သျှမ်းပြည်တောင်ပိုင်း၊တောင်ကြီးမြို့ တွင် စစ်ကောင်စီ၏ ပြည်သူ့စစ်မှုထမ်း တသက်သာ ရှောင်ရှားခွင့် ကျပ်သိန်း (၈၀)ထိပေါက်နေကြောင်း သတင်းရရှိသည်။
ပြီးခဲ့သည့် ဇွန်လနောက်ဆုံးပတ်မှ စတင်ပြီး တောင်ကြီးမြို့တွင် အမှတ်(၁၅) ပြည်သူ့စစ်မှုထမ်းအတွက် မဲနှိုက်ခေါ်ယူနေပြီး၊ ပြည်သူ့စစ်မှုထမ်းရန် အလှည့်ကျသူများ စစ်မှုမထမ်းချင်ပါက တသက်သာ ရှောင်ရှားခွင့်ဟုဆိုပြီး ငွေကျပ်(၈၀)ပေးရမည်ဟု စစ်ကောင်စီနှင့် ၎င်းလက်အောက်ခံ ရပ်ကွက်အုပ်ချုပ်ရေးမှူးများက ကောက်ခံနေကြောင်း တောင်ကြီးမြို့ခံများက ပြောသည်။
“ တောင်ကြီး ရပ်ကွက်တိုင်းလိုလို စစ်မှုထမ်းခေါ်နေတာ၊ တကယ်လို့ မသွားချင်ဘူးဆိုရင် တသက်သာရှောင်ရှားခွင့်အနေနဲ့ ကျပ်သိန်း (၈၀)ပေးရမယ်။ တစ်အိမ်မှာ စစ်မှုထမ်းအရွယ် (၃)ဉီးရှိရင်တော့ ကျပ်သိန်း (၂၄၀)ပေးရမှာ။ တသက်စာဆိုပေမယ့် ယုံလို့မရလောက်ဘူး” ဟု တောင်ကြီးမြို့ ခံ အမျိုးသားတစ်ဉီးက သျှမ်းသံတော်ဆင့်ကိုပြောသည်။
လက်ရှိ စစ်ကောင်စီ၏ ပြည်သူ့စစ်မှုထမ်းကင်းလွတ်ခွင့် ရရှိမည့်သူများသည် ကျောင်းတက်နေသူများ၊ အစိုးရဝန်ထမ်းများ၊ သာသနာ့ ဘောင်အတွင်း ဝင်ရောက်နေသူများဖြစ်ပြီး၊ ထိုသူများသည် စစ်မှုထမ်းအတွက် မဲနှိုက်စရာမလိုသည့်အပြင် လစဉ်ငွေများလည်း မထည့်ရကြောင်း ၎င်းက ပြောသည်။
ထို့အပြင် ပြီးခဲ့သည့် ဇွန်လ (၂၀)ရက်နေ့တွင်လည်း စဝ်စံထွန်းရပ်ကွက် ကရင်မရေထွက် နယ်မြေ ၁၆ တွင် စစ်ကောင်စီလက်အောက်ခံ ရဲနှင့် အုပ်ချုပ်ရေးမှူး တို့က ဧည့်စာရင်းစစ်မည်ဟုဆို၍ လူငယ် (၁၀) ဦးကို ဖမ်းဆီးခေါ်ဆောင် သွားခဲ့ကြောင်း ဖြစ်စဉ်သိရှိသူ အသက် ၄၀ကျော်အရွယ်ရှိ အမျိုးသားတစ်ဦးက ပြောသည်။
“ကျနော့်ရဲ့ ညီ အပါအဝင် (၁၀)ယောက်ကို ဧည့်စာရင်းစစ်မယ်ဆိုပြီး ဖမ်းသွားတာ။အုပ်ချုပ်ရေးမှူးရုံးကို သွားမေးတော့လည်း မသိဘူးပြောတယ်။အောင်ပန်းကို စစ်ဆေးဖို့ခေါ်သွားတာလားမသိဘူး။ ကျနော့်ညီနဲ့ နောက်ဆုံးဖုန်းပြောတုန်းက လူစားထည့်ခံရတာလို့ ပြောသွားတာ ခုထိဘာအဆက်သွယ်မှ မရတော့ဘူး။”ဟု ၎င်းအမျိုးသားက ဆိုသည်။
အဆိုပါ ဖမ်းဆီးခံရသည့် လူငယ်များမှာ အသက်(၂၀)ကျော်ဝန်းကျင်သာရှိသေးကြောင်းနှင့် ဖမ်းဆီးခံရသူများကို စစ်မှုထမ်းရန် ခေါ်ဆောင်ခံရကြောင်း ဆက်ပြောသည်။
ထို့ပြင် ဟိုပုံးမြို့နယ် လွယ်အွန်းရွာ၊ လုံးတာရွာနှင့် သာယာကုန်းရွာဘက်တွင်လည်း စစ်မှုထမ်းရန်အတွက် ငွေကောက်ခံနေပြီး တစ်သက်စာ စစ်မှုထမ်းရှောင်ရှားရန် ငွေကျပ် သိန်း(၈၀) ကောက်ခံနေကြောင်း ဟိုပုံးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“စစ်မှုထမ်းပါလို့ မသွားဘူးဆိုရင် တစ်သက်စာ ရှောင်ရှားခွင့် သိန်း(၈၀)ပေးရမယ်လို့ပြောတာ။ တစ်ရွာလုံးကိုယ်စား လူနှစ်ယောက်က စစ်မှုသွားထမ်းရင် သူတို့အတွက် တစ်ရွာလုံးက သိန်း(၁၀၀)ပေးရတယ်။ PNOအတွက် လူငယ်တစ်ယောက်ကို တစ်နှစ်စာ ကျပ် ငါးသိန်းပေးရတယ်။ ခုလိုပေးနေရတာ (၂)နှစ်ရှိပြီ”ဟု ၎င်းအမျိုးသားက ပြောသည်။
ထိုကဲ့သို့ စစ်မှုထမ်းအတွက် ငွေပေးနေရသည်မှာ ပြည်သူများအတွက် စားဝတ်နေရေး အဆင်မပြေမှု ဖြစ်နေကြောင်းနှင့် နေမကောင်းလျှင် ဆေးကုရန်ထက် စစ်မှုထမ်းကြေးကို ဦးစားပေးထည့် နေရကြောင်း ဟိုပုံးမြို့တွင်နေထိုင်သူများက ပြောသည်။
ပြီးခဲ့သည့် ဇွန်လ မှစပြီး အမှတ်စဉ် ၁၅ အတွက် စစ်မှုထမ်းများကို သျှမ်းတောင်ရှိ လွိုင်လင်၊ ပင်လုံ၊နမ့်စန်၊ တောင်ကြီး၊ ဟဲဟိုး၊ ရွာငံနှင့် ပင်းတယတို့အပြင် သျှမ်းရှေ့ မိုင်းတုံမြို့တွင်လည်း စစ်မှုထမ်းရန် အတွက် မဲနှိုက်နေရကြောင်းသိရသည်။
Leave a Comments