သျှမ်းပြည်တောင်ပိုင်း မိုးဗြဲမြို့ကို စစ်ကောင်စီတပ် ပြန်လည်ထိန်းချုပ်နိုင်ရန်အတွက် မြေပြင်စစ်အင်အား အလုံးအရင်းဖြင့် ထိုးစစ်ဆင်တိုက်ခိုက်နေသည်မှာ ၅ လကျော်ကြာပြီဖြစ်ကြောင်း စုံစမ်းသိရသည်။

စစ်ကောင်စီတပ်နှင့် ပအိုဝ်းပြည်သူ့စစ် PNO အင်အားတို့သည် မိုးဗြဲမြို့ နှင့် ဖယ်ခုံမြို့ တစ်ကြောကို ပြန်လည်ထိန်းချုပ်နိုင်ရန် ပြီးခဲ့သည့် ၂၀၂၅ နှစ်ဆန်းပိုင်းမှစ၍ မြေပြင်ထိုးစစ်ဆင်မှုအပြင် ဝေဟင်လေကြောင်း တိုက်ခိုက်မှုများလည်း ပြုလုပ်နေလျက်ရှိသည်။

လက်ရှိ ပင်လောင်းမြို့နယ် ဆောင်းပြောင်းကျေးရွာနှင့် ညောင်ရွှေမြို့နယ် ရေပူကျေးရွာရှိ အင်းလေးပြည်သူ့ကာကွယ်ရေးတပ် IPDF စခန်းကို တိုက်ခိုက်သိမ်းပိုက်နိုင်ခဲ့သည့် စစ်ကောင်စီတပ်နှင့် ပအိုဝ်းပြည်သူ့စစ် PNO ပူးပေါင်းတပ်ဖွဲ့က ဖယ်ခုံအရှေ့ခြမ်းကျေးရွာအထိ ထိုးစစ်ဆင်တိုက်ခိုက်နေကြောင်း မြေပြင်စစ်ရေး သတင်းရင်းမြစ်တစ်ဦးက သျှမ်းသံတော်ဆင့်ကိုပြောသည်။

“စစ်ကောင်စီဘက်က ထိုးစစ်ဆင်ပြီးတိုက်ခိုက်လာတာ ၉ ရက်လောက်ရှိပြီ။ ဒီနေ့ မနက်တစ်မနက်လုံး တိုက်ပွဲဖြစ်နေတာ။ ဒီရက်ပိုင်း လေကြောင်းနဲ့ တိုက်ခိုက်တာမျိုးမရှိပေမယ့် ဒရုန်းနဲ့ လက်နက်ကြီးတွေနဲ့ပါ ပစ်နေတာ။ နှစ်ဖက်လုံးထိခိုက် သေဆုံးတာတွေ များတယ်” ဟု သတင်းစစ်အရေး သတင်းရင်းမြစ်က ပြောသည်။

အဆိုပါ တိုက်ပွဲများကြောင့် ဖယ်ခုံမြို့နယ်အတွင်းရှိ ကျေးရွာ ၆ ရွာခန့်က အိမ်ထောင်စု ၁,၀၀၀ ဝန်းကျင် ဘေးလွတ်ရာသို့ ထွက်ပြေးတိမ်းရှောင်နေရကြောင်း စစ်ဘေးရှောင်ကူညီသူအမျိုးသားတစ်ဦးက သျှမ်းသံတော်ဆင့်ကို ဆက်လက် ပြောသည်။

“အခုစစ်ဘေးရှောင်တွေကတော့ တောထဲရယ်၊ ဘေးကင်းတဲ့ အနီးအနားကရွာတွေမှာပဲ ရှောင်နေထားတယ်ဗျ။ လွယ်ပေါအုပ်စုက လက်နက်ကြီး ရမ်းသမ်းပစ်နေလို့ပါ။ တစ်ခြားဖက်က ထွက်လမ်းမရှိတော့ဘူး။ ပြီးခဲ့ရက်ပိုင်း ကလည်း စစ်ရှောင်ရင်း ဗုံးကျလာလို့ တံအားအောက်ဝင်ပုန်းကြတာ။ တောင်ပို့ကွဲက ပြည်သူတွေတော့ လွယ်ပေါဖက်ပြေးလာတာ၊ အခုလွယ်ပေါကဆက်ပြေးနေရတယ်” ဟု ၎င်းကပြောသည်။

လက်ရှိ သျှမ်း-ကရင်နီနယ်စပ် မိုးဗြဲမြို့တွင်လည်း စစ်ကောင်စီနှင့် တော်လှန်ရေးအင်အားစုတို့ တိုက်ပွဲများ ပြင်းထန်စွာ ဖြစ်ပွားနေသောကြောင့် ပြည်သူလူထုအနေဖြင့် မိုးဗြဲမြို့တွင်းနှင့် လမ်းမကြီးကို အသုံးပြုသွားလာခြင်း မပြုလုပ်ရန် မိုးဗြဲပြည်သူ့ကာကွယ်ရေးတပ် Mobye PDF ကလည်း ထုတ်ပြန်ထားသည်။

အလားတူ ယနေ့ နေ့လယ် (၁၁)နာရီ ဝန်းကျင်တွင် ဖယ်ခုံအင်းအရှေ့ဘက်ကမ်း ဆောင်နန်းခဲကျေးရွာအနီးရှိ ကယန်းပြည်သစ်တပ်မတော် နယ်မြေလုံခြုံရေးဂိတ်ကို စစ်ကောင်စီနှင့် PNO တပ်ဖွဲ့တို့က ဒရုန်းဗုံးကြဲချသွားကြောင်း သိရသည်။

လွိုင်ကော်-မိုးဗြဲ-ဖယ်ခုံ-ပင်လောင်း လမ်းပိုင်သည် ကရင်နီပြည်အတွက် ထောက်ပို့ဆက်သွယ်ရေး လမ်းကြောင်းအတွက် အဓိကအရေးပါသလို ကရင်နီပြည်အတွက် တံခါးပေါက်အဖြစ် အလွန်အရေးပါသည်။

ထို့အပြင် စစ်ကောင်စီရုံးစိုက်ရာ နေပြည်တော်နှင့် မိုင် ၁၂၀ ကျော် ကွာဝေးပြီး မိုးဗြဲမြို့မှ ဖယ်ခုံ-ပင်လောင်း၊ မိုးဗြဲမြို့မှ လွိုင်လင်လေး-ဆီဆိုင်၊ မိုးဗြဲမြို့မှ လွိုင်ကော်-ဒီးမော့ဆို-ဖရူဆိုအထိ ဆက်သွယ်သွားလာ နိုင်သည့်အတွက် စစ်ရေးအရ အရေးပါသည့် နေရာဖြစ်သည်