ကချင်ပြည်နယ်၊ ဖားကန့်မြို့နယ်၊ မှော်စီစာကျေးရွာ ကုမ္ပဏီ ကျောက်စိမ်း လုပ်ကွက် အတွင်းရှိ ယမ်းဂိုထောင် ယနေ့ (ဇွန်လ ၃ ရက်) နေ့လယ် ၁ နာရီကျော်က စစ်တပ် ပစ်ခတ်သည့် လက်နက်ကြီး ထိမှန် ပေါက်ကွဲရာ အနည်းဆုံး လူ ၂ ဦး သေဆုံးပြီး ၁၀ ဦးထက်မနည်း ထိခိုက်ဒဏ်ရာ ရရှိခဲ့ကြောင်း ဖြစ်စဥ် ဖြစ်ပွားရာ အနီး နေထိုင်သူများက ပြောသည်။

ပြီးခဲ့သည့် ရက်ပိုင်း အတွင်းက စစ်ကောင်စီ စစ်ကြောင်း ဖားကန့်ဒေသသို့ ဝင်ရောက်လာပြီးနောက် လုံးခင်းကျေးရွာအုပ်စု၊ မှောင်စီစာတွင် ကျောက်စိမ်း တူးဖော်နေသည့် ကုမ္ပဏီ မြေသယ်ကားနှင့် မြေတူး ယန္တရားများ မီးရှိူ့နေရာက ယခု ယမ်းဂိုထောင်ကို ပစ်ခတ် ဖောက်ခွဲခဲ့ခြင်း ဖြစ်သည်။

“အဲနားမှာရှိနေတဲ့ လူတွေ ပြောတာက စစ်တပ်ရှိတဲ့ ဘုရားကုန်းဘက်ကလာတဲ့ လက်နက်ကြီး မီးခိုးတန်းကြီး တွေ့တယ်တဲ့။ လက်နက်ကြီးကျလို့ ကွဲတာ။ ယမ်းဂိုထောင်တွေက သူ့ဟာသူ ပေါက်ကွဲတာမျိုးက ဖြစ်ခဲတယ်။ ဖြစ်ခဲ့တာတော့ ရှိတာပေါ့။ ခုကတော့ လက်နက်ကြီး ထိတာ” ဟု ဖြစ်စဥ်အနီးရှိ ဒေသခံက ဆိုသည်။

ဖားကန့်ဒေသသို့ စစ်ကောင်စီ စစ်ကြောင်း ဝင်ရောက်လာပြီးနောက် ကျောက်စိမ်း တူးဖော်နေသည့် ကုမ္ပဏီများအား KIA နှင့် ပတ်သက်သည်ဟု ဆိုက မီးရှို့ဖျက်ဆီးမှု လုပ်ဆောင်နေရာက ယခုဖြစ်စဉ် ဖြစ်ပွားခဲ့ခြင်း ဖြစ်သည်။

“လောလောဆယ် နှစ်ဦးသေတာ တဦးက အမျိုးသမီး။ ထိတာက သုံးလေးဆယ်လောက် ထိတယ်။ ဆယ်ယောက်လောက် ထိတာပြင်းတယ်။ ခုဖြစ်တဲ့ဟာက KIA နဲ့ ပတ်သက်လား ဘာလား အဲလိုတွေတော့ မသိဘူး” ဟု လူမှုကူညီရေးအသင်းနှင့် နီးစပ်သူ တဦးက ဆိုသည်။

ယခု ပေါက်ကွဲမှု ဖြစ်ပွာသည့် ကုမ္ပဏီကို KIA ထိပ်ပိုင်းခေါင်းဆောင်များနှင့် နီးစပ်သူများ ပိုင်ဆိုင်သည်ဟု စစ်တပ် ဝါဒဖြန့် တယ်လီဂရန် ချန်နယ်များတွင် ရေးသားနေသော်လည်း သီးခြား အတည်ပြုနိုင်ခြင်း မရှိသေးပေ။

ပြီးခဲ့သည့် ရက်ပိုင်းက ဖားကန့်ဒေသတွင်း စစ်ကောင်စီ စစ်ကြောင်း ဝင်ရောက်လာရာက မတည်မငြိမ် ဖြစ်နေရာ လုံးခင်းနှင့် တကွ ဆက်စပ်ဒေသများတွင်လည်း ကျီးလန့်စာစားနေရသည့် အခြေအနေဟု ဒေသခံများက ပြောသည်။