ထိုင်းနိုင်ငံ ချင်းမိုင်မြို့တွင် ထိုင်း-မြန်မာ ဒေသဆိုင်ရာ နယ်ခြားကော်မတီ အစည်းအဝေး (RBC) ကျင်းပလျက်ရှိပြီး စစ်ကောင်စီကိုယ်စားလှယ်များ တက်ရောက်နေကြောင်း သတင်းသိရသည်။

ဇူလိုင်လ ၂ ရက်မှ ၄ ရက်နေ့အထိ ထိုင်းနိုင်ငံ ချင်းမိုင်မြို့တွင် သုံးရက်တာ ကျင်းပပြုလုပ်နေသည့် (၃၇) ကြိမ်မြောက် ထိုင်း-မြန်မာ ဒေသဆိုင်ရာ နယ်ခြားကော်မတီ အစည်းအဝေးသို့ ထိုင်းဘုရင့်တပ်မတော် အမှတ် (၃) စစ်ဒေသကိုယ်စားလှယ်များနှင့်အတူ စစ်ကောင်စီဘက်မှ အမှတ် (၄) အထူးစစ်ဆင်ရေး အဖွဲ့မှူး ဒုတိယဗိုလ်ချုပ်ကြီး ညွန့်ဝင်းရွှေ ဦးဆောင်တက်ရောက်နေသည်။

အဆိုပါ ဒေသဆိုင်ရာ နယ်ခြားကော်မတီ အစည်းအဝေး (RBC) တွင် နယ်စပ်လုံခြုံရေး၊ အွန်လိုင်းကျားဖြန့် ပြဿနာနှင့် နမ့်ခုတ်မြစ်၊ မယ်ဆိုင်ချောင်းတို့တွင် အဆိပ်သင့် ဓာတုပစ္စည်းများ ပျော်ဝင်နေမှု ပြဿနာတို့ကို ပူးပေါင်းအဖြေရှာရေး ဆွေးနွေးနေကြောင်း ထိုင်းသတင်းများတွင် ဖော်ပြသည်။

မြန်မာဘက်ခြမ်းရှိ မြေရှားသတ္တုနှင့် ရွှေတူးဖော်မှုများမှ ခဲနှင့် အာဆင်းနစ် ကဲ့သို့ ဓာတုပစ္စည်းများကို နမ့်ခုတ်မြစ်နှင့် မယ်ဆိုင်ချောင်းထဲသို့ စွန့်ထုတ်နေခြင်းကြောင့် ထိုင်းဘက်ခြမ်းရှိ ချင်းမိုင်၊ ချင်းရိုင်းခရိုင်တို့တွင် ဂေဟစနစ် ပျက်ယွင်းခြင်း၊ နှစ်နိုင်ငံစလုံးမှ ဒေသခံများ ကျန်းမာရေးစိုးရိမ်မှု အန္တရာယ် ရင်ဆိုင်နေရခြင်း၊ နိုင်ငံဖြတ်ကျော် အွန်လိုင်းငွေလိမ်ဂိုဏ်း ဖမ်းဆီးရေးတို့ကို ထိုင်းဘုရင့်တပ်မတော် အမှတ်(၃) စစ်တိုင်းမှူး Lt. Gen. Kittipong Chaesuwan မှ အဖွင့်အမှာစကား ပြောကြားရာတွင် ထည့်သွင်းပြောဆိုခဲ့သည်။

လက်ရှိ ကျင်းပနေသည့် ဒေသဆိုင်ရာ နယ်ခြားကော်မတီ အစည်းအဝေးသည် လုံခြုံရေးနှင့် ရေရှည်ပူးပေါင်းဆောင်ရွက်ရေးအတွက် အရေးပါသည့် ယန္တရားတစ်ခုဖြစ်ပြီး ထိုင်းဘက်မှ အဆိုပြုတင်ပြချက်များကို ထည့်သွင်းစဉ်းစားပြီး အကောင်အထည် ဖော်နိုင်ရန် မြန်မာဘက်မှ သက်ဆိုင်ရာ တာဝန်ရှိသူများထံ ပြန်လည်တင်ပြမည်ဖြစ်ကြောင်း ဆိုသည်။

ပြီးခဲ့သည့် ဇွန်လ (၅) ရက်တွင် ထိုင်းနိုင်ငံ ချင်းရိုင်းခရိုင် နမ့်ခုတ်မြစ်အနီး ထိုင်းဒေသခံ ထောင်နှင့်ချီ စုစည်း၍ မြေရှားသတ္တုနှင့် ရွှေတူးဖော်မှုကြောင့် နမ့်ခုတ်မြစ်ရေ အဆိပ်သင့်သည့် ကိစ္စကို ထိုင်းအစိုးရမှ အမြန်ဆုံး ညှိနှိုင်းဖြေရှင်းပေးရန် ဆန္ဒထုတ်ဖော်ခဲ့ကြသည်။

ထို့အပြင် သျှမ်းပြည်အရှေ့ပိုင်းရှိ စစ်ကောင်စီနှင့် ‘ဝ’တပ်ဖွဲ့ UWSA တို့ ပူးပေါင်းထိန်းချုပ် ဒေသတွင် မြေရှားသတ္တုနှင့် ရွှေတူးဖော်မှုများကြောင့် နမ့်ခုတ်မြစ်ရေ အဆိပ်သင့်သည့် ကိစ္စကို ဖြေရှင်းပေးရန် တောင်းဆိုချက်များကို ထိုင်းနိုင်ငံရှိ တရုတ်နှင့် မြန်မာသံရုံးများသို့ တင်ပြထားကြောင်း သိရသည်။