ကချင်ပြည် ဖားကန့်မြို့နယ်တွင် အချဉ်ပေါင်းရောင်းနေသည့် အမျိုးသားတစ်ဦး အမည်မသိ လက်နက်ကိုင်၏ သေနတ်ဖြင့် ပစ်သတ်ခံရကြောင်း စုံစမ်းသိရသည်။
ယမန်နေ့ (ဇူလိုင်လ ၁၀ ရက်) နေ့လယ် ၁ နာရီဝန်းကျင်တွင် ဖားကန့်မြို့နယ်၊ လုံးခင်းကျေးရွာ အုပ်စု မှော်စီစာကျေးရွာ Sky ဟိုတည်ရှေ့တွင် အချဉ်ပေါင်း ရောင်းနေသည့် ဈေးသည်အမျိုးသားတစ်ဦးကို အမည်မသိ လက်နက်ကိုင်မှ သေနတ်ဖြင့် ပစ်သတ်ခဲ့ကြောင်း ဖားကန့်မြို့နယ်မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“မနေ့က ဖားကန့်နဲ့ မှော်စီစာ သွားတဲ့ လမ်းမကြီးပေါ် ဟိုတယ်အရှေ့မှာ အချဉ်ပေါင်းသည် တစ်ဦးကို သေနတ်နဲ့ ပစ်သွားတာ။ ဒီလိုက ဖားကန့်မှာ မကြာခဏဖြစ်တယ်၊ ဘယ်အဖွဲ့ ပစ်သွားလဲဆိုတာ မသိရဘူး။ ဒီလိုတွေ ဖြစ်နေတာကလည်း အမြဲတမ်း သေနတ်တွေနဲ့ပဲ ပစ်ခံနေရတာ”ဟု ဖားကန့်မြို့နယ်ဒေသခံ ၎င်းအမျိုးသားက ပြောသည်။
ဖားကန့်မြို့နယ်တွင် သေနတ်ပစ်ခံရပြီး သေဆုံးသွားသည့် ၎င်းအမျိုးသားသည် အသက် ၄၀ ဝန်းကျင်ခန့်ရှိပြီး သေနတ် ဒဏ်ရာ ၂ ချက်ဖြင့် သေဆုံးသွားကြောင်း သိရသည်။
ဖားကန့်မြို့နယ်တွင် ယခုကဲ့သို့ အရပ်သားများ မကြာခဏ သေနတ်ပစ်သတ်ခံရပြီး ဇူလိုင်လ ပထမပတ်အတွင်း သေဆုံးသူ ၃ ဦးအထိ ရှိနေကြောင်း ဒေသခံများက ပြောဆိုသည်။
ဖားကန့်မြို့နယ်တွင် ယခု ဇူလိုင်လတွင် ကချင်လွတ်လပ်ရေးတပ် KIA ပူးပေါင်းတပ်ဖွဲ့နှင့် စစ်ကောင်စီတပ်တို့ တိုက်ပွဲဖြစ်ပွားခြင်း မရှိသော်လည်း နှစ်ဘက် စစ်ရေးတင်းမာနေကြောင်း ဒေသခံများထံမှ သိရသည်။
Leave a Comments