သျှမ်းပြည် ကျောက်မဲမြို့ ပြည်သူ အိမ်မောကျချိန် စစ်ကောင်စီက လေကြောင်းဖြင့် ထပ်မံ ဗုံးကြဲ တိုက်ခိုက်ခဲ့ခြင်းကြောင့် အမျိုးသမီး တစ်ဦးသေဆုံး၊ အရပ်သား နှစ်ဦးဒဏ်ရာရရှိခဲ့ကြောင်း သတင်းရရှိသည်။
ယနေ့ (ဇွန်လ ၂၇ ရက်) မနက် ၁၂ ခွဲကျော် အချိန်တွင် ကျောက်မဲမြို့ ရပ်ကွက် ၇ မြောက်ကုန်းရှိ ဆောက်လုပ်ရေးရုံးကို စစ်ကောင်စီက လေကြောင်းဖြင့် နှစ် ကြိမ် ထပ်မံဗုံးကြဲ တိုက်ခိုက်ခဲ့ခြင်းကြောင့် အမျိုးသမီးတစ်ဦး ၁ သေဆုံးခဲ့ပြီး၊ အရပ်သား နှစ်ဦး ထိခိုက်ဒဏ်ရာရရှိခဲ့ကြောင်း ကျောက်မဲမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ ညသန်ခေါင်ယံချိန်ကြီးဆိုတော့ ချက်ချင်းကြီး ဘယ်သူမှမထွက်ကြည့်ရဲဘူး။ ဗုံးထပ်ကြဲမှာကိုလည်း စိုးရိမ်ကြတာ။ အမျိုးသမီးတစ်ဉီး နဲ့ အရပ်သား နှစ်ဉီး ထိခိုက်သွားတာ။ ထိတဲ့လူတွေကိုတော့ ဆေးရုံ တင်ထားတယ်။ ဆောက်လုပ်ရေးရုံး အနီးအနားမှာလည်း နေတဲ့လူသိပ်မရှိလို့ တော်သေးတယ်။”ဟု ကျောက်မဲမြို့ဒေသခံ အမျိုးသားတစ်ဦးကပြောသည်။
စစ်ကောင်စီသည် နေပြည်တော်တွင် “ငြိမ်းချမ်းရေး ဖိုရမ်” ကျင်းပနေချိန် တအာင်း(ပလောင်) အမျိုးသားလွတ်မြောက်ရေးတပ်မတော် (TNLA ) ထိန်းချုပ်သည့် နယ်မြေများကို လေကြောင်းဖြင့် နေ့စဉ်နဲ့အမျှ ဗုံးကြဲမှုများပြုလုပ်နေသည်။
“ငြိမ်းချမ်းရေး ဖိုရမ်” ဇွန် ၂၅ ရက် အဖွင့်မိန့်ခွန်းတွင်လည်း စစ်အာဏာသိမ်းခေါင်းဆောင် က တိုင်းရင်းသားလက်နက်ကိုင်များ ကို နိုင်ငံရေးနည်းလမ်းဖြင့် အဖြေရှာရန် ဟု ပြောဆိုခဲ့သော်လည်း တဖက်တွင် TNLA ထိန်းချုပ်သည့်နယ်မြေများကို လေကြောင်းဖြင့် ဗုံးကြဲတိုက်ခိုက်နေသည်။
လက်ရှိ TNLA ထိန်းချုပ်နယ်မြေအတွင်းနေထိုင်သည့် အရပ်သားများသည် စစ်ကောင်စီ၏ အချိန်မတော် လေကြောင်းဗုံးကြဲမှုကို စိုးရိမ်နေရကြောင်း၊ ထို့အပြင် ထွက်ပြေးတိမ်းရှောင်ရန်လည်း ခက်ခဲမှုများရှိနေကြောင်း လည်း သျှမ်းသံတော်ဆင့်ကို ပြောသည်။
“လေကြောင်းဗုံးကြဲမှုက ဘယ်ချိန်ဖြစ်မယ်ဆိုတာမသိဘူး။ များသောအားဖြင့် ညမှ ဖြစ်တော့ ကျမတို့လည်း စိုးရိမ်နေရတာပေါ့။ တိုက်ပွဲပြန်ငြိမ်လို့ ပြန်လာတော့ ထပ်ဖြစ် ဘယ်ကို ပြေးရမယ်မှန်းတောင် မသိတော့ဘူး” ဟု ကျောက်မဲမြို့ ဒေသခံအမျိုးသမီး တစ်ဉီး ကပြောသည်။
ထို့အပြင် ပြီးခဲ့သည့် (ဇွန်လ ၂၄ ရက်) ကျောက်မဲမြို့ပေါ်ရှိ လူစည်ကားရာဖြစ်သည့် စံပြထမင်းဆိုင်ကို စစ်ကောင်စီက လေကြောင်းဖြင့် ဗုံးကြဲတိုက်ခိုက်ခဲ့ပြီး အရပ်သား ၄ ဦး သေဆုံးကာ၊ အရပ်သား ၁၄ ဦး ဒဏ်ရာရရှိခဲ့သည်။
ယခုရက်ပိုင်း စစ်ကောင်စီက လေကြောင်းဖြင့် အကြီးအကျယ် ဗုံးကြဲတိုက်ခိုက်သည့်နေရာများမှာ “၁၀၂၇ စစ်ဆင်ရေး” ဒုတိယလှိုင်း တွင် TNLA ထိန်းချုပ်နိုင်ခဲ့သည့် မိုးကုတ်မြို့၊ ကျောက်မဲမြို့၊ နောင်ချိုမြို့နယ်တို့ ဖြစ်သည်။
Leave a Comments