ထိုင်း-မြန်မာနယ်စပ် တာချီလိတ်မြို့တွင် ရေနုတ်မြောင်းများ ပိတ်ဆို့ခြင်းကြောင့် မိုးသည်းထန်စွာ ရွာသွန်းလျှင် မကြာခဏ ရေကြီးမှုများ ကြုံတွေ့နေရသော်လည်း ဌာနဆိုင်ရာ တာဝန်ရှိသူများက ကူညီဖြေရှင်းပေးခြင်းမရှိကြောင်း သိရသည်။

မုတ်သုံအဝင် ဦးစီးအစမှာပင် မိုးအဆက်မပြတ်ရွာသွန်းမှုကြောင့် တာချီလိတ်မြို့ပေါ်ရှိ နေအိမ်၊ ရပ်ကွက်နှင့် လမ်းများပေါ်တွင် ရေများဝင်ရောက်ကာ ရေကြီးမှုဒဏ်အား ထပ်မံရင်ဆိုင်နေရပြီ ဖြစ်သည်။

သို့သော် ရေကြီးမှုဖြစ်ပေါ်ရသည့် ရေနုတ်မြောင်း ပိတ်ဆို့နေခြင်းကို မည့်သည့် ဌာနဆိုင်ရာ တာဝန်ရှိသူများက ကူညီဖြေရှင်းပေးခြင်းမရှိကြောင်း တာချီလိတ်မြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“အခု ရေတွေကြီးနေတာက ချောင်းရေတက်လို့ မဟုတ်ဘူး။‌ ရေနုတ်မြောင်းတွေပိတ်နေလို့ မိုးရွာရင် ရေထွက်ပေါက်မရှိလို့ ဒီလိုဖြစ်နေရတာ။ မြောင်းတွေထဲမှာလည်း ရွံ့နွံ၊ အမှိုက်တွေက ပိတ်နေတာ။ မိုးတစ်နာရီလောက်ရွာရင် ရေတွေတက်ပြီ။ ရေမြောင်းထဲက အမှိုက်တွေကို တာဝန်ရှိသူတွေက ဖော်ပေးတာ၊ ရှင်းပေးတာမျိုးမရှိဘူး ”ဟု တာချီလိတ်မြို့ ဒေသခံအမျိုးသားတစ်ဦးက ပြောသည်။

တာချီလိတ်မြို့တွင် မိုးအဆက်မပြတ်ရွာသွန်းပြီးလျှင် မယ်ခေါင် ရပ်ကွက်၊ ဆန်ဆိုင်း ရပ်ကွက်၊ တာလော့ရပ်ကွက်ရှိ အိမ်ခြေ ၂၀၀ ကျော်မှာ ရေကြီးမှုဒဏ်ကို အမြဲတစေခံရလေ့ရှိသည်။
ထို့ပြင် ရေကြီးလျှင် ပြည်သူများလည်း သွားလာရန်ခက်ခဲစေပြီး အလုပ်အကိုင်များပါ ထိခိုက်ရကြောင်း တာချီလိတ်မြို့ ဒေသခံတစ်ဦးက ဆက်ပြောသည်။

“တာလော့ဖက်မှာဆို ရွံ့နွံတွေကဘာမှကို မလုပ်ရသေးဘူး။မိုးရွာ ရေကြီးရင် အလုပ်အကိုင်တွေ ပျက်တယ်။ တချို့ဆိုင်တွေဆို ဧည့်သည်တွေတောင်မလာဘူး။ နောက်ခါ ရေကြီးရင် လူတွေတောင် နေရဲတော့မှာ မဟုတ်ဘူး။ တာဝန်ရှိသူတွေကလည်း လာကြည့်ပြီး ဓာတ်ပုံပဲရိုက်သွားတယ်၊ ဘာမှလည်း မလုပ်ပေးဘူး။ မယ်ဆိုင်ချောင်းဘေးမှာတော့ ရေမဝင်အောင် အုတ်တံတိုင်းတွေကာပေးတာရှိပေမယ့် မြို့ထဲက ပြဿနာတွေတော့ ဖြေရှင်းပေးတာမရှိဘူး” ဟု ၎င်းကပြောသည်။

ဒေသခံများသည် မြို့တွင်း ကြုံတွေ့နေရသည့် ရေကြီးမှုပြဿနာနှင့် အခက်ခဲများကို သက်ဆိုင်ရာ တာဝန်ရှိသူများထံသို့ တင်ပြခဲ့သော်လည်း လာရောက်ကူညီဖြေရှင်းပေးခြင်း မရှိသေးကြောင်း ဒေသခံများက ပြောသည်။

တာချီလိတ်မြို့တွင် မိုးအဆက်မပြတ် ရွာသွန်းလျှင် ယမန်နှစ်ကဲ့သို့ စံချိန်တင် ရေကြီးရေလျှံမှု ထပ်မံဖြစ်ပေါ်မည်ကိုလည်း ဒေသခံများက စိုးရိမ်နေလျက်ရှိသည်။

ထိုင်း-မြန်မာနယ်စပ် မယ်ဆိုင်ချောင်းတစ်လျှောက်ရှိ သတ္တုတွင်းနှင့် ရွှေတူးဖော်မှုလုပ်ငန်းများမှ စွန့်ပစ်မြေများကြောင့် ချောင်းရေများတိမ်ကောလာကာ မိုးအဆက်မပြတ်ရွာသွန်းလျှင် နှစ်စဉ်နှစ်တိုင်း ရေကြီးရေလျှံမှု ဖြစ်ပေါ်နေကြောင်း သိရသည်။