ကချင်ပြည် ကျောက်စိမ်းထွက်သည့် ဖားကန့်ဒေသတွင် စစ်ကော်မရှင်နှင့် ကချင်လွတ်လပ်ရေး တပ်မတော် (KIA) တို့ကြား တိုက်ပွဲဖြစ်ပွားမှုကြောင့် ကုန်စျေးနှုန်းများ အဆမတန် မြင့်တက်လာသဖြင့် ဒေသခံများအခက်အခဲ ကြုံတွေ့နေရကြောင်း သတင်းရရှိသည်။

ဖားကန့်မြို့နယ်အတွင်း တိုက်ပွဲများဖြစ်ပွားနေသည့်အပြင် အဓိကကုန်သွယ်ရေး လမ်မကြီး နှစ်လမ်းဖြစ်သည့် မြို့တောင်ဘက်ရှိ ဖားကန့်-အင်းတော်ကြီးလမ်းကို စစ်ကော်မရှင်တို့က ပိတ်ထားမှုကြောင့် လက်ရှိတွင် မြို့အရှေ့ဘက်ရှိ ဖားကန့်-ကာမိုင်းလမ်း-မြစ်ကြီးနားကိုသာ အသုံးပြုသွားလာနိုင်ကြောင်း ဖားကန့်မြို့ အသက် ၃၀ ဝန်းကျင် အမျိုးသားတစ်ဦးက သျှမ်းသံတော်ဆင့်ကို ပြောသည်။

“ဖားကန့်ကုန်သွယ်လမ်း နှစ်လမ်းရှိတာကို ဖားကန့်-အင်းတော်ကြီးလမ်းတစ်လမ်းကတော့ ပိတ်ထားတယ်။ဖားကန့်-မြစ်ကြီးနားလမ်းကြတော့ ခဏပိတ်သွားပြီး ပြန်ဖွင့်တာမကြာသေးဘူး။ အဲ့ချိန်တုန်းက တက်နေတဲ့ကုန်စည်ဈေးနှုန်းတွေက အခုချိန်ထိ သိပ်မကျသေးဘူး။”ဟု ၎င်းကပြောသည်။

ဖားကန့် – ကာမိုင်းလမ်း – မြစ်ကြီးနားကို ပြီးခဲ့သည့် မေလမှစတင်ပြီး ထိုလမ်းတကြောကို စစ်ကော်မရှင်နှင့် ရှမ်းနီအမျိုးသားများတပ်မတော်(SNA) တို့က ပြန်လည် ထိန်းချုပ်ထားကြောင်း ‌ဒေသခံများကပြောသည်။

ထိုလမ်းများပိတ်ဆို့ခြင်း စစ်ဆေးမှုများပြားခြင်းတို့ကြောင်း ဖားကန့်သို့ တင်းပို့နေသည့် ကုန်စည် စားသောက်ကုန်များ ယခင်ထက် ဈေးနှုန်း နှစ်ဆ ဖြစ်နေရပြီး ဒေသခံများအတွက် အခက်အခဲဖြစ်နေကြောင်း ဖားကန့်မြို့နေ အမျိုးသားတစ်ဦးက ထပ်မံလောင်းပြောသည်။

“ဒီဖားကန့်မှာ ရောင်းဝယ်ရေးကခက်ခဲတယ်။ မြို့ကိုဝင်တဲ့လမ်းက ပိတ်ထားတာကြောင့်ရယ် ဖွင့်ထားတဲ့လမ်းကလည်း ရှမ်းနီတွေ စစ်ကော်မရှိတွေ အခွန်ကောက်တာကြောင့် ကုန်စည်းတွေက ဈေးနှုန်းတွေတက်တာ။တချို့တွေဆို ထမင်းဆီဆမ်းတောင် ကြက်ဥကြော်နဲ့ စားဖို့အထိ ကုန်စည်ပျက်တဲ့ ဒဏ် အခက်အခဲတွေကိုကြုံခဲ့ရတယ်”ဟု ဖားကန့်မြို့နေ အမျိုးသားတစ်ဦး ကပြောသည်။

ကြက်ဉတစ်လုံးသည် ယခင်တွင် ၅၀၀ ကျပ် လက်ရှိတွင် ၁ ထောင် မှ ၃ ထောင်ကျပ် ထိရှိကြောင်း၊ ယခင် ဓာတ်ဆီတစ်ဂါလံ‌ဈေး ၃ သောင်းဝန်းကျင်ဖြစ်ပြီး လက်ရှိတွင် ၈ သောင်း ကျပ်၊ ဆန် ၂၄ ပြည်တစ်အိတ်သည် ယခင်တွင် ၁ သိန်း ၇ သောင်းကျပ် လက်ရှိတွင် ၂ သိန်းခွဲဝန်းကျင် အထိဈေးနှုန်းမြင့် တက်နေကြောင်း ဒေသခံများကပြောသည်။

ပြီးခဲ့သည့် ဇွန်လတွင် ဖားကန့်မြိုတွင် ဆန်း ၂၄ ပြည်တစ်အိတ်လျှင် ကျပ်ငွေ ၃ သိန်းဝန်းကျင်အထိ ဈေးမြင့်တက်သွားခဲ့ကြောင်း သိရသည်။

ပြီးခဲ့သည့် ၂၀၂၄ နှစ်ဆန်းပိုင်းမှ ၂၀၂၅ မေလအထိ ဖားကန့်မြို့ အနီးဝန်းကျင်ရှိ ကျေးရွာများနှင့် စခန်းကုန်း အများစုကို KIA နှင့် ပူးပေါင်းတပ်များက ထိန်းချုပ်ထားနိုင်ခဲ့သော်လည်း ဖားကန့်မြို့ပေါ်ရှိ စစ်ကော်မရှင်တပ်သည် ဗျူဟာကုန်းကို မထိန်းချုပ်နိုင်ခဲ့ကြောင်းသိရသည်။

ပြီးခဲ့သည့် မေလကုန်ပိုင်းမှ စတင်၍ စစ်ကော်မရှင်တပ်သည် စစ်ကူအင်အား ရာနှင့်ချီကာ ဖားကန့်မြို့သို့ ပြန်လည်အင်အားဖြည့်လာပြီး မြို့ကိုအပြည့်အဝ ပြန်လည်ထိန်းချုပ်နိုင်ရန် ကြိုးစားနေကြောင်းသိရသည်။