သျှမ်းပြည် နောင်ချိုမြို့အနီးသို့ စစ်ကောင်စီတပ် ချဉ်းကပ်လာပြီးနောက် မြို့တောင်ဘက်ရှိ ရပ်ကွက်များထဲသို့ စစ်ကောင်စီတပ်သားများ ရောက်ရှိလာကြောင်း စုံစမ်းသိရသည်။

ယမန်နေ့ (ဇူလိုင်လ ၁၃ ရက်) ညနေပိုင်းမှ စတင်ပြီး တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် နောင်ချိုမြို့ပေါ်ရှိ ပန်ဟက်၊ သပြေရေနှင့် တောင်ရပ်ကွက်အတွင်းသို့ တောင်ခမ်းဘက်မှ ထိုးစစ်ဆင်လာသည့် စစ်ကောင်စီတပ်သားများ ဝင်ရောက်လာခဲ့ကြောင်း စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

“တောင်ရပ်ကွက်နဲ့ သပြေရေဘက်တော့ စကစ ရောက်နေပြီ။ မနေ့က တစ်နေကုန် လက်နက်ကြီးသံ မကြားရဘူး၊ ရပ်ကွက်ထဲ သေနတ်ပစ်သံလောက်ပဲ ကြားရတာ။ ဈေးဘက်မှာလည်း မီးလောင်နေတယ်၊ ဘယ်သူရှို့လည်းတော့ မပြောတတ်ဘူး”ဟု နောင်ချိုမြို့နယ်မှ စစ်ရေးသတင်းရင်းမြစ်က ပြောသည်။

နောင်ချိုမြို့ပေါ်ရပ်ကွက်များသို့ စစ်ကောင်စီတပ်သားများ ဝင်ရောက်လာသည်ကို စစ်ကောင်စီဝါဒဖြန့် တယ်လီဂရမ်ချန်နယ်များတွင် ပုံနှင့်တကွ ဖြန့်ဝေထားသော်လည်း စစ်ကောင်စီနှင့် TNLA နှစ်ဘက်စလုံးမှ တစုံတရာ သတင်းထုတ်ပြန်ထားခြင်း မရှိသေးပေ။

ပြီးခဲ့သည့် ဇူလိုင်လ ၁၁ ရက်တွင် တောင်ခမ်းဒေသဘက်မှ ထိုးစစ်ဆင်လာသည့် စစ်ကောင်စီတပ် စစ်ကြောင်းများသည် နောင်ချိုမြို့တောင်ဘက် ကုန်းစံရွာအနီးရှိ မြို့ဝင်ဆိုင်းဘုတ်အထိ ချဉ်းကပ်ရောက်ရှိလာပြီးနောက် ဂုတ်ထိပ်တောင်ကြောများသို့ ဆက်လက်ချီတက်သွားပြီး ဒရုန်းဖြင့် ဗုံးကြဲတိုက်ခိုက်မှုများ လုပ်ဆောင်နေကြောင်း ဒေသခံများထံမှ သိရသည်။

လက်ရှိတွင် ကျောက်မဲနှင့် နောင်ချိုကြားရှိ ဂုတ်တွင်းလမ်းပိုင်းကို ဇူလိုင်လ ၁၀ ရက်မှ စတင်ပြီး မည်သည့်ယာဉ်မှ ဖြတ်သန်းသွားလာခွင့် မပြုတော့ဘဲ ပိတ်ထားခဲ့ရာ ယမန်နေ့တွင် ဂုတ်တွင်းရှိ တံတားကြီးလည်း မိုင်းခွဲဖျက်ဆီးခံလိုက်ရကြောင်း ဒေသခံများက ပြောဆိုသည်။

“ဂုတ်ထိပ်ဘက် တက်လာတဲ့ စစ်ကြောင်းက ဒရုန်းနဲ့ နောင်ပိန်ဘက်ခြမ်း လှမ်းပစ်တာ။ ဂုတ်ထိပ်တံတားလည်း မိုင်းခွဲခံရလို့ သွားမရတော့ဘူး။ အရင်ရက်က နောင်ပစ်ရွာကို ပလောင်တွေ ရှိတယ်ထင်ပြီး ဒရုန်းနဲ့ ဗုံး ၃ လုံး လာကြဲတာ၊ အဲ့ဘက်က ရွာသားတွေတောင် ထပ်ရှောင်နေရတယ်”ဟု နောင်ပိန်ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

နောင်ချိုဘက်ရှိ စစ်ကောင်စီတပ်မှ ဂုတ်ထိပ်တဖက်ကမ်းရှိ ကျေးရွာများသို့ ဒရုန်းဖြင့် ဗုံးကြဲတိုက်ခိုက်နေခြင်းကြောင့် နောင်ပိန်ဘက်ကမ်းရှိ နောင်ပစ်၊ လုံကြိမ်၊ လုံဝယ်၊ ပင်ပေါ၊ ဇီးပင်စခန်း စသည့် ကျေးရွာများလည်း ထပ်မံစစ်ဘေးရှောင်နေရကြောင်း ဒေသခံများက ပြောသည်။

ယမန်နေ့ (ဇူလိုင်လ ၁၃ ရက်) အထိ TNLA သတင်းနှင့် ပြန်ကြားရေးဌာန ထုတ်ပြန်ချက်အရ နောင်ချိုမြို့နယ်ရှိ ရွှေပြည်ညွန့်၊ ကျောက်တော၊ ကုန်းစံ၊ ပန်လန်းနှင့် ကျောက်ကြမ်း စသည့် ကျေးရွာ (၅) ရွာတို့တွင် TNLA ပူးပေါင်းတပ်နှင့် စစ်ကောင်စီတပ်တို့ တိုက်ပွဲဆက်လက်ဖြစ်ပွားနေကြောင်း ဆိုသည်။

TNLA ထိန်းချုပ်ထားသည့် နောင်ချိုမြို့ကို လတ်တလောတွင် လက်လွှတ်ရမည့် အနေအထား မရှိသေးဘဲ အတတ်နိုင်ဆုံး ခုခံတိုက်ခိုက်နေကြောင်း TNLA ပြောရေးဆိုခွင့်ရှိသူ လွေးယေဦးက ဇူလိုင် (၅) ရက်တွင် ပြုလုပ်ခဲ့သည့် သတင်းစာရှင်းလင်းပွဲအတွင်း ပြောဆိုထားသည်။

ပုံစာ – ဂုတ်တွင်းတံတား ဖျက်ဆီးခံရပြီး ပျက်စီးမှု (ဓာတ်ပုံ – တယ်လီဂရမ်)