သျှမ်းပြည် ပင်လောင်းမြို့နယ်တွင် စစ်ကောင်စီတပ်နှင့် ၎င်းလက်အောက်ခံ ပအိုဝ်းပြည်သူ့စစ် PNO တို့အတွက် ဒေသခံများက စစ်မှုထမ်းထောက်ပံ့ကြေးများ ထည့်နေရကြောင်း သတင်းရရှိသည်။

ယခု ဇွန်လ ပထမပတ်တွင် ပင်လောင်းမြို့ပေါ်နှင့် မြို့အနီးရှိ ကျေးရွာအုပ်စုများတွင် စစ်ကောင်စီ လက်အောက်ခံ ကျေးရွာအုပ်ချုပ်ရေးမှူးတို့က ဒေသခံများကို အကြောင်းအမျိုးမျိုးပြ၍ စစ်ကောင်စီတပ်နှင့် ပအိုဝ်းပြည်သူ့စစ် PNO တို့အတွက် စစ်မှုထမ်းထောက်ပံ့ကြေးများ ကောက်ခံနေကြောင်း သတင်းရင်းမြစ်တစ်ဦး သျှမ်းသံတော်ဆင့်ကို ပြောသည်။

“ရွာတွေဘက်ရယ် ကျနော်တို့ မြို့ပေါ်ဘက်တွေကိုလည်း ကောက်တယ်။ ဘယ်မှာသုံးလဲ ဒါမှမဟုတ် တခြား အကြောင်းပြချက်နဲ့ ကောက်တာ အတိအကျ မပြောပြဘူး။ တစ်လ တစ်ခါ နှစ်လ တစ်ခါ ကောက်တယ်။ သူတို့က စစ်သားအတွက် မဟုတ်ရင် ဒီလောက်အများကြီး မကောက်ဘူး။ ကောက်တာ ၃ခါ လောက်ရှိပြီ သတင်းသိပ်မထွက်တာတစ်ခုပဲ”ဟု ပင်လောင်းဒေသခံ သတင်းရင်းမြစ်တစ်ဦးက ပြောသည်။

ပင်လောင်းမြို့ပေါ်နှင့် မြို့အနီး ကျေးရွာအုပ်စုရှိ ဒေသခံများထံ စစ်ကောင်စီခန့်အပ်ထားသည့် ကျေးရွာအုပ်ချုပ်ရေးမှူးများက တစ်အိမ်လျှင် ကျပ် ၁ သောင်းခွဲမှ ၂ သောင်းအထိ ကောက်ခံခဲ့ကြောင်း ၎င်းက ပြောသည်။

ပြီးခဲ့သည့် မေလထဲတွင် ပင်လောင်းမြို့နယ်၊ ဘုရားဖြူ၊ တီကျစ်ကျေးရွာအုပ်စု ဘက်တွင်လည်း စစ်ကောင်စီ လက်အောက်ခံ ပအိုဝ်းပြည်သူ့စစ် PNO တို့က စစ်ထောက်ပံ့ကြေးများ ကောက်ခံပြီး ထမင်းဟင်းထုပ်များပါ ပို့ခိုင်းခဲ့ကြောင်း သိရသည်။

ဆက်လက်၍ ယခု ဇွန်လ ပထမပတ်အတွင်း စစ်ကောင်စီတပ်နှင့်‌ ၎င်းလက်အောက်ခံ ပအိုဝ်းပြည်သူ့စစ် PNO တို့က ညောင်ရွှေမြို့နယ်၊ ဘုရားတောင် လွယ်နွဲ့ကျေးရွာနှင့် ရေပူ(ထီခိုး) ရွာကို စစ်ကြောင်းထိုးဝင်ရောက်ခဲ့ပြီး တော်လှန်ရေးတပ်ဖွဲ့နှင့် တိုက်ပွဲများ ဖြစ်ပွားတာ ကျေးရွာရှိ နေအိမ်များကိုလည်း မီးရှို့ဖျက်ဆီးခဲ့ကြောင်း သိရသည်။