သျှမ်းပြည်အတွင်း စစ်ကောင်စီလက်အောက်ခံ ယာဉ်ထိန်းအဖွဲ့မှ လိုင်စင်မဲ့ကားများ ဖမ်းဆီးသိမ်းဆည်းနေ သောကြောင့် လူမှုကူညီရေးလုပ်ငန်းများ ဆောင်ရွက်နေသော ပရဟိတ အသင်းများ ခက်ခဲ လာကြောင်း သတင်း ရရှိသည်။

သျှမ်းပြည်အတွင်း အသုံးပြုနေသော လူမှုကူညီရေးအသင်းများ၏ လူနာတင်ယာဉ်များမှာ လိုင်စင်မဲ့ ကားများ ဖြစ်ကြပြီး စစ်ကောင်စီက လိုင်စင်မဲ့ကားများ ဖမ်းဆီးနေသောကြောင့် နယ်ဝေး လူနာပို့ဆောင်ရာတွင် အခက်ခဲများ ကြုံတွေ့နေရကြောင်း အမည်မဖေါ်လိုသည့် သျှမ်းပြည်မြောက်ပိုင်း မူဆယ်ခရိုင် အတွင်းရှိ လူမှုကူညီရေးအသင်းဝင်တစ်ဦးက သျှမ်းသံတော်ဆင့် သို့ ပြောသည်။

“ကျနော်တို့ ပရဟိတအသင်းကားတွေရဲ့ ၉၀ရာခိုင်နှုန်းက လိုင်စင်မဲ့ပါ၊ အဲ့ဒီကားတွေနဲ့ပဲ လူနာတွေကို ဆေးရုံ တို့၊ နာရေးပို့ဆောင်တဲ့နေရာတွေမှာ လိုင်စင်ကား မဝယ်သုံးနိုင်ဘူးဗျ၊ ခုဖမ်းနေတယ်ဆိုလို့ ကျနော်တို့တောင် မထွက်ရဲ ဘူး၊ နယ်ဝေးလူနာပို့ဆို လုံးဝရပ်လိုက်ပြီ၊ ဖမ်းခံရရင် ကျနော်တို့ ပြန်မဝယ်နိုင်ဘူးလေ” ဟု ၎င်းကပြောသည်။

ထို့ပြင် ယခု ဇွန် ၂ရက်တွင် မော်လမြိုင်မြို့မှ လူနာတင်ယာဉ်တစ်စီး လူနာပို့ဆောင်စဉ် လိုင်စင်မဲ့ယာဉ်ဖြစ်သဖြင့် ဖမ်းဆီးသိမ်းဆည်းခံခဲ့ရသည့် ဖြစ်စဉ်ရှိခဲ့သည်။

ထို့ကြောင့် ပရဟိတ လူမှုကူညီရေးအသင်းကားများကို သက်ဆိုင်ရာမှ ခွင့်ပြုလိုင်စင်များ လုပ်ပေးစေလိုကြောင်း လည်း ၎င်းပရဟိတ အဖွဲ့ဝင်တစ်ဉီးက ဆိုပြန်သည်။

“ဦးသိန်းစိန်အစိုးရလက်ထက်တုံးကတော့ အဲ့လိုလိုင်စင်မဲ့ကားတွေကို တရားဝင်လိုင်စင် ဖြစ်အောင် ဆောင်ရွက် ပေးခဲ့တာ ရှိတယ်၊ အဲ့ချိန်က တစ်စီးမှ သုံးသောင်းပဲကျတယ်၊ ခုက ပရဟိတအသင်းကားလေးတွေတော့ သွားသွား လာလာ လုပ်လို့ရအောင်၊ တရားဝင်ဖြစ်အောင် ဆောင်ရွက်ပေး စေချင်တယ်။” ဟု ၎င်းကဆက်ပြောသည်။

ပြီးခဲ့သည့် မေလဆန်းတွင် လိုင်စင်မဲ့မော်တော်ယာဉ်များကို ထိထိရောက်ရောက်ဖမ်းဆီးရန် အာဏာသိမ်း စစ်ခေါင်းဆောင် ညွှန်ကြားပြီးနောက် သျှမ်းပြည်တောင်ပိုင်းရှိ ဟဲဟိုး၊ တောင်ကြီး၊ အောင်ပန်း၊ ဆီဆိုင်စသည့် မြို့များတွင်ဖမ်းဆီးသိမ်းဆည်းနေပြီး တောင်ကြီးမြို့ပေါ်ရှိ ဆိုင်ကယ်အရောင်းခန်းထိပါ လိုက်လံစစ်ဆေး ဖမ်းဆီး နေသည်ဟု ဒေသခံများပြောကြားချက်အရသိရသည်။

အလုပ်သင် သတင်းထောက် စိုင်းဟန်မော(ဝ်) ရေးသားသည်။