသည်။
“အရင် ဆင့်ခေါ်စာနဲ့ခေါ်တယ်၊ ခေါ်လို့မရတဲ့လူတွေကို ညကျရင် အဲ့ဒီအိမ်တွေကို အဖွဲ့လိုက်ဝင်ဖမ်းတာ” ဟု တောင်ကြီးမြို့ အုပ်ချုပ်ရေးမှူးတစ်ဦးက ဆက်ပြောသည်။
ပြည်သူ့စစ်မှုထမ်းခြင်းကို ရှောင်လွှဲပါက ဥပဒေ ပုဒ်မ ၂၃ ပုဒ်မခွဲ (က) ဖြင့် အရေးယူမည်ဟု သတ်မှတ်ထားသည်။
စစ်ကောင်စီလက်အောက်ခံ ကာကွယ်ရေးဝန်ကြီး ဗိုလ်ချုပ်ကြီး မောင်မောင်အေးက စစ်မှုထမ်းကိစ္စနှင့် ပတ်သက်၍ လူအစားထိုးမှု၊ ငွေကြေးတောင်ခံမှုများရှိလျှင် တိုင်ကြားနိုင်ပြီး မှန်ကန်ပါက အရေးယူဆောင်သွားမည်ဟု ဇူလိုင် ၃ ရက်နေ့တွင် ပြုလုပ်ခဲ့သော ပြည်သူ့စစ်မှုထမ်း ဆင့်ခေါ်ရေး ဗဟိုအဖွဲ့အစည်းအဝေး၌ ပြောဆိုခဲ့သည်။
ပြည်သူနှင့် တိုက်ရိုက်ထိတွေ့ ဆက်ဆံရသည့် မြို့နယ်၊ ရပ်ကွက်၊ ကျေးရွာ အုပ်ချုပ်ရေးအဖွဲ့များအနေဖြင့် လူမှုဆက်ဆံရေး ကောင်းမွန်စေရေး၊ ငွေကြေးမသမာမှု မရှိစေရေး၊ အဂတိမှု မဖြစ်ပေါ်စေရေးအတွက် ဆောင်ရွက်နေပြီး လူစားထိုးမှု၊ ငွေကြေးတောင်းခံမှုများရှိလျှင် တိုင်ကြားနိုင်ကာ စစ်ဆေးအရေးယူမည်ဟု ဗိုလ်ချုပ်ကြီး မောင်မောင်အေးက ပြောဆိုခဲ့ခြင်း ဖြစ်သည်။
Leave a Comments