သျှမ်းပြည်တောင်ပိုင်း ၊တောင်ကြီးမြို့တွင် အင်္ဂလိပ်စာဖြင့် ရေးထားသည့် ဆိုင်းဘုတ်များကို မြန်မာစာဖြင့် ပြောင်းလဲ ရေးသားတပ်ဆင်ရန် စည်ပင်မှ ညွှန်ကြားထားကြောင်း သတင်းရရှိသည်။
ဈေးဆိုင်များ ကုန်တိုက်များနှင့် လုပ်ငန်းဆိုင်းဘုတ်များကို မြန်မာဘာသာဖြင့် ပြောင်းလဲ ရေးသား တပ်ဆင်ခိုင်းသဖြင့် လက်ရှိတွင် ဈေးဆိုင်များမှ ဆိုင်းဘုတ်များကို အသစ်ပြန်လည် ပြုလုပ်နေရကြောင်း ဒေသခံများကပြောသည်။
“စည်ပင်ရော ရပ်ကွက်လူကြီးတွေ ရောက မြန်မာဘာသာနဲ့ ဆိုင်းဘုတ်လုပ်ဖို့ လိုက်ပြောတာ။ ဘာလို့ ပြောင်းခိုင်းလဲတော့ မသိဘူး။ ခုဆို တော်တော်များများ ပြောင်းကုန်ပြီ။တချို့ဆိုင်ဆိုရင် မြန်မာလိုပြောင်းရင် ရယ်ချင်စရာကြီးလေ။ ပြောင်းခိုင်းတဲ့ သူက အင်္ဂလိပ်စာ မဖတ်တတ်လိုနေမယ်။” ဟု မြို့ခံ အမျိုးသမီးတစ်ဦးက ပြောသည်။
ထိုသို့ ပြောင်းလဲ တပ်ဆင်ခိုင်းသည်မှာ အဆင်မပြေကြောင်းနှင့် ဆိုင်းဘုတ်အားလုံးကို မြန်မာဘာသာဖြင့် အဓိပ္ပာယ် ဖော်ဆောင်ရာတွင် လွှဲမှားနိုင်ကြောင်း ၎င်းက ဆက်ပြောသည်။
တောင်ကြီး တစ်မြို့လုံးရှိ ဈေးဆိုင်၊ ဆိုင်ခန်းများ ကုန်တိုက်များကို အချိန် (၁၅)ရက်ပေးထားကြောင်း နှင့် ပြောင်းလဲ တပ်ဆင်ခြင်းမရှိသည့် ဆိုင်များကို အထက်လူကြီးများမှ အရေးယူ
ဆောင်ရွယ်နိုင်ဖွယ် ရှိသည်ဟု တောင်ကြီး တွင်နေထိုင်သူ အမျိုးသားတစ်ဦးက ပြောသည်။
“အချိန် (၁၅)ရက်အတွင်း ပြောင်းရမယ်တဲ့။ အိုးရှင်းဆိုရင် သမုဒ္ဒရာ လို့ပြောင်းရမှာလားမသိဘူး။ ကြောင်တောင်တောင် နိုင်တာပဲ။ တစ်ချို့ ဆိုင်းဘုတ်တွေဆို ရှိသေးတယ် မြန်မာလို ပြန်ရင် အဓိပ္ပါယ်က တစ်မျိုးနဲ့ ။ မြန်မာဘာသာနဲ့ မတပ်ဆင်ဘူးဆိုရင် အထက်က အရေးယူမယ်လို့တော့ ကြားတယ်။ ဘာတွေ ပြောင်းလဲ အုံးမလဲ မသိဘူး။တောင်ကြီးက ကြာလေ စိတ်ပျက်စရာလေ ဖြစ်လာပြီ။” ဟု အဆိုပါ အမျိုးသားက ပြောသည်။
ယခုလက်ရှိတောင်ကြီးမြို့တွင် မိုးများအဆက်မပြတ်ရွာသွန်းနေပြီး အချို့သော ရပ်ကွက်များတွင် ရေကြီးရေလျှံမှုများ ဖြစ်ပေါ်နေကြောင်း သိရသည်။
Leave a Comments