သျှမ်းပြည် ကျောက်မဲမြို့ပေါ် လူစည်းကားသည့် နေရာကို စစ်ကောင်စီက ဉီးတည်ပြီး လေကြောင်းဗုံးကြဲ တိုက်ခိုက်ခဲ့သဖြင့် အရပ်သား သေဆုံးသူ ၄ ဦး နှင့် ဒဏ်ရာရရှိသူ ၁၄ ဦးအထိ ရှိနေကြောင်း စုံစမ်းသိရသည်။

ယမန်နေ့ ( ဇွန်လ ၂၄ ရက်) ညနေ ၅ နာရီဝန်းကျင်တွင် ကျောက်မဲမြို့ပေါ်ရှိ စံပြထမင်းဆိုင် နှင့် ရပ်ကွက် (၃) ရှိ လှိုင်ဆေးရုံ အနီးကို စစ်ကောင်စီက လေကြောင်းဖြင့် နှစ် ကြိမ်ဗုံးကြဲတိုက်ခိုက်ခဲ့ပြီး အရပ်သား ၄ ဦး သေဆုံးကာ၊ ၁၄ ဦး ဒဏ်ရာရရှိခဲ့ကြောင်း ကျောက်မဲမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“မနေ့ (ဇွန်လ ၂၅) ညနေမှာ လေယောဉ်နဲ့ ၂ ကြိမ်ဗုံးကြဲသွားတာ။ ကြံခိုင်ရေးရုံး‌ရှေ့က ထမင်းဆိုင်ကို ဗုံးကျတာ။ဆိုင်ရှင် မိသားစုဝင် ၃ ယောက်နဲ့ နောင်ချိုစစ်ဘေးရှာင် ၁ ယောက်သေသွားတာ။ဒဏ်ရာရတဲ့ လူက ၁၄ ယောက်အထိရှိတယ်။အဲ့နားတဝိုက်က လူများတယ်လေ။ရပ်ကွက်(၃) မှာ ဗုံးကြဲသွားတာ ကတော့ ထိခိုက်မှုမရှိပါဘူး။”ဟု ကျောက်မဲဒေသခံ အမျိုးသားတစ်ဦးက ပြောသည်။

ထိုစစ်ကောင်စီ၏ လေကြောင်းဗုံးကြဲတိုက်ခိုက်မှုကြောင့် အသက် ၅၀ ဝန်းကျင် အမျိုးသမီး နှစ်ဦး ၊ အသက် ၂၅ ဝန်းကျင် အမျိုးသားတစ်ဦး နှင့် နောင်ချိုမြို့ စစ်ဘေးရှောင်တစ်ဦး ဖြစ်ကြောင်း ၎င်းကပြောသည်။

စစ်ကောင်စီမှ တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ် ထားသည့် ကျောင်းမဲမြို့ပေါ်ရှိ လူစည်ကားရာနေရာကို ဦးတည်၍ လေကြောင်း‌ဗုံးကြဲ တိုက်ခိုက်မှုများ ပြုလုပ်နေခြင်းကြောင့် ဒေသခံများအတွက် စိုးရိမ်နေရကြောင်း ကျောက်မဲဒေသခံ လူငယ် တစ်ဦးက ဆက်ပြောသည်။

“ရပ်ကွက် (၃) မှာဆိုရင် လှိုင်ဆေးရုံရှိတယ်လေ လူနာတွေကအဲ့မှာသွားကုကြတာ။သူတို့က လှိုင်ဆေးရုံကို ဦးတည်ပြီး ဗုံးကြဲချင်တာနေမှာ‌ တော်သေးလို့ သူများအိမ်ကြားထဲ ကြတာ ထိခိုက်မှု မရှိဘူး။လူများတဲ့နေရာကို ဦးတည်ပြီးတော့ ဗုံးကြဲနေတာ။မြို့ထဲမှာရှိနေတဲ့ လူတွေ ကလည်း မတက်နိုင်လို့သာ နေနေကြတာ။တိုက်ပွဲတွေ ဖြစ်ပြီးကတည်းကနေ အချိန်ထိ ငြိမ်ချမ်းမှုတွေ မရှိဘူးလေ။ဆက်ပြီးဗုံးကြဲမှာကိုတော့ စိုးရိမ်နေကြရတာပေါ့။”ဟု ၎င်းကပြောသည်။

နောင်ချိုမြို့နယ်တွင် စစ်ကောင်စီ နှင့် TNLA တိုက်ပွဲများကြောင့် ဒေသခံအချို့ ကျောက်မဲမြို့နယ်အတွင်း သို့ ထွက်ပြေးတိမ်းရှောင်လာကြပြီး၊လက်ရှိ ကျောင်းမဲမြို့နယ်တွင် နောင်ချိုမြို့ စစ်ဘေးရှောင် (၇၀၀) ဝန်းကျင်လောက်ရှိနေကြောင်း သိရသည်။

ပြီးခဲ့သည့် မေလ လဆန်းပိုင်းတွင် ပြုလုပ်ခဲ့သည့် တရုတ်နိုင်ငံ ကူမင်းဆွေးနွေးပွဲ ပျက်ပြီးနောက် စစ်ကောင်စီတပ်က TNLAထိန်းချုပ်ထားသည့် ကျောက်မဲ၊မန်တုံ၊မိုးကုတ်နှင့် မိုင်းငေါ့ စသည့်နေရာတို့ကို လေကြောင်းဖြင့် ဗုံးကြဲတိုက်ခိုက်ခြင်းများ ပြုလုပ်နေပြီး အရပ်သားသေဆုံးမှုများလည်း ရှိနေသည်ဟု သိရသည်။