ကချင်ပြည်နယ် ဖားကန့်မြိုနယ်တွင် စစ်ကြောင်းထိုးလာသည့် စစ်ကောင်စီတပ်နှင့် ကချင်လွတ်လပ်ရေးတပ် KIA ပူးပေါင်းတပ်တို့ တိုက်ပွဲများ ပြင်းထန်နေကြောင်း စုံစမ်းသိရသည်။
ယနေ့ (မေလ ၂၈ ရက်) နံနက် ၇ နာရီဝန်းကျင်ခန့်မှ စတင်၍ ဖားကန့်မြို့နယ် အတွင်းသို့ စစ်ကောင်စီတပ်က အင်အားရာနှင့်ချီ စစ်ကြောင်းထိုးလာပြီး လုံးခင်း၊ လယ်ပြင်နှင့် ငြိမ်းချမ်းသာယာ အနီးတစ်ဝိုက်တွင် KIA ပူးပေါင်းတပ်နှင့် တိုက်ပွဲများ ပြင်းထန်နေကြောင်း ဖားကန့်မြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“မနေ့ကနဲ့ ရှေ့တနေ့ကတော့ ဖားကန့်ဘက်ကို စစ်ကောင်စီတပ်တွေ အနီးကပ် ဝင်လာကြတာ။ ဒီနေ့ မေလ ၂၈ ရက်မှ ထိုးစစ်စင်လာတဲ့ စစ်ကောင်စီတွေနဲ့ နှစ်ဘက် တိုက်ပွဲပြင်းထန်နေပါတယ်။ လေယာဉ်နဲ့တွေတော့ မသုံးသေးပေမယ့် လက်နက်ကြီး လက်နက်ငယ်တွေနဲ့ ပစ်ပါတယ်။ မြို့ထဲရွာထဲမှာ ပစ်နေကြတော့ တချို့ဒေသခံတွေလည်း မထွက်ရဲသေးဘူး”ဟု ဖားကန့်ဒေသခံ ၎င်းအမျိုးသားက ပြောသည်။
ယနေ့နံနက်ပိုင်း စစ်ကောင်စီတပ် စစ်ကြောင်းထိုးလာချိန်တွင် ငြိမ်းချမ်းသာယာ (ခွန်ဆာကုန်း) ရဲစခန်းနှင့် မြောက်ကုန်း စစ်တပ်ကုန်းမှ လက်နက်ကြီးများ ရမ်းသမ်းပစ်ကူခဲ့သည့်အတွက် ထိုနေရာများတွင် တိုက်ပွဲပြင်းထန်နေကြောင်း သိရသည်။
ထိုတိုက်ပွဲဖြစ်ပွားနေသည့် လယ်ပြင်၊ လုံးခင်း၊ ငြိမ်းချမ်းသာယာကုန်းရှိ ပြည်သူများသည် ထွက်ပြေးတိမ်းရှောင်နေကြရပြီး အချို့သော ပြည်သူများလည်း နေအိမ်အတွင်း ဆက်လက်ပိတ်မိနေကြောင်း သိရသည်။
ယမန်နေ့ ည ၈ နာရီဝန်းကျင်တွင် ဖားကန့်မြို့ ယမ်းချက်စက်ရုံနှင့် လယ်ပြင်ကျေးရွာတွင် စစ်ကောင်စီတပ်ဖွဲ့ဝင်များ စစ်ကြောင်းထိုးလာကြောင်း ဒေသခံများ သိရှိပြီးနောက် ညတွင်းချင်း ထွက်ပြေးတိမ်းရှောင်ကြရသည်။
Leave a Comments