သျှမ်းပြည်တောင်ပိုင်း၊ ဆီဆိုင်မြို့နယ်ရှိ ကျေးရွာအုပ်စုနှစ်ခုကို PNO ပြည်သူ့စစ်မှ ပြောင်းရွှေ့ခိုင်းထားသည့် ဒေသခံ ၆ထောင်ကျော် စိုက်ပျိုးရေး အခက်ကြုံနေကြောင်း စုံစမ်းသိရသည်။

ပြီးခဲ့သည့် ဇွန်လ (၆)ရက်နေ့မှ စ၍ ဇွန်လ (၁၅)ရက်အတွင်း ဆီဆိုင်မြို့နယ် ကျေးရွာအုပ်စု ၂စုမှ ဒေသခံ ၆ထောင်ကျော်ကို PNO ပြည်သူ့စစ်မှ ပြောင်းရွှေ့ရန် စာ ထုတ်ပြန်ခဲ့သည်။

လက်ရှိ အချိန်သည် စိုက်ပျိုးရေးအချိန်ဖြစ်သဖြင့် အချို့ဒေသခံများသည် ပြောင်းခင်းများ ပေါင်းရှင်းရန် ပြုလုပ်ရမည်ဖြစ်သောကြောင့် PNO ကိုတောင်းပန်ပြီး နေထိုင်နေရကြောင်း ဒေသခံများက ပြောသည်။

“စစ်တပ်နဲ့ PNOက ထိုးစစ်ဆင်မယ်ဆိုပြီး ဖယ်ခိုင်းထားတာ၊ တချို့ရွာတွေကျတော့ ပြောင်းခင်းတို့ ပေါင်းရှင်းဖို့လိုတော့ သူတို့ကို တောင်းပန်ပြီး နေကြရတယ်။ တချို့ကျတော့လည်း ဘုရားဖြူရွာက ဓမ္မာရုံကြီးနားကို ပြောင်းပြီး လာနေကြပြီ။ စိုက်ပျိုးရာသီမှာ ရွာခံတွေကို ဖယ်ခိုင်းတာ တော်တော်အဆင်မပြေဘူး။ ဒီသီးနှံတွေကို အားပြုပြီး လုပ်စားနေကြတာ” ဟု ဆီဆိုင်ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ပြောင်းရွှေ့ခိုင်းသည့် ကျေးရွာများမှာ ဆီဆိုင်မြို့နယ် နောင်ကျောကျေးရွာအုပ်စုမှ တပူးထိုရွာ၊ ကောင်ထိုရွာ၊ လွယ်ငွန်းရွာ၊ နောင်ဗိုရွာ၊ ပင်စက်ရွာနှင့် တောင်ရှေ့ ကျေးရွာ အုပ်စုတွင် နောင်ထောဝ်ရွာ၊ ကလားလမ်ရွာတို့ ဖြစ်ပြီး ဒေသခံ (၄၀၀၀)ကျော်ရှိကြောင်း သိရသည်။

ထို့အပြင် PNO ပြောင်းရွှေ့ခိုင်းသည့် ကျေးရွာများကို ဘုရားဖြူကျေးရွာ ဓမ္မာရုံသို့ ပြောင်းရွှေ့ခိုင်းထားပြီး ဒေသခံ အနည်းငယ်သာ ဓမ္မာရုံတွင် ရှိကာ အချို့သော ဒေသခံများမှာ နီးစပ်ရာ ဆွေမျိုးများ အိမ်သို့ သွားရောက် နေထိုင်ကြသည်ဟု ဒေသခံ များက ပြောသည်။

“ဟိုတစ်နေ့က ဓမ္မာရုံဘက်ကို သွားကြည့်တာ လူနည်းနည်းပဲ တွေ့ခဲ့တယ်။ တချို့က ရွာကနေ မဖယ်ရသေးတာရှိတယ်၊ တချို့က အသိအိမ်တွေမှာ နေတာထင်တယ်။ သတ်မှတ်ရက်ပြည့်တော့ လေယာဉ်သံ ကြားနေရတယ်။ အသံတော့ကြားတယ် လေယာဉ်မမြင်ရဘူး၊ ကင်းထောက်လေယာဉ်လား မသိဘူး” ဟု ဆီဆိုင်မြို့ခံ တစ်ဦးက ပြောသည်။

အဆိုပါ ပြောင်းရွှေ့ခိုင်းထားသော ကျေးရွာမှ ကလေးအများစုနှင့် သက်ကြီးရွယ်အိုများသည် ငှက်ဖျားရောဂါ၊ အူရောင်ငန်းဖျားရောဂါနှင့် ဝမ်းပျက်ဝမ်းလျောရောဂါများ ခံစားနေရပြီး ဆေးရုံများတွင် ဆေးကုသမှု ခံယူနေကြကြောင်း စစ်ရှောင်ကူညီသူ အမျိုးသမီးတစ်ဦးက ပြောသည်။

“အခု အဲ့ရွာဘက်က ကလေးတွေ အများစုက ဆေးရုံမှာ ဆေးကုသနေကြရတယ်။ ပိုက်ဆံတတ်နိုင်တဲ့သူက ဆေးရုံတက်တာပေါ့၊ မရှိတဲ့ သူက ဒီတိုင်း ဆေးမြီးတိုနဲ့ ကုရတာပေါ့။ ရာသီအကူးအပြောင်းမို့လား မသိဘူး၊ ငှက်ဖျားတို့ ဝမ်းပျက်ဝမ်းလျော ရောဂါတို့ အူရောင်ငန်းဖျား တို့ ဖြစ်နေကြတယ်” ဟု အဆိုပါ အမျိုးသမီးတစ်ဦးက ပြောသည်။

ပြီးခဲ့သည့် ဇွန်လ (၁၂)ရက်နှင့် (၁၃)ရက် ညနေအချိန်တွင် PNO ပြည်သူ့စစ်မှ တပူးထိုကျေးရွာကို မီးရှို့ခဲ့သောကြောင့် ဒေသခံနေအိမ် (၆)လုံး မီးလောင်သွားခဲ့ကြောင်း၊ PNO ပြည်သူ့စစ်သည် တပူးထိုကျေးရွာတွင် တပ်စွဲနေထိုင်နေသည်ဟု ပအိုဝ်းအမျိုးသားလွတ်မြောက်ရေးတပ်မတော် PNLA ကထုတ်ပြန်ထားသည်။