သျှမ်းပြည် ကျောက်မဲမြို့နယ် နောင်ပိန်တိုက်နယ်အတွင်းသို့ ထွက်ပြေးတိမ်းရှောင်လာသော နောင်ချိုမြို့နယ်မှ စစ်ဘေးရှောင် (၁၀၀၀) ကျော်အတွက် စားနပ်ရိက္ခာ အကူအညီများ အရေးတကြီး လိုအပ်နေကြောင်း စုံစမ်းသိရသည်။

ဧပြီလနှောင်းပိုင်းမှ စတင်ပြီး နောင်ချိုမြို့နယ် တောင်းခမ်းဒေသ၌ တအာင်း(ပလောင်) အမျိုးသားလွတ်မြောက်ရေးတပ်မတော် TNLA နှင့် ပူးပေါင်းတပ်များ ထိန်းချုပ်နိုင်ခဲ့သည့် ကျေးရွာများကို စစ်ကောင်စီတပ်မှ ပြန်လည်ထိုးစစ်ဆင် တိုက်ခိုက်ခဲ့ခြင်းကြောင့် ရွှေမုဌော၊ မဲပုတ်၊ နောင်လိုင်၊ နားရှိုး၊ ရွှေသွန်း၊ ကံကြီး စသည့် ကျေးရွာများမှ ဒေသခံများသည် ကျောက်မဲမြို့နယ်ဘက်သို့ ထွက်ပြေးတိမ်းရှောင်ခဲ့ရသည်။

လက်ရှိတွင် ကျောက်မဲမြို့နယ် နောင်ပိန်တိုက်နယ်ရှိ အထက်တန်းကျောင်းတွင် နောင်ချိုဘက်မှ စစ်ဘေးရှောင် (၇၀၀) ခန့် ခိုလှုံနေပြီး စားနပ်ရိက္ခာ အကူအညီ အရေးတကြီး လိုအပ်လျက်ရှိကာ လုပ်ပါ၊ ကုန်းညောင်၊ ထန်းတပင် အစရှိသည့် အနီးအနား ကျေးရွာများမှ ဘုန်းကြီးကျောင်းများတွင်လည်း စစ်ဘေးတိမ်းရှောင်နေကြောင်း ဒေသခံများမှ ပြောသည်။

“နောင်ပိန် အထကကျောင်းကို ရောက်နေတာတော့ ၆၅၀ လောက် ရှိတယ်။ အများအားဖြင့် ဂုတ်တွင်းဟိုဘက်ကမ်း နောင်လိုင်၊ မဲပုတ်၊ နားရှိုး၊ ကံကြီး အဲ့ဘက်ရွာက ဓနုအမျိုးတွေ။ တောင်းခမ်းဘက် တိုက်ပွဲဖြစ်တာ တစ်နှစ်လောက်ရှိတော့ စစ်ရှောင်လာတဲ့အချိန် တော်တော်များများ မရလာကြဘူး။ လိုတာကတော့ အားလုံးပဲ၊ နေဖို့စားဖို့ အရေးတကြီး လိုတာပေါ့” ဟု နောင်ပိန်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

စစ်ဘေးရှောင်များထဲတွင် အမျိုးသမီးနှင့် သက်ကြီးရွယ်အို အများစု ဖြစ်ပြီး မိုးရာသီဖြစ်ခြင်းကြောင့် ခြင်ထောင်နှင့် အိပ်ယာခင်းကဲ့သို့ နေရာထိုင်ခင်းများလည်း လိုအပ်ကြောင်း သိရသည်။

“သူတို့က လောလောနဲ့ ထွက်လာကြတော့ ဘာမှ မရလာဘူး။ တချို့ဆို ဘုန်းကြီးကျောင်းမှာ ထော်လာဂျီ ထိုးရပ်ထားပြီး မိုးကာပေါ် အိပ်ကြတာ။ ဒီကို မရောက်လာခင် အရင်ကလည်း တခြားနေရာ ရှောင်ရတော့ တစ်နှစ်လောက် စစ်ပြေးဖြစ်နေတာ။ ရွာနီးချုပ်စပ်က ဘုန်းကြီးကျောင်းမှာ ပြီးတော့ ဆွေမျိုးအိမ်မှာနဲ့ ဆိုရင်တော့ တစ်ထောင်ကျော်မယ်”ဟု ၎င်းဒေသခံ အမျိုးသားက ဆက်ပြောသည်။

ပြီးခဲ့သည့် မေလ (၂၉)ရက်တွင် နောင်ချိုမြို့နယ် ရွှေမုဌောကျေးရွာသို့ စစ်ကောင်စီတပ်က ဝင်ရောက်ထိုးစစ်ဆင် သိမ်းပိုက်၍ ရွာသူရွာသား (၄၀)ကျော်ကို ဖမ်းဆီးခေါ်ဆောင်သွားပြီး ယနေ့အချိန်ထိ အဆက်အသွယ်နှင့် သတင်းအစအန မရရှိတော့ကြောင်း၊ ဖမ်းဆီးခံရသူများသည် အရွယ်ကောင်း အမျိုးသား၊ အမျိုးသမီးများ ပါဝင်သွားကြောင်း စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

စစ်ကောင်စီတပ်သည် နောင်ချိုမြို့နယ် ပြန်လည်ရရှိရေး အပြင်းအထန် ထိုးစစ်ဆင်နေပြီး TNLA နှင့် DPLA ပူးပေါင်းတပ်များထက် ဒရုန်းနှင့် လေကြောင်းတိုက်ခိုက်ရေး သာလွန်နေသောကြောင့် ကျေးရွာတစ်ချို့ကို သိမ်းပိုက်ရရှိသွားကြောင်း DPLA တပ်သား တစ်ဦးက ပြောသည်။

လက်ရှိတွင် စစ်ကောင်စီတပ်သည် နောင်ချိုမြို့နှင့် ၁၀ မိုင်ခန့် ကွာဝေးသည့် ရှောက်ချိုရွာအထိ နီးကပ်လာပြီး TNLA လက်လွှတ်လိုက်ရသည့် ရွှေမုဌော၊ နောင်လင်နှင့် မဲပုတ် အပြင် တခြားသော ကျေးရွာများမှ ပြည်သူများလည်း ကျောက်မဲမြို့နယ်နှင့် ဘေးလွတ်ရာ ဒေသများသို့ စစ်ဘေးတိမ်းရှောင် ထွက်ပြေးနေကြရသည်။