TNLA ထိန်းချုပ်ဒေသအတွင်း တော်လှန်ရေးကာလ ပြည်သူ့အစိုးရတစ်ရပ်ကို လူထုကိုယ်စားလှယ်များဖြင့် ၂၀၂၅ ခုနှစ်အတွင်း ဖွဲ့စည်းနိုင်ရန် အမြန်ဆုံး ကြိုးပမ်းဆောင်ရွက်သွားမည်ဟု တအာင်းနိုင်ငံရေး အတိုင်ပင်ခံကောင်စီမှ ကြေညာလိုက်သည်။

ဇွန်လ (၁) ရက်မှ (၃) ရက်နေ့အထိ ကျင်းပခဲ့သည့် တအာင်းနိုင်ငံရေး အတိုင်ပင်ခံကောင်စီ (TPCC) ၏ နိုင်ငံရေးထိပ်သီး အစည်းအဝေးတွင် တအာင်းပြည်ကောင်စီ (Ta’ang Land Council – TLC) ကို တော်လှန်ရေးကာလတွင် အမြင့်ဆုံးနိုင်ငံရေး အာဏာပိုင်အဖွဲ့အစည်းအဖြစ် ဖွဲ့စည်းဆောင်ရွက်ရန် ဆုံးဖြတ်ခဲ့ကြောင်း ယနေ့ (ဇွန်လ ၉ ရက်) တွင် ထုတ်ပြန်ခဲ့သည်။

၂၀၂၁ မတ်လ (၂၄) ရက်တွင် ဖွဲ့စည်းခဲ့သည့် တအာင်းနိုင်ငံရေး အတိုင်ပင်ခံကော်မတီ TPCC တွင် တအာင်းအမျိုးသားပါတီ TNP ၊ ပလောင်ပြည်နယ် လွတ်မြောက်ရေးတပ်ဦး PSLF/TNLA နှင့် တအာင်း(ပလောင်) အရပ်ဖက်အစုအဖွဲ့များ ပါဝင်ထားပြီး အုပ်ချုပ်ရေး၊ ဥပဒေပြုရေးနှင့် တရားစီရင်ရေး အဓိကမဏ္ဍိုင်(၃)ခုကို ထိန်းကျောင်းရန် ပြောင်းလဲဖွဲ့စည်းလိုက်ကြောင်း ထုတ်ပြန်ချက်အရ သိရသည်။

“အဓိက ကတော့ ဒီတော်လှန်ရေးကာလ အစိုးရကို ဦးဆောင်ဖွဲ့စည်းနိုင်ရေး၊ မဏ္ဍိုင်ကြီး (၃) ရပ်ကို ထိန်းကြောင်းကွပ်ကဲ ကြပ်မတ်ဖို့နဲ့ တအာင်းတွေရဲ့ နိုင်ငံရေးဦးဆောင်မှု အခန်းကဏ္ဍမှာ ဦးဆောင်ဖို့ တာဝန်ပေးထားတာ ဖြစ်ပါတယ်”ဟု TPCC အတွင်းရေးမှူးဖြစ်သူ မိုင်းနိုင်ဂေါင်ဇာရ် က သျှမ်းသံတော်ဆင့်ကို ဖြေကြားသည်။

အဆိုပါ အစည်းအဝေးသို့ အစုအဖွဲ့ (၃) ခုမှ ထိပ်သီးခေါင်းဆောင်များ စုစုပေါင်း (၈၃) ဦး တက်ရောက်ခဲ့ကြပြီး တော်လှန်ရေးကာလ အစိုးရအစီအမံကို အတည်ပြုခဲ့ကြောင်း သိရသည်။

“တော်လှန်ရေးကာလ အစိုးရ တစ်ရပ်မှာ ရှိသင့်ရှိထိုက် လိုအပ်တဲ့ဌာနတွေ စုံအောင်တော့ ပြင်ဆင်စုဖွဲ့သွားဖို့ ရှိတယ်လို့ အကြမ်းဖျင်း ပြောလို့ရပါတယ်။ အကြမ်းအားဖြင့် ပြောနိုင်တာကတော့ ၁၀၂၇ စစ်‌ဆင်ရေးလှိုင်းမှာ PSLF/TNLA က ထိန်းချုပ်ထားတဲ့ မြိုနယ်တွေ ပါပါတယ်ဗျ”ဟု TPCC အတွင်းရေးမှူးဖြစ်သူ မိုင်းနိုင်ဂေါင်ဇာရ် က သျှမ်းသံတော်ဆင့်ကို ဆက်ပြောသည်။

အသစ်ပြောင်းလဲ ဖွဲ့စည်းလိုက်သည့် တအာင်းပြည်ကောင်စီတွင် TNLA ဥက္ကဋ္ဌဖြစ်သူ ဗိုလ်ချုပ်ကြီး တားအိုက်ဘုန်းက ဥက္ကဋ္ဌအဖြစ် တာဝန်ယူထားပြီး ဒုဥက္ကဋ္ဌ (၂) ဦး၊ အဖွဲ့ဝင် (၄) ဦး၊ အတွင်းရေးမှူးနှင့် တွဲဖက်အတွင်းရေးမှူး တစ်ဦးစီ၊ စုစုပေါင်း (၉) ဦးဖြင့် ဖွဲ့စည်းထားပြီး အမျိုးသမီး (၄) ဦး ပါဝင်သည်။

တအာင်းပြည်ကောင်စီ အနေဖြင့် “၁၀၂၇ စစ်ဆင်ရေး”အတွင်း တအာင်း(ပလောင်) အမျိုးသားလွတ်မြောက်ရေးတပ်မတော် TNLA နှင့် မဟာမိတ်များ ဦးဆောင်၍ စစ်ကောင်စီအား ဖယ်ရှားနိုင်ခဲ့သည့် နယ်မြေများကို အခြေခံပြီး တော်လှန်ရေးကာလ ပြည်သူ့အစိုးရတစ်ရပ်ကို သင့်လျော်သည့် ပြည်သူလူထု ကိုယ်စားလှယ်များဖြင့် ၂၀၂၅ ခုနှစ်အတွင်း ဖွဲ့စည်းနိုင်ရန် အမြန်ဆုံး ကြိုးပမ်းဆောင်ရွက်သွားမည်ဟု ပြောဆိုထားသည်။

ထို့အပြင် မြန်မာပြည်တော်လှန်ရေးအင်အားစုများနှင့်အတူ ဖက်ဒရယ်ပြည်ထောင်စုနိုင်ငံ တည်ဆောက်နိုင်ရန်အတွက် ပူးပေါင်းဆောင်ရွက်သွားမည်ဟုလည်း ထုတ်ပြန်ချက်တွင် ဆိုထားသည်။

လက်ရှိတွင် TNLA အနေဖြင့် မြို့ (၁၂) မြို့ ထိန်းချုပ်ထားပြီး ဧပြီလ တွေ့ဆုံဆွေးနွေးပွဲအတွင်း စစ်ကောင်စီဘက်မှ နောင်ချို၊ ကျောက်မဲ၊ သီပေါ၊ မိုးကုတ်နှင့် မိုးမိတ်မြို့တို့ကို လက်လွှတ်ရန် တောင်းဆိုခဲ့ရာ သဘောတူညီမှု မရရှိခဲ့ဘဲ တရုတ်အစိုးရ၏ ကြားဝင်စေ့စပ်မှုဖြင့် လာမည့် ဩဂုတ်လအတွင်း စစ်ကောင်စီနှင့် TNLA တို့ ထပ်မံတွေ့ဆုံမည်ဖြစ်ကြောင်း သိရသည်။