သျှမ်းပြည်တောင်ပိုင်း ညောင်ရွှေမြို့နယ် စံကားအင်းဒေသတွင် ပအိုဝ်းပြည်သူ့စစ် (PNO) များက စံကားအင်း အနောက်ကမ်းရှိ သာယာကုန်းကျေးရွာနှင့် အနီးအနားကျေးရွာများကို စက်လှေဖြတ်သန်းခွင့် မပေးတော့ကြောင်း ဒေသခံများက သျှမ်းသံတော်ဆင့်သို့ ပြောသည်။
သာယာကုန်းရွာဘက်မှ စံကားဘက်သို့ ပြီးခဲ့သည့် ဇွန်လ (၁)ရက်နေ့မှ ယနေ့အထိ ပအိုဝ်းပြည်သူ့စစ် (PNO) မှ စက်လှေ ဖြတ်သန်းခွင့် ပိတ်ထားပြီး ငါးဖမ်းခွင့်လည်း ပိတ်ပင်လိုက်သည့်အတွက် ဒေသခံများ ဝမ်းရေးအခက်အခဲ ကြုံတွေ့နေကြရကြောင်း ဒေသခံများက ပြောဆိုသည်။
ပအိုဝ်းပြည်သူ့စစ် (PNO) မှ စက်လှေဖြတ်သန်းခွင့် ပိတ်ပင်လိုက်ခြင်းကြောင့် အရေးပေါ်လူနာများအားလည်း တောင်ကြီးဆေးရုံသို့ အချိန်မီ ပို့ဆောင်ရန် အခက်အခဲ ကြုံတွေ့နေကြရကြောင်း ဒေသခံ အမျိုးသားတစ်ဦးက သျှမ်းသံတော်ဆင့်အား ဤကဲ့သို့ ပြောသည်။
“သူတို့က ဇွန် ၁ ရက်ကနေ ၁၅ ရက်နေ့အထိပဲ ပိတ်မယ်လို့ပြောတာ၊ ဒါပေမယ့် အခုထိ ပိတ်ထားတုန်းပဲ။ ငါးရှာမယ်ဆိုလည်း သူတို့က ပေးမရှာဘူး။ အရေးပေါ်လူနာဆိုရင် တအားခက်တာ” ဟု ပြောသည်။
စက်လှေများ သွားလာခွင့်အား PNO ပိတ်ထားသောကြောင့် စံကားအင်းအနောက်ဘက်ခြမ်းနေ ဒေသခံများသည် နန်းပန်နှင့် နောင်တရားဘက်သို့သာ အဓိက အားထား သွားလာနေကြရသည်ဟုလည်း ၎င်းက ဆက်ပြောသည်။
ထို့အပြင် စံကား အနောက်ဘက်ကမ်းတွင် တပ်လာစွဲထားသည့် PNO ပြည်သူ့စစ် တပ်ဖွဲ့ဝင်များသည် ပြည်သူများ၏ လွတ်လပ်စွာ ခရီးသွားလာခွင့်ကို ပိတ်ပင်ထားသည့်အပြင် ၄င်းတို့အတွက် ထမင်းထုပ်လည်း တစ်နေ့ တစ်နပ် ရွာသားများမှ ချက်ပြုတ်ပို့ဆောင်ပေးနေရသည်ဟု ဆိုသည်။
“အဲ့ဒီ PNO ပြည်သူ့စစ်အဖွဲ့ကို ထမင်းပို့နေရတာ ၄ လလောက်ရှိပြီ၊ မနက် ၁၀ နာရီဆို ပို့ရပြီ။ ညနေဘက်တော့ သူ့တို့ ကိုယ့်ဟာကိုယ် ချက်စားကြတာထင်တယ်” ဟု စံကားဒေသခံ အမျိုးသမီးတစ်ဦးက ပြောသည်။
ယခုလက်ရှိ စံကားဒေသဘက်တွင် ရေမြင့်တက်လာမှုကြောင့် ဒေသခံများစိုက်ပျိုးထားသည့် စပါးခင်းများ၊ ခရမ်းချဉ်ခင်းများနှင့် ပြောင်းခင်းများ ရေနစ်ပျက်စီး ဆုံးရှုံးသွားသောကြောင့် ဝမ်းရေးဖြေရှင်းရန်ပင် နေ့စဉ်နှင့်အမျှ ခက်ခဲလာနေသည်ဟုလည်း အဆိုပါ အမျိုးသမီးတစ်ဦးက ပြောသည်။
“သာယာကုန်းရွာဘက်တော့ လယ်တွေ ရေမြုပ်ကုန်တာ ဧက ဆယ်ချီ ရှိတယ်။ ကျမ ပြောင်းခင်းဆို ၁၀ ဧက ကျော် မြုပ်သွားတာ၊ ဒီတိုင်းပဲ ထားလိုက်ရတယ်။ စစ်ပွဲအမြန်ပြီးချင်ပြီ၊ ဒါမှ လုပ်စားကိုင်စားလို့ လွယ်မှာလေ” ဟု ၎င်းအမျိုးသမီးက ပြောဆိုသည်။
ပအိုဝ်းအမျိုးသားအဖွဲ့ချုပ် ခေါ် PNO ပြည်သူ့စစ်အဖွဲ့ကို သျှမ်းပြည်တောင်ပိုင်း ဟိုပုံး၊ ဆီဆိုင်နှင့် ပင်လောင်းမြို့နယ်တို့အား စစ်ကောင်စီက ထိန်းချုပ်ခွင့်ပြုထားပြီး အာဏာသိမ်း စစ်ကောင်စီတပ်နှင့် ပူးပေါင်း၍ တောင်ကြီးခရိုင်အတွင်း လှုပ်ရှားနေသည့် တော်လှန်ရေးအင်အားစုများနှင့်လည်း တိုက်ပွဲ ဖြစ်ပွားနေသည့် ပြည်သူ့စစ်အဖွဲ့လည်းဖြစ်သည်။
Leave a Comments