ထိုင်း-မြန်မာနယ်စပ် ကြားရှိ မယ်ဆိုင်ချောင်းရေသည် လာမည့် ၁၂ နာရီအတွင်း တာချီလိတ်မြို့၏ စိုးရိမ်ရေမှတ် အထက်သို့ ကျော်လွန်ရောက်ရှိနိုင်သဖြင့် ကြိုတင်ရွှေ့ပြောင်းနေထိုင်ရန် မိုးလေဝသနှင့် ဇလဗေဒညွန်ကြားမှု ဦးစီးဌာနက ထုတ်ပြန်ထားသည်။
ယနေ့ (ဇူလိုင် ၄ )ရက် နံနက်ပိုင်း ၉ နာရီခွဲအချိန်တွင် မယ်ဆိုင်ချောင်းရေ မြင့်တက်လာသဖြင့် တာချီလိတ်မြို့ပေါ် တာလော့ ရပ်ကွက်၊ ပုန်းထွန် ရပ်ကွက်၊ မကာဟိုခမ်း ရပ်ကွက်၊ ဆန်ဆိုင်း (က) ရပ်ကွက်နှင့် ဆန်ဆိုင်း (ခ) ရပ်ကွက်တို့ရှိ လမ်းပေါ်နှင့် နေအိမ်များအတွင်း ရေများလျှံတက်နေခြင်း ဖြစ်သည်။
“နံနက်အစောပိုင်းတုန်းကတော့ မြို့ပေါ်မှာ ရေမရောက်သေးဘူး၊ အခုမြို့ထဲမှာ ရေတွေတောက် လျှောက်တက်နေတယ်။ ကားတွေလည်း သွားလာလို့ မရတော့ဘူး” ဟု တာချီလိတ်မြို့ဒေသခံ အမျိုးသားတစ်ဦးက ပြောသည်။
ထိုကြောင့် တာချီလိတ်မြို့နယ်အတွင်းရှိ မြစ်ကမ်းအနီးနှင့် မြေနိမ့်ပိုင်းနေထိုင်သူများအနေဖြင့် ကြိုတင်သတိပြု နိုင်ပါရန်နှင့် မြစ်ရေမြင့်တက်လာပါက အချိန်မီရှောင်ရှားနိုင်ပါရန် ဒေသအာဏာပိုင်များက အသိပေးထားကြောင်း ဆိုသည်။
ယခုနှစ်အတွင်း မုတ်သုံအဝင် မိုးဦးအစမှာပင် မိုးအဆက်မပြတ်ရွာသွန်းမှုကြောင့် တာချီလိတ်မြို့၌ ရေကြီးရေလျှံမှု သုံးကြိမ်ထက်မနည်း ဖြစ်ပေါ်ခဲ့ပြီ ဖြစ်ကြောင်း သိရသည်။
ပင်လယ်ရေ မျက်နှာပြင် အမြင့်ပေ ၁,၂၀၀ ကျော်တွင်ရှိသော တာချီလိတ်မြို့တွင် မကြာခဏ ရေလွှမ်းမိုးခံရ လေ့ရှိသော်လည်း ယခုနောက်ပိုင်းတွင် မယ်ဆိုင်ချောင်းအထက်ပိုင်း၌ ရွှေတူးဖော်မှုများကြောင့် ပိုဆိုးရွားလာကြောင်း ဒေသခံများက ပြောသည်။
ပြီးခဲ့သည့် ဇွန်လ (၅) ရက်တွင် ထိုင်းနိုင်ငံ ချင်းရိုင်းခရိုင် နမ့်ခုတ်မြစ်အနီး ထိုင်းဒေသခံ ထောင်နှင့်ချီ စုစည်း၍ မြေရှားသတ္တုနှင့် ရွှေတူးဖော်မှုကြောင့် နမ့်ခုတ်မြစ်ရေ အဆိပ်သင့်သည့် ကိစ္စကို ထိုင်းအစိုးရမှ အမြန်ဆုံး ညှိနှိုင်းဖြေရှင်းပေးရန် ဆန္ဒထုတ်ဖော်ခဲ့ကြသည်။
မြန်မာဘက်ခြမ်းရှိ မြေရှားသတ္တုနှင့် ရွှေတူးဖော်မှုများမှ ခဲနှင့် အာဆင်းနစ် ကဲ့သို့ ဓာတုပစ္စည်းများကို နမ့်ခုတ်မြစ်နှင့် မယ်ဆိုင်ချောင်းထဲသို့ စွန့်ထုတ်နေခြင်းကြောင့် ထိုင်းဘက်ခြမ်းရှိ ချင်းမိုင်၊ ချင်းရိုင်းခရိုင်တို့တွင် ဂေဟစနစ် ပျက်ယွင်းခြင်း၊ နှစ်နိုင်ငံစလုံးမှ ဒေသခံများ ကျန်းမာရေးစိုးရိမ်မှု အန္တရာယ် ရင်ဆိုင်နေရခြင်း စသည့် ပြဿနာများ ရင်ဆိုင်နေခြင်း ဖြစ်သည်။
အဆိုပါ ပြဿနာနှင့် ပတ်သက်၍ ဇူလိုင် ၂ ရက်မှ ၄ ရက်အထိ ထိုင်းနိုင်ငံ ချင်းမိုင်မြို့တွင် ထိုင်း-မြန်မာ ဒေသဆိုင်ရာ နယ်ခြားကော်မတီအစည်းအဝေး (RBC) ကျင်းပခဲ့ပြီး စစ်ကောင်စီကိုယ်စားလှယ်များ တက်ရောက်ကာ ထိုင်း-မြန်မာနယ်စပ် ပြဿနာများအား ပူးပေါင်းအဖြေရှာရေး ဆွေးနွေးခဲ့ကြောင်း သိရသည်။
Leave a Comments