သျှမ်းပြည်အရှေ့ပိုင်း တာချီလိတ်မြို့နှင့် ကျိုင်းတုံမြို့တို့တွင် စစ်ကောင်စီတပ်သားများအတွက် လစဉ် စစ်ထောက်ပံ့ကြေးများ ထည့်ပေးရန် ကောက်ခံနေကြောင်း သတင်းရရှိသည်။
ယခုနှစ်ဆန်းပိုင်း ၂၀၂၅ ဇန်နဝါရီလမှ စတင်၍ တာချီလိတ်မြို့ပေါ် ရပ်ကွက်များတွင် တစ်လလျှင် ထိုင်းဘတ်ငွေ ၃၀၀ မှ ၅၀၀ အထိ စစ်ကောင်စီအတွက် စစ်ထောက်ပံ့ကြေး ထည့်ပေးနေရပြီး ဒေသခံများအတွက် အခက်အခဲ ကြုံတွေ့နေရကြောင်း တာချီလိတ်မြို့ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“တချို့ရပ်ကွက်တွေက ထည့်ရတာကြာပြီ၊ ကျမတို့က ပေးရတာ ၂ လလောက်ပဲ ရှိသေးတယ်။ တချို့က ဘာအတွက်ကြောင့် ကောက်လဲဆိုတာတောင် မသိဘူး။ အခုမှ အဲ့လိုတွေ ကောက်တော့ လစဉ်လတိုင်း ထပ်ပေးရရင် အခက်အခဲတွေ ရှိတာပေါ့ရှင့်၊ ငွေကြေး အဆင်မပြေတဲ့ သူတွေဆိုပိုဆိုး”ဟု တာချီလိတ်မြို့ ဒေသခံအမျိုးသမီးတစ်ဦးက ပြောသည်။
ထို့အပြင် ကျိုင်းတုံမြို့ပေါ်ရှိ ရပ်ကွက်များတွင်လည်း ပြီးခဲ့သည့် မတ်လမှ စတင်၍ စစ်ကောင်စီအတွက် စစ်ထောက်ပံ့ကြေးအဖြစ် တစ်လလျှင် မြန်မာကျပ်ငွေ ၃ သောင်းမှ ၆ သောင်းအထိ ပေးနေရခြင်းကြောင့် အခြေခံလူတန်းစားများအတွက် ပို၍ အခက်အခဲများ ဖြစ်စေကြောင်း ကျိုင်းတုံမြို့ ဒေသခံအမျိုးသားတစ်ဦးက ပြောသည်။
“ကျိုင်းတုံမှာလည်း ရပ်ကွက်တိုင်းလိုလို ကောက်နေတာ။ ရပ်ကွက်ထဲက လူကြီးတွေပဲ ကောက်ပေးတာ၊ လကုန်တာနဲ့ ထည့်ပေးရတာ။ နေ့လုပ်နေ့စားတွေ အတွက်ကြတော့ အဆင်မပြေဘူးလေ၊ ဒါပေမဲ့လည်း ဘာမှ မပြောရဲကြဘူးလေ။ မထည့်လို့မှ မရတာ၊ ဘယ်သူမှ မတတ်နိုင်ဘူး”ဟု ကျိုင်းတုံမြို့ ဒေသခံ ၎င်းအမျိုးသားက သျှမ်းသံတော်ဆင့်ကို ပြောသည်။
အလားတူ ပင်လောင်းမြို့နယ်တွင်လည်း ဇွန်လ ပထမပတ်မှ စတင်၍ စစ်ကောင်စီ လက်အောက်ခံ ကျေးရွာအုပ်ချုပ်ရေးမှူးတို့က ဒေသခံများကို အကြောင်းအမျိုးမျိုးပြ၍ စစ်ကောင်စီတပ်နှင့် ပအိုဝ်းပြည်သူ့စစ် PNO တို့အတွက် စစ်မှုထမ်းထောက်ပံ့ကြေးများ ကောက်ခံနေကြောင်းသိရသည်။
မြန်မာနိုင်ငံတွင် စစ်အာဏာသိမ်းမှု ဖြစ်ပွားပြီးနောက် ကုန်ပစ္စည်း၊ အခြေခံစားသောက်ကုန်များ၊ စက်သုံးဆီများ ဆက်လက် ဈေးနှုန်းမြင့်တက်နေလျက် ရှိနေသည့်အပြင် စစ်ကောင်စီနှင့် လက်အောက်ခံများကလည်း လစဉ်လတိုင်း အကြောင်းအမျိုးမျိုးပြ ငွေကြေးကောက်ခံ နေခြင်းကြောင့် ပြည်သူများ တစ်နေ့ထက်တစ်နေ့ စားဝတ်နေရေး ကြပ်တည်းနေကြသည်။
Leave a Comments