သျှမ်းပြည် လားရှိုးမြို့တွင် တရုတ်ကိုယ်စားလှယ်များ ကြားဝင်မှုဖြင့် စစ်ကောင်စီနှင့် ကိုးကန့်တပ်ဖွဲ့ MNDAA တို့ တွေ့ဆုံဆွေးနွေးခဲ့သော်လည်း အောင်မြင်မှုမရဘဲ ပြီးဆုံးသွားခဲ့ကြောင်း စုံစမ်းသိရသည်။

ဇူလိုင်လ ပထမပတ်အတွင်း စစ်ကောင်စီပြန်လည်ထိန်းချုပ်ထားနိုင်သည့် လားရှိုးမြို့ပေါ်ရှိ ဆင်နှစ်ကောင်ဟိုတယ်တွင် တရုတ်ကိုယ်စားလှယ် ကြားဝင်မှုဖြင့် စစ်ကောင်စီနှင့် ကိုးကန့်တပ်ဖွဲ့ MNDAA ကိုယ်စားလှယ်များ ထပ်မံတွေ့ဆုံပြီး ကိုးကန့်တပ်ဖွဲ့များ သိန္နီမြို့မှ ဆုတ်ခွာရေး ဆွေးနွေးညှိနှိုင်းခဲ့သော်လည်း အောင်မြင်မှုမရဘဲ ပြီးဆုံးသွားခဲ့ကြောင်း စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

“သိန္နီပြန်ပေးဖို့ ကိစ္စနဲ့ အဓိကတော့ သူတို့ရဲ့ စီးပွားရေးအကြောင်း ပြောတာပါပဲ။ သူတို့ဆွေးနွေးမှု ရလဒ်မထွက်ဘူးလို့ သတင်းကြားတော့ ပြည်သူကတော့ စိုးရိမ်ထိတ်လန့်တာပေါ့၊ လောလောဆယ် လားရှိုးမြို့ကြီး ဘာမှတော့ မဖြစ်သေးဘူး အေးဆေးပါပဲ။ သတင်းတော့ အမျိုးမျိုး ထွက်နေတာပဲ”ဟု လားရှိုးမြို့မှ စစ်ရေးသတင်းရင်းမြစ်က ပြောသည်။

အဆိုပါ တွေ့ဆုံဆွေးနွေးမှုအတွင်း တရုတ်-မြန်မာ စီးပွားရေးစင်္ကြံထဲ ပါဝင်သည့် မန္တလေး-လားရှိုး-မူဆယ် ကုန်သွယ်မှုလမ်းကြောင်း အမြန်စတင်နိုင်ရန်အတွက် သိန္နီမြို့မှ ကိုးကန့်တပ်များ ဆုတ်ခွာပေးရန် စစ်ကောင်စီဘက်မှ ထပ်မံတောင်းဆိုခဲ့ရာ MNDAA ဘက်မှ လက်မခံဘဲ ဆွေးနွေးမှုမအောင်မြင်ခဲ့ကြောင်း ၎င်းစစ်ရေးသတင်းရင်းမြစ်က ပြောဆိုသည်။

လက်ရှိတွင် လားရှိုးမြို့ပေါ် ပြန်လည်တပ်စွဲထားသည့် စစ်ကောင်စီတပ်များလည်း လက်နက်ကြီးများကို ပေါ်ပေါ်ထင်ထင် နေရာချ တပ်ဆင်ထားပြီး စစ်အင်အား ထပ်မံဖြည့်တင်းနေသည့်အပြင် ကိုးကန့်တပ်ဖွဲ့ MNDAA တပ်သားများ မြို့ပေါ်သို့ ဝင်ထွက်သွားလာခြင်းကို ကန့်သတ်ရန် လုပ်ဆောင်လာခြင်းကြောင့် နှစ်ဘက်တပ်ဖွဲ့ စစ်ရေးတင်းမာနေကြောင်း သိရသည်။

“စစ်တပ်လည်း လက်နက်ကြီးတွေ ပေါ်တင်ကြီး ထောင်ထားတယ်။ မြို့အဝင်အထွက်လည်း အရမ်းစစ်တယ်၊ ဖုန်းတွေကော စစ်တာ။ စစ်တပ်ဘက်က မူးယစ်အဖွဲ့တွေ စစ်တာ။ မယ်ဟန်ဘက်ထွက်ရင် လားရှိုးမြို့မှ ကြိုဆိုပါ၏ ဆိုင်းဘုတ်နား၊ ဟိုပိတ်ဘက်ထွက်ရင် ရေပူစမ်း လမ်းခွဲနားမှာ ဂိတ်ချထားတာ”ဟု လားရှိုးမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ယမန်နေ့ (ဇူလိုင်လ ၈ ရက်) တွင် MNDAA ထိန်းချုပ်ထားသည့် လားရှိုးမြို့အထွက် ဟိုပိတ်ကျေးရွာတွင် မြို့သိမ်းတိုက်ပွဲအတွင်း ထိခိုက်ပျက်စီးခဲ့သည့် နေအိမ်များကို ကိုးကန့်တပ်မှ တရုတ်ယွမ်ငွေ တစ်ထောင်မှ သုံးထောင်ကြား (မြန်မာကျပ်ငွေ ကာလပေါက်ဈေး ၆ သိန်းမှ ၂၀ သိန်းကြား) လျော်ကြေးငွေ ပေးအပ်ခဲ့ကြောင်း ဒေသခံများထံမှ သိရသည်။

တရုတ်၏ ဖိအားပေးမှုကြောင့် ပြီးခဲ့သည့် ဧပြီလ ၂၂ ရက်တွင် လားရှိုးမြို့ပေါ်မှ MNDAA တပ်များ ဆုတ်ခွာပေးခဲ့ရသော်လည်း လားရှိုးမြို့နှင့် ၄ မိုင်အကွာအဝေးတွင် ဆက်လက်တပ်စွဲထားပြီး မြို့ပေါ်ရပ်ကွက် (၁၂) ခုကို စစ်ကောင်စီမှ ပြန်လည်အုပ်ချုပ်ခဲ့သည်။

အလားတူ သိန္နီမြို့ကို တစ်နှစ်ခွဲကျော် ထိန်းချုပ်ထားသည့် ကိုးကန့်တပ်ဖွဲ့ MNDAA သည် လာမည့် စက်တင်ဘာလအတွင်း ထပ်မံတပ်ဆုတ်ရမည်ဟု ပြီးခဲ့သည့် ဇွန်လဆန်းပိုင်းမှ စတင်၍ ကျယ်ကျယ်ပြန့်ပြန့် သတင်းထွက်ပေါ်ခဲ့သော်လည်း ပညာရေး၊ ကျန်းမာရေးနှင့် လမ်းပန်းဆက်သွယ်ရေးကဲ့သို့ ပြန်လည်ထူထောင်ရေးလုပ်ငန်းများ အရှိန်မပျက် ဆက်လက်လုပ်ဆောင်နေကြောင်း ဒေသခံများက ပြောသည်။

ပုံစာ – ဇွန်လအတွင်း လားရှိုးမြို့ပေါ်သို့ စစ်ကောင်စီတပ် အင်အားဖြည့်တင်းလာစဉ်