သျှမ်းပြည်တောင်ပိုင်း မိုးဗြဲမြို့ကို ပြန်လည်ထိန်းချုပ်နိုင်သည့် စစ်ကောင်စီတပ်က မိုးဗြဲ-လွိုင်ကော် လမ်းမကြီးကိုပါ ထပ်မံထိန်းချုပ်နိုင်ရန် အင်အားအလုံးအရင်းဖြင့် စစ်ကြောင်းထိုးလာသောကြောင့် ယခုရက်ပိုင်း၌ ကရင်နီတော်လှန်ရေးတပ်ဖွဲ့များနှင့် နေ့စဉ်တိုက်ပွဲဖြစ်ပွားနေလျက်ရှိကြောင်း သိရသည်။

ကရင်နီတော်လှန်ရေးတပ်ဖွဲ့များ တစ်နှစ်ကျော်ကြာ သိမ်းထားသည့် မိုးဗြဲမြို့ကို ယခုဇူလိုင် လဆန်းတွင် စစ်ကောင်စီတပ်က ပြန်လည်သိမ်းပိုက်ပြီးနောက် တော်လှန်ရေးတပ်ဖွဲ့များ မဝင်ရောက်နိုင်ရန်နယ်မြေရှင်းလင်းရေး လုပ်နေခြင်း ဖြစ်ကြောင်း စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

“မိုးဗြဲနဲ့ ဖယ်ခုံအရှေ့ဘက်ကမ်းကတော့ အခြေအနေ လုံးဝမကောင်းဘူး။ လက်နက်ကြီးနဲ့ ဆက်တိုက်ထုပြီး စစ်ကောင်စီနဲ့ PNO က သာလွန်အင်အားနဲ့ ထိုးတက်လာကြတာ” ဟု စစ်ရေးသတင်းရင်းမြစ်တစ်ဦးက ပြောသည်။

စစ်ကောင်စီတပ်က မိုးဗြဲမြို့ကို ပြန်လည်ထိန်းချုပ်ပြီးနောက် တစ်ပတ်အတွင်း မြို့ထဲရှိ နေအိမ်အများအပြားကို မီးရှို့ခဲ့ကြောင်း ဆိုသည်။

မိုးဗြဲမြို့ တိုက်ပွဲအခြေအနေနှင့် ပတ်သက်၍ ကရင်နီအမျိုးသားများကာကွယ်ရေးတပ် (KNDF) ၏ သတင်းနှင့်ပြန်ကြားရေး တာဝန်ခံ တာအယ်စိုးကို သျှမ်းသံတောဆင့်က ဆက်သွယ်မေးမြန်းခဲ့သော်လည်း ပြန်လည်ဖြေကြားခြင်းမရှိသေးပေ။

မိုးဗြဲမြို့နှင့် လွိုင်ကော်မြို့သည် လမ်းမကြီးအတိုင်းသာဆိုလျှင် ၁၅ မိုင်ခန့် ကွာဝေးသည်။

စစ်ကောင်စီ၏ စစ်ကြောင်းသည် မိုးဗြဲမြို့မှ ဝါရီကောခူ၊ ဆောင်းကန်းလမ်းခွဲ၊ ကုန်းသာ လမ်းမအတိုင်း စစ်ကြောင်းထိုးနေသကဲ့သို့ ညောင်ရွှေမြို့နယ် ရေပူရွာမှ ထီရီး၊ လွယ်ပေါ၊ ဆင်ဖြူ၊ လွယ်ထွန် စသည့် ရွာများကို ဖြတ်ပြီး စစ်ကြောင်းထိုးလာနေကြောင်း သိရသည်။

အင်အားတစ်ထောင်ကျော်ပါသည့် စစ်ကောင်စီနှင့် ပအိုဝ်းပြည်သူ့စစ် PNO တပ်ဖွဲ့ စစ်ကြောင်းက ညောင်ရွှေမြို့နယ် ဘုရားတောင်ကျေးရွာနှင့် ရေပူကျေးရွာရှိ အင်းလေးပြည်သူ့ကာကွယ်ရေးတပ် (IPDF)၏ တပ်စခန်း ၂ ကိုလည်း ဇွန်လ ၂ ရက်တွင် တိုက်ခိုက်သိမ်းပိုက်ထားသည်။

လက်ရှိ စစ်ကောင်စီတပ်၏ ထိုးစစ်ကို ကရင်နီအမျိုးသားများကာကွယ်ရေးတပ် (KNDF)၊ ကယန်းအမျိုးသားတပ်မတော် (KNA)၊ မိုးဗြဲ ပြည်သူ့ကာကွယ်ရေးတပ် (Mobye PDF)နှင့် မဟာမိတ်ပူးပေါင်း တပ်ဖွဲ့များက ခုခံတိုက်ခိုက်နေသည်။

စစ်ကောင်စီသည် ကရင်နီ (ကယား) ပြည်အတွင်း ပို့ဆောင်ဆက်သွယ်ရေး လမ်းကြောင်းအတွက် အဓိကအရေးပါသော လွိုင်ကော်-မိုးဗြဲ-ဖယ်ခုံ-ပင်လောင်း လမ်းမကြီးကို ပြန်ရနိုင်ရန် ယခုနှစ်ဦးပိုင်းမှစ၍ ထိုးစစ်ဆင်နေခြင်း ဖြစ်သည်။

ထိုလမ်းမကြီးကို မကြာမီအချိန်တွင် ပြန်လည်ဖွင့်လှန်နိုင်ရန် ကြိုးပမ်းနေသည်ဟု စစ်ကောင်စီက ပြီးခဲ့သော ဇူလိုင် ၇ ရက်နေ့တွင် သတင်းထုတ်ပြန်ထားသည်။