သျှမ်းပြည် နောင်ချိုမြို့ပေါ်သို့ စစ်ကောင်စီတပ်မှ လေကြောင်းဖြင့် ဆက်တိုက်ဗုံးကြဲ တိုက်ခိုက်နေပြီး နောင်ချိုမြို့ဝင်ဆိုင်းဘုတ်အထိ စစ်ကောင်စီတပ် ချဉ်းကပ်ရောက်ရှိလာကြောင်း စုံစမ်းသိရသည်။

ယနေ့ (ဇူလိုင်လ ၁၁ ရက်) နေ့လယ် ၃ နာရီကျော်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် နောင်ချိုမြို့ပေါ် ဈေးရပ်ကွက်သို့ စစ်ကောင်စီတပ်မှ လေကြောင်းဗုံး နှစ်လုံး ကြဲချတိုက်ခိုက်ခဲ့သည်။

တစ်ချိန်တည်းတွင် တောင်ခမ်းဒေသဘက်မှ ထိုးစစ်ဆင်လာသည့် စစ်ကောင်စီတပ် စစ်ကြောင်းများသည် နောင်ချိုမြို့တောင်ဘက် ကုန်းစံရွာအနီးရှိ မြို့ဝင်ဆိုင်းဘုတ်အထိ ချဉ်းကပ်ရောက်ရှိလာကြောင်း စစ်ရေးသတင်းရင်းမြစ်က ပြောသည်။

“နေ့လယ်က မြို့ထဲ ဈေးရပ်ကွက်လောက်မှာ ဂျက်နဲ့ ဗုံးနှစ်လုံး ကြဲသွားတယ်။ မြို့ထဲလည်း လူမရှိသလောက်ဆိုတော့ ထိခိုက်မှုကတော့ မသိရသေးဘူး။ စစ်ကောင်စီက တဖြည်းဖြည်းနဲ့ မြို့နားရောက်လာတယ်။ ဂုတ်ထိပ်တံတားသွားတဲ့ လမ်းခွဲနားက မြို့ဝင်ဆိုင်းဘုတ်ထိ ရောက်နေပြီ၊ မြို့ပေါ်ရောက်ပြီလို့တော့ တပ်အပ်မပြောနိုင်သေးဘူး”ဟု နောင်ချိုမြို့နယ်မှ စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

လက်ရှိတွင် ကျောက်မဲနှင့် နောင်ချိုကြားရှိ ဂုတ်တွင်းလမ်းပိုင်းလည်း ပိတ်ထားပြီး နောင်ချိုမြို့အနီးတွင် စစ်ကောင်စီတပ်နှင့် TNLA ပူးပေါင်းတပ်ဖွဲ့တို့ ကုန်းစံရွာအနီး တိုက်ပွဲပြင်းထန်နေခြင်းကြောင့် မည်သည့်ယာဉ်မှ ဖြတ်သန်းသွားလာခွင့် မပြုတော့ကြောင်း ဒေသခံများထံမှ သိရသည်။

ပြီးခဲ့သည့် ဇူလိုင်လ (၈) ရက် ညနေပိုင်းတွင် နောင်ချိုမြို့နှင့် ၃ မိုင်ခန့်အကွာ TNLA ထိန်းချုပ်ထားသည့် အမှတ် (၆၀၆) ဒုံးတပ်ရင်းကို စစ်ကောင်စီတပ် ပြန်လည်သိမ်းပိုက်ခဲ့ပြီးနောက် မြို့တွင်းဝင်ရောက်ရန် စုဖွဲ့ပြင်ဆင်နေကြောင်း စစ်ရေးသတင်းရင်းမြစ်ထံမှ သိရသည်။

ယနေ့ (ဇူလိုင်လ ၁၁ ရက်)တွင် နောင်ချိုမြို့နယ်ရှိ ကျောက်ကြမ်း၊ ကျောက်တော၊ နမ့်ပါတက်၊ ကျောက်ပြုတ်၊ နားမုံနှင့် ရေမောင်းတန်းကျေးရွာကြား ပြည်ထောင်စုလမ်းမကြီး တလျှောက်တွင် TNLA ပူးပေါင်းတပ်ဖွဲ့နှင့် စစ်ကောင်စီတပ်တို့ တိုက်ပွဲဆက်လက်ဖြစ်ပွားနေချိန်အတွင်း စစ်ကောင်စီတပ်မှ လက်နက်ကြီး (၇၂) လုံး၊ ဒရုန်းဗုံး (၂၇) လုံး ပစ်ခတ်တိုက်ခိုက်ခဲ့ကြောင်း TNLA သတင်းနှင့် ပြန်ကြားရေးဌာနမှ ထုတ်ပြန်သည်။

လာမည့် ဩဂုတ်လတွင် TNLA နဲ့ စစ်ကောင်စီတို့အကြား ထပ်မံတွေ့ဆုံမည့် ဆွေးနွေးပွဲမတိုင်မီ TNLA ထိန်းချုပ်ထားသည့် နောင်ချို၊ ကျောက်မဲ၊ သီပေါ၊ မိုးမိတ်နှင့် မိုးကုတ်မြို့နယ်များသို့ စစ်ကောင်စီတပ်မှ နေ့စဉ်နီးပါး လေကြောင်းဖြင့် ဗုံးကြဲတိုက်ခိုက်နေသည်။

ထို့ကြောင့် ၎င်းဒေသများတွင် အမျိုးသမီးနှင့် ကလေး အပါအဝင် အရပ်သားထိခိုက်သေဆုံးမှု မြင့်တက်လျက်ရှိပြီး ပြည်သူများလည်း ထပ်မံထွက်ပြေးတိမ်းရှောင်ရခြင်းကြောင့် နေရာထိုင်ခင်းနှင့် စားနပ်ရိက္ခာ အကူအညီများ လိုအပ်လျက်ရှိကြောင်း စစ်ရှောင်ကူညီသူများက ပြောသည်။

ပုံစာ – ရပ်စောက်လမ်းအထွက် နောင်ချိုမြို့ဝင်ဆိုင်းဘုတ်အထိ ရောက်ရှိလာသည့် စစ်ကောင်စီတပ် (ဓာတ်ပုံ – တယ်လီဂရမ်)