သျှမ်းပြည်တောင်ပိုင်း ဆီဆိုင်မြို့နယ် နောင်ကျောကျေးရွာအုပ်စုနှင့် တောင်ရှေ့ကျေးရွာအုပ်စုအတွင်း နေထိုင်သည့် ဒေသခံများကို စစ်ကောင်စီလက်အောက်ခံ ပအိုဝ်းပြည်သူ့စစ် PNO ဖိအားပေး ပြောင်းရွှေ့ခိုင်းနေကြောင်း စုံစမ်းသိရသည်။

နောင်ကျောကျေးရွာအုပ်စုမှ တပူးထိုရွာ၊ ကောင်ထိုရွာ၊ လွယ်ငွန်းရွာ၊ နောင်ဘိုရွာ၊ ပင်စက်ရွာနှင့် တောင်ရှေ့ကျေးရွာအုပ်စုမှ နောင်ထောင် ၆ ရွာ၊ ကလားလမ်ရွာအတွင်းရှိ ဒေသခံများကို ဇွန်လ ၁၅ ရက် နောက်ဆုံးထားပြီး ကျေးရွာအတွင်းမှ ထွက်ခွာရမည်ဖြစ်ကြောင်း ပအိုဝ်းပြည်သူ့စစ် PNO က စာပို့အကြောင်းကြားခဲ့ခြင်း ဖြစ်သည်။

အဆိုပါ ကျေးရွာများတွင် လူဦးရေ စုစုပေါင်း ၆၀၀၀ ကျော်ရှိပြီး လက်ရှိမှာ စစ်ကောင်စီတပ်နှင့် ပအိုဝ်းပြည်သူ့စစ် PNO တို့က ပြည်ထောင်စုလမ်းတစ်လျှောက်၌ တပ်စွဲထားကြောင်း ဆီဆိုင်မြို့ ဒေသခံတစ်ဦးက သျှမ်းသံတော်ဆင့်ကို ပြောသည်။

“အခုသူတို့ ကင်းချထားလို့ ရွာသားတွေကို ပေးမနေတာ။ ဆီဆိုင်-နောင်ထော် ပြည်ထောင်စုလမ်းမကြီး တစ်လျှောက်မှာ ချထားတာ။ အခုသွားလာခွင့်ကိုလည်း မနက် ၈ နာရီကနေ ညနေ ၄ နာရီခွဲထိ ပေးထားတယ်” ဟု ၎င်းဒေသခံတစ်ဦးက ပြောသည်။

ဒေသခံများအနေဖြင့် သတ်မှတ်ထားသော နောက်ဆုံးရက်၌ အပြီးထွက်သွားရမည်ဖြစ်ပြီး မထွက်သွားပါက တာဝန်မယူကြောင်း ပအိုဝ်းပြည်သူ့စစ် PNO ကခြိမ်းခြောက်ပြောဆိုခဲ့သည်။

ထို့အပြင် ကျေးရွာအတွင်းမှ ထွက်ခွာသည့်သူများအနေဖြင့်လည်း တောင်ယာနှင့် စစ်ဘေးရှောင်စခန်းသို့ သွားရောက်နေထိုင်ခြင်း မပြုရန်နှင့် ဘုရားဖြူကျေးရွာ မွေတော်ဘုရားသို့ သွားရောက်နေထိုင်ရန် ပအိုဝ်းပြည်သူ့စစ် PNO က ညွှန်ကြားထားကြောင်း သိရသည်။

“အခုတောင်ယာတွေလုပ်နေတဲ့အချိန်ဖြစ်တော့ တောင်ယာထဲမှာပဲအိပ်၊ တောင်ယာထဲမှာပဲနေကြတယ်။ တဲဆောက်ပြီး နေနေကြတယ်။ ကျနော်တို့လည်း ဆီဆိုင်ဖြစ်တုန်းက ထွက်ပြေးဖူးတော့ ဘယ်လောက်ထိ ခက်ခဲလဲဆိုတာ ကိုယ်ပဲသိတယ်။ စားစရာမရှိဘူး” ဟု ဆီဆိုင်မြို့ဒေသခံတစ်ဦးက ထပ်လောင်းပြောသည်။

ယခုလဆန်းပိုင်းမှစ၍ သျှမ်းပြည်တောင်ပိုင်းတွင် လိုင်စင်မဲ့ကားများကို ဆက်တိုက်ဖမ်းဆီးနေသောကြောင့် ထွက်ပြေးတိမ်းရှောင်နေသည့် ဒေသခံများလည်း ကားမစီးရဲကြောင်း၊ ထော်လာဂျီများဖြင့် ထွက်ပြေးသွားလာနေရကြောင်း ဒေသခံများပြောသည်။

ဆီဆိုင်မြို့နယ် ဒေသခံများကို ဖိအားပေးပြောင်းရွှေ့ခိုင်းသည်နှင့် ပတ်သက်၍ ပအိုဝ်းအမျိုးသား လွတ်မြောက်ရေးတပ်မတော် PNLA ၏ သတင်းနှင့်ပြန်ကြားရေးတာဝန်ရှိသူ ခွန်ရိန်းယံက ယခုလိုပြောသည်။

“သူတို့လုပ်တာက တော်လှန်ရေးနဲ့ လူထုကို အဆက်သွယ်ပြတ်အောင်၊ ထိဆက်မှုမရှိအောင် လုပ်ချင်တာပဲ ဖြစ်ပါတယ်။ ဒီလိုမျိုး လုပ်တယ်ဆိုတာ ပြည်သူလူထုရဲ့ ရပ်ရွာ၊ စည်းစိမ်၊ ဥစ္စာကို ဖျက်ဆီးချင်တဲ့အတွက် ဒီလိုမျိုး လုပ်တယ်လို့ပဲ မြင်ပါတယ်။ PNO ဆိုတာက စစဖွဲ့တုန်းက ပြည်သူလူထုကြားကနေ ပေါက်လာတဲ့ အဖွဲ့ဖြစ်ပါတယ်။ ပြည်သူလူထုကျွေးတဲ့ထမင်းကို စားပြီးတော့မှ ပေါ်ပေါက်လာတဲ့အဖွဲ့ဖြစ်တယ်” ဟု ခွန်ရိန်းယံက ပြောသည်။

သို့သော် ပအိုဝ်းအမျိုးသားအဖွဲ့ချုပ် PNA ခေါ် အသွင်ပြောင်း ပအိုဝ်းပြည်သူ့စစ် PNO သည် ကိုယ်စီးပွားရေးအတွက်နှင့် ကျေးရွာအတွင်းရှိ ဒေသခံများကို ပြန်လည်မောင်းထုတ်နေသည့် အဖွဲ့ဖြစ်ကြောင်း ဒေသခံများက ဝေဖန်နေကြသည်။