သျှမ်းပြည် ကျောက်မဲမြို့ပေါ်သို့ စစ်ကောင်စီတပ်မှ ဂျက်ဖိုက်တာဖြင့် ဗုံးကြဲတိုက်ခိုက်ခဲ့ခြင်းကြောင့် အမျိုးသမီး(၃) ဦး အပါအဝင် စုစုပေါင်း (၅) ဦးထက်မနည်း ထိခိုက်ဒဏ်ရာ ရရှိခဲ့ကြောင်း စုံစမ်းသိရသည်။
ယနေ့ (ဇွန်လ ၂၉ ရက်) နေ့လယ် ၂ နာရီခွဲအချိန်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် ကျောက်မဲမြို့ပေါ်သို့ စစ်ကောင်စီတပ်မှ ဂျက်ဖိုက်တာဖြင့် ဗုံး(၂)လုံး ကြဲချတိုက်ခိုက်ခဲ့ရာ ရပ်ကွက်(၁)ရှိ ကမ္ဘောဇသျှမ်းကျောင်းအနီး ကျရောက်ပေါက်ကွဲခဲ့သည်။
အဆိုပါ လေကြောင်းဗုံးကြဲတိုက်ခိုက်မှုကြောင့် အမျိုးသမီး (၃) ဦးနှင့် အမျိုးသား (၂) ဦး၊ စုစုပေါင်း (၅) ဦးထက်မနည်း ထိခိုက်ဒဏ်ရာရရှိခဲ့ပြီး ကမ္ဘောဇသျှမ်းကျောင်းနှင့် အနီးအနားရှိ ပြည်သူနေအိမ် (၁၅) လုံးခန့် ပျက်စီးဆုံးရှုံးသွားကြောင်း ကျောက်မဲဒေသခံများက ပြောသည်။
“ဘုန်းကြီးကျောင်းတောင်ဘက်က ရုံးကို ဗုံးကြဲချင်တာ၊ သျှမ်းကျောင်းကြီးကတော့ သိမ်နဲ့ ဇရပ်ဆောင် တော်တော်များများ ထိတယ်။ ကျောင်းဘေးက တန်းလျားနဲ့ ဖုန်းဆိုင်၊ ဆေးဆိုင်တွေကော အကုန် ရစရာ မရှိတော့ဘူး။ ဒဏ်ရာရတာတော့ ကျား/မ သိရသလောက် ၅ ယောက် ရှိတယ်”ဟု ကျောက်မဲဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
TNLA ထိန်းချုပ်ထားသည့် ကျောက်မဲမြို့ကို စစ်ကောင်စီတပ်မှ တစ်ပတ်အတွင်း လေကြောင်းတိုက်ခိုက်မှု (၃) ကြိမ်တိုင် ပြုလုပ်ခဲ့ပြီး ပြည်သူထိခိုက်သေဆုံးမှုနှင့် အိုးအိမ်ပျက်စီးမှုလည်း မြင့်တက်လျက်ရှိသည်။
ယနေ့ နေ့လယ်ပိုင်းတွင် ကျောက်မဲမြို့၌ ဖြစ်ပွားခဲ့သည့် လေကြောင်းဗုံးကြဲ တိုက်ခိုက်မှုနှင့် ပတ်သက်၍ စစ်ကောင်စီတပ်မှ ဂျက်ဖိုက်တာဖြင့် ပေါင် (၂၅၀) ဗုံး နှစ်လုံး ထပ်မံလာရောက်ကြဲချတိုက်ခိုက်ခဲ့သောကြောင့် အမျိုးသမီး (၂) ဦးနှင့် အမျိုးသား (၄) ဦး ဒဏ်ရာရရှိခဲ့ပြီး နေအိမ်(၁၀) လုံး ထိမှန်ပျက်စီးသွားကြောင်း TNLA သတင်းနှင့် ပြန်ကြားရေးဌာနမှ ထုတ်ပြန်သည်။
အလားတူ ဇွန်လ (၂၄) ရက်နှင့် (၂၆) ရက်တို့တွင် ကျောက်မဲမြို့ပေါ်သို့ စစ်ကောင်စီတပ်မှ လေကြောင်းဖြင့် ဗုံး (၄) လုံး ကြဲချတိုက်ခိုက်ခဲ့ခြင်းကြောင့် အရပ်သား (၅) ဦး သေဆုံး၍ ကလေးငယ် (၂) ဦး အပါအဝင် စုစုပေါင်း (၁၆) ဦး ထိခိုက်ဒဏ်ရာရရှိခဲ့ပြီး ပြည်သူနေအိမ် (၅၀) လုံးကျော်နှင့် စာသင်ကျောင်း (၂) ကျောင်း ထိမှန်ပျက်စီးခဲ့ကြောင်း TNLA ထုတ်ပြန်ချက်ထဲတွင် ပါရှိသည်။
စစ်ကောင်စီသည် နေပြည်တော်၌ ငြိမ်းချမ်းရေးဖိုရမ် စတင်ကျင်းပနေစဉ် ဇွန်လ ၂၅ ရက်မှ ၂၇ ရက်အတွင်း TNLA ထိန်းချုပ်ထားနိုင်သည့် မိုးကုတ်မြို့နယ်၊ ကျောက်မဲမြို့နယ်နှင့် နောင်ချိုမြို့နယ်တို့ကို လေကြောင်းဖြင့် အကြီးအကျယ် ဗုံးကြဲတိုက်ခိုက်ခဲ့သည်။
လက်ရှိတွင် နောင်ချိုမြို့နယ်အတွင်း TNLA ပူးပေါင်းတပ်ဖွဲ့နှင့် စစ်ကောင်စီတပ်တို့ မြေပြင်ထိတွေ့တိုက်ပွဲအပြင် ဒရုန်း၊ လက်နက်ကြီးနှင့် လေကြောင်းတိုက်ခိုက်မှုများကြောင့် နောင်ချိုမြို့ဘက်မှ စစ်ဘေးရှောင် (၂၀၀၀) ကျော်သည် ကျောက်မဲမြို့ပေါ်နှင့် နောင်ပိန်တိုက်နယ်အတွင်း ထွက်ပြေးတိမ်းရှောင်နေရပြီး စားနပ်ရိက္ခာ အကူအညီများ အရေးတကြီး လိုအပ်နေကြောင်း ဒေသခံများထံမှ သိရသည်။
ပုံစာ – ကျောက်မဲမြို့ ကမ္ဘောဇသျှမ်းကျောင်းအနီး လေကြောင်းဗုံးကြဲခံရပြီး ပျက်စီးမှု (ဓာတ်ပုံ – ဒေသခံ)
Leave a Comments