သျှမ်းပြည် နောင်ချိုမြို့နယ်ကို စစ်ကောင်စီမှ လေကြောင်းဖြင့် ဗုံးကြဲတိုက်ခိုက်ခဲ့သဖြင့် အမျိုးသား ၃ ဦးသေဆုံးပြီး၊ ၁ ဦးထိခိုက်ဒဏ်ရာရှိခဲ့ကြောင်း သတင်းရရှိသည်။
ယမန်နေ့ ( ဇူလိုင်လ ၁ ရက်) ညနေ ၃ နာရီဝန်းကျင်တွင် နောင်ချိုမြို့နယ် သုံးဆယ်ကျေးရွာကို စစ်ကောင်စီက လေကြောင်းဖြင့် ဗုံးအလုံးရေ ၁၁ လုံး ကြဲချတိုက်ခိုက်ခဲ့ပြီး အမျိုးသား ၃ ဦးသေဆုံးခဲ့ပြီး၊ ၁ ဦးထိခိုက်ဒဏ်ရာရရှိခဲ့ကြောင်း ပလောင် (တအာင်း) အမျိုးသားလွတ်မြောက်ရေး တပ်မတော် (TNLA) က ယမန်နေ့တွင် ထုတ်ပြန်ထားသည်။
“မနေ့က (ဇူလိုင် ၂ ရက်)လက်နက်ကြီး၊လက်နက်ငယ်တွေ အသံတွေကြားနေရတာ။ မနေ့က တိုက်ပွဲပြင်းထန်တယ်။ ညနေလောက်မှာတော့ လေကြောင်းတွေနဲ့ကောပစ်တာ။ဗုံးကြဲတာက သုံးဆယ်ရွာထဲကိုကြဲတာ ၃ ယောက်သေတယ်။”ဟု နောင်ချိုမြို့နယ်ဒေသခံအမျိုးသားတစ်ဦးက ပြောသည်။
ထိုဗုံးကြဲတိုက်ခိုက်မှုကြောင့် သုံးဆယ်ကျေးရွာရှိ ပြည်သူနေအိမ် (၂) အိမ် နှင့် ဘုန်းကြီးကျောင်း (၂) ကျောင်းလည်း ထိခိုက်ပျက်စီးသွားခဲ့ကြောင်း သိရသည်။
စစ်ကောင်စီသည် နေပြည်တော်၌ ငြိမ်းချမ်းရေးဖိုရမ် စတင်ကျင်းပနေစဉ် ဇွန်လ ၂၅ ရက်မှ ၂၇ ရက်အတွင်း TNLA ထိန်းချုပ်ထားနိုင်သည့် မိုးကုတ်မြို့နယ်၊ ကျောက်မဲမြို့နယ်နှင့် နောင်ချိုမြို့နယ်တို့ကို လေကြောင်းဖြင့် အကြီးအကျယ် ဗုံးကြဲတိုက်ခိုက်ခဲ့သည်။
Leave a Comments