နိုင်ငံတဝှမ်း ရေဘေးကြောင့် ပြည်သူများ အတိဒုက္ခရောက်နေစဥ် ကချင်ပြည်နယ်၊ ဖားကန့်မြို့နယ်၊ ဆိုင်းတောင်ရွာကို စစ်ကောင်စီ လေကြောင်းက ဗုံးကြဲသဖြင့် မီးလောင်နေကြောင်း ဒေသခံများက ယနေ့ ( စက်တင်ဘာလ ၁၂ ရက်) တွင် ပြောသည်။
ပြီးခဲ့သည့် စက်တင်ဘာလ ၇ ရက်နေ့က ဆိုင်းတောင်ရွာရှိ လပ်ကီးမန်း ဟိုတယ်တွင် စစ်ကောင်စီတပ်နှင့် KIA/PDF တို့ ပစ်ခတ်မှု စတင်ဖြစ်ပွားခဲ့ပြီးနောက် တိုက်ပွဲများ ပြင်းထန်လာရာ ယနေ့ မနက် အစောပိုင်းတွင် ဆိုင်းတောင် ရဲစခန်းကို KIA/PDF ပူးပါင်းတပ် တိုက်ခိုက် သိမ်းပိုက်ပြီးနောက် ယခုကဲ့သို့ ဗုံးကြဲတိုက်ခိုက်နေခြင်း ဖြစ်သည်။
“အခုညနေ အထိဆို လေးငါးကြိမ်ရှိပြီ လေယာဥ်နဲ့ ဗုံးကြဲတာ။ (ဖားကန့်) ဗျူဟာကုန်းကလည်း အမြောက်နဲ့ ပစ်တယ်။ အထိများတာက ရပ်ကွက် (၄) ဘက်။ စစ်သားတွေ ရွာထဲ မီးရှို့လို့ ပိုဆိုးနေတာလို့လည်း ကြားတယ်။ အကုန်ရှောင်နေရတာပေါ့” ဟု ဒေသခံ တစ်ဦးက ပြောသည်။
လူမှုကွန်ရက်တွင် ပြန့်နှံ့နေသည့် ရုပ်သံဖိုင်တွင် ဆိုင်းတောင်ရွာ အတွင်း နေအိမ်များ မီးလောင်နေသည်ကို တွေ့ရပြီး အဆိုပါ မီးလောင်နေသည့် နေရာသည် တိုက်ပွဲစဖြစ်ရာ လပ်ကီးမန်းဟိုတယ် တည်ရှိသည့် ရပ်ကွက် (၄) ဖြစ်ကြောင်း ယင်းနေရာကို လေကြောင်းက ဗုံးကြဲပြီးနောက် စစ်ကောင်စီတပ်သားများက နေအိမ်များကို မီးရှို့ခဲ့သည်ဟု သိရကြောင်း ဒေသခံက ဆိုသည်။
တိုက်ပွဲများ အတွင်း နှစ်ဘက်တပ် ထိခိုက်သေဆုံးမှုနှင့် ပြည်သူလူထု ထိခိုက်နစ်နာ ဆုံးရှုံးမှုကိုမူ မသိရသေးပေ။
ယနေ့စစ်ကောင်စီနှင့် KIA ပူးပေါင်းတပ်များ ချီဖွေမြို့နယ်နှင့် ပန်ဝါမြို့နယ်တွင်လည်း တိုက်ပွဲများ ဖြစ်ပွားနေကြောင်း သိရသည်။
ဖားကန့်မြို့နယ် အတွင်း တိုက်ပွဲများ မကြာခဏ ဖြစ်ပွားနေရာ ပြီးခဲ့သည့် ဩဂုတ်လ ၁၅ ရက်နေ့က လုံးခင်းကျေးရွာအုပ်စု၊ တောမှောနှင့် လမောင်ရွာရှိ စစ်ကောင်စီစခန်းများကို KIA/PDF ပူးပေါင်းတပ်က တိုက်ခိုက် သိမ်းပိုက်ထားသည်
