သျှမ်းပြည်တောင်ပိုင်း၊ တောင်ကြီးမြို့ ရတနာသီရိရပ်ကွက်ရှိ ဝင်္ကပါရေထွက်တွင် ကိုရင်နှစ်ပါး ရေချိုးဆင်းရာမှ ရေနစ်သေဆုံးခဲ့ကြောင်း သတင်းရရှိသည်။
ဖြစ်စဉ်မှာ ယမန်နေ့ (ဇွန်လ ၈ ရက်) ညနေ ၅ နာရီတွင် တောင်ကြီးမြို့ ရတနာသီရိရပ်ကွက်ရှိ ဝင်္ကပါရေထွက်၌ အသက် ၁၀နှစ်အရွယ်ရှိ ကိုရင် (၅)ပါး ရေချိုးဆင်းရာ ကိုရင်နှစ်ပါး ရေနစ်သေဆုံးသွားကြောင်း တောင်ကြီးမြို့ခံတစ်ဉီးက သျှမ်းသံတော်ဆင့်ကိုပြောသည်။
“ကိုရင် (၅) ပါးက ရေဆင်းချိုးကြတာ၊ ရေနစ်လာတော့ ကိုရင်(၄)ပါးက ကုန်းပေါ် တက်လာတာ။ အဲ့တာ တစ်ပါးက ရေနစ်ကျန်ခဲ့လို့ နောက်တစ်ပါးက ဆင်းကယ်ရင်း (၂) ပါးလုံး ရေနစ်သွားတယ်။ ရှာရင်း မနက်(၃)နာရီမှာတော့ ရေနစ်ပြီးသေတဲ့ အလောင်းကို ပြန်တွေ့လိုက်တယ်။ အဲ့တာနဲ့ စဝ်စံထွန်းဆေးရုံကို ပို့လိုက်တယ်” ဟု ဖြစ်စဉ်သိရှိသူ ဒေသခံ အမျိုးသားတစ်ဉီးက သျှမ်းသံတော်ဆင့်ကို ပြောသည်။
အဆိုပါ ရေနစ်သေဆုံးသွားသည့် ကိုရင်နှစ်ပါးသည် ပင်လောင်းနှင့် ဆီဆိုင်မြို့နယ်ဘက်မှ လာပြီး တောင်ကြီးမြို့ ချမ်းမြသာစည်ရပ်ကွက် ဓမ္မဝိဟာရကျောင်းတွင် သင်္ကန်းဝတ်ရင်း စာသင်နေသူဖြစ်သည်ဟု ၎င်းက ဆက်ပြောသည်။
ထို့ကြောင့် ယခုကဲ့သို့ မိုးကြီးချိန်တွင် ချောင်းထဲ၌ ကလေးများကို ရေဆင်းမကူးစေချင်ကြောင်းနှင့် ယခင်ကလည်း ဝင်္ကပါရေထွက်တွင် ယခုကဲ့သို့ ရေနစ်သူ ရှိခဲ့ဖူးကြောင်း မြို့ခံတစ်ဦးက ပြောသည်။
“ခုက မိုးရာသီလည်း ရောက်ပြီ၊ တောင်ကျရေက အချိန်မရွေး ဆင်းလာနိုင်တယ်။ ဒါကြောင့် ချောင်းထဲကို ကလေးတွေကို ရေချိုး မဆင်းစေချင်ဘူး။ အရင်က ဒီဝင်္ကပါရေထွက်မှာ ရေနစ်ပြီး သေဆုံးခဲ့ဖူးတယ်၊ ခုလည်း ထပ်ဖြစ်ပြန်ပြီ။ မိဘတွေအနေနဲ့ ကလေးတွေကို ဂရုစိုက်စေချင်တယ်” ဟု အဆိုပါ မြို့ခံတစ်ဦးက ပြောသည်။
ပြီးခဲ့သည့် မေလ(၂၅)ရက်နေ့တွင်လည်း ရွှေညောင်မြို့သို့ ကျောက်မဲဘက်မှ စစ်ရှောင်လာသူ အသက်(၉)နှစ်အရွယ် မိန်းကလေးတစ်ဦးလည်း တံတားဖြူရွာအနီး ဝါးတံတားဖြတ်ကူးစဉ် ခြေချော်ကျ၍ ရေစီးထဲ မျောပါသွားခဲ့ပြီး အလောင်းကိုသာ ပြန်လည်တွေ့ရှိခဲ့သည်။
Leave a Comments