ကချင်ပြည်နယ် ၊ ဖားကန့်မြို့နယ်၊ မှော်စီစာကျေးရွာအနီး၊ တစ်သုံးလုံး ကျောက်စိမ်း ကုမ္ပဏီဝင်း အတွင်းရှိ မြေသယ်ကားနှင့် စက်ယန္တရားများကို ယနေ့ (ဇွန်လ ၃ ရက်) နံနက် ၈ နာရီကျော်က စစ်ကောင်စီတပ် ထပ်မံ မီးရှို့ဖျက်ဆီးခဲ့ကြောင်း ဒေသခံများက ပြောသည်။
ယနေ့ မီးရှို့ခံရသည့် ကုမ္ပဏီသည် ယမန်နေ့ (ဇွန်လ ၃ ရက်နေ့) က စစ်ကောင်စီလက်ချက်ဖြင့် ယမ်းဂိုထောင် ပေါက်ကွဲမှုဖြစ်ခဲ့သည့် ကုမ္ပဏီဝန်း အနီးတွင် တည်ရှိသည်ဟု ဆိုသည်။
“မနေ့က ယမ်းဂိုထောင်ပေါက်တော့ ၃ ယောက်ဆုံးတယ်။ ဒဏ်ရာရသူများတယ်။ ဒီမနက် စစ်တပ်က စက်တွေကားတွေ မီးထပ်ရှို့တယ်။ ခုညနေပိုင်း လေယာဉ် (ရဟတ်ယာဉ်) လာတော့ ပစ်ကြတယ်။ အလုပ်လုပ်လို့ မရဘူးပေါ့။ ဘယ်လိုဆက်ဖြစ်မယ် မသိဘူး” ဟု ဒေသခံ တဦးက ပြောသည်။
ယနေ့ နံနက် စစ်ကောင်စီတပ် မီးရှို့ပြီးနောက်ညနေ ၃ နာရီကျော်တွင် စစ်ရယာဉ် တစင်း ဖားကန့် စစ်တပ် ဗျူဟာကုန်း အတွင်း ဆင်းသက်ရန် ပျံဝဲနေစဉ် မြေပြင်ရှိ KIA ပူးပေါင်းတပ် စုပြုံပစ်ခတ်သဖြင့် ရဟတ်ယာဥ်ပေါ်မှ ပြန်လှန် ပစ်ခတ်ခဲ့ကြောင်း ပစ်ခတ်ခံရပြီးနောက် အထုတ်တထုတ်ချ၍ ရဟတ်ယာဉ် ပြန်လှည့်သွားကြောင်း ဒေသခံများက ဆိုသည်။
“အောက်ကပစ်၊ အပေါ်ကပစ်နဲ့ ကြောက်စရာကြီး၊ အထုတ်တထုတ်ချသွားတယ်၊ လူထိတာရှိတယ်လည်း ပြောတယ်။ စစ်တပ် ဝင်လာတုန်းက KIA ကော PDF ရော ရှိနေတာ မတားဘဲနဲ့ အခုလူတွေလုပ်စားတဲ့ နေရာမှာ စစ်ဖြစ်တာ ဘယ်ကောင်းမလဲ။ အရင်က သူတို့က ညှိထားကြတာ ငွေကိစ္စက။ အခုက စစ်တပ် ခွဲတမ်း နည်းလို့လား အဲလိုထင်တာပဲ” ဟု နောက်ထပ် ဒေသခံ တဦးက ရှင်းပြသည်။
KIA ပစ်ခတ်မှုကြောင့် ရဟတ်ယဉ် ထိခိုက်မှုရှိမရှိကိုမူ စုံစမ်းနေဆဲ ဖြစ်သည်။
ဖားကန့်မြို့နယ်အတွင်း စစ်ကောင်စီတပ် ပြီးခဲ့သည့် မေလ ၂၈ နှင့် ၂၉ ရက်တွင် ပြန်လည်ဝင်ရောက်လာရာ မေလ ၃၁ ရက်နေ့တွင် ယနေ့ မီးရှို့ခံခဲ့ရသည့် အေသုံးလုံး ကုမ္ပဏီ အတွင်းရှိ အဆောက်အအုံ တခုကို မီးရှို့ခဲ့သေးသည်။
နောက်ဆုံးရရှိသည့် သတင်းများအရ ရဟတ်ယာဉ် ပစ်ခတ်ခံရမှုကြောင့် ဖားကန့်ဒေသတွင်း စစ်ရေးတင်းမာနေပြီး အထူးသဖြင့် မှော်စီစာ၊ လုံးခင်း ပတ်ဝန်းကျင်ကျင်နေ ပြည်သူများ တိမ်းရှောင်ရန် ကြိုတင်ပြင်ဆင်မှုများ ပြုလုပ်နေကြကြောင်း ဒေသခံများက ပြောသည်။
Leave a Comments