အဆိုတော် ချမ်းချမ်း၏ ခိုင်းစေမှုဖြင့် အွန်လိုင်းမှတစ်ဆင့် ကုန်ပစ္စည်းများကို တရားမဝင်ရောင်းချပြီး ပြည်သူ့ကာကွယ်ရေးတပ် (PDF) ကို ထောက်ပံ့သည်ဟုဆိုကာ လူ ၂ ဦးကို စစ်ကောင်စီက ဖမ်းဆီးခဲ့ကြောင်း စစ်ကောင်စီကထုတ်ပြန်သည်။

ပြီးခဲ့သည့် ဧပြီလ ၁၃ ရက်တွင် မန္တလေးတိုင်း ချမ်းအေးသာစံမြို့နယ် အောင်နန်းရိပ်သာအရှေ့ရပ်ကွက်နေ Treasure Hnin Online Shop လုပ်ကိုင်သူ ဖြူဖြူနှင်းနှင့် မေလ ၈ ရက်တွင် ရန်ကုန်တိုင်း ဒဂုံမြို့သစ်တောင်ပိုင်း မြို့နယ် ၅၄ ရပ်ကွက် ချယ်ရီ ၁ လမ်းနှင့် ရွှေသပြေလမ်းထောင့် အမှတ် (၃/က)နေ ဘုန်မြင့်အောင်အား ဖမ်းဆီးခဲ့သည်ဟု ယနေ့ (ဇွန်၃)ရက်ထုတ် မြန်မာ့အလင်းသတင်းစာတွင် ထုတ်ပြန်သည်။

အဆိုပါ ဖမ်းဆီးရမိသူနှစ်ဦး၏ ထွက်ဆိုချက်အရ နိုင်ငံဝန်ထမ်းများ လှုပ်ရှားမှုတွင် ပါဝင်ရန်လှုံ့ဆော်ခြင်း၊ နိုင်ငံတော် တည်ငြိမ်အေးချမ်းမှုကို ပျက်ပြားစေရန်နှင့် ဆူပူအုံကြွမှုဖြစ်ပေါ်ရန် Social Media များမှတစ်ဆင့် Post တင် ရေးသားခဲ့ခြင်းတို့ကြောင့် ဆိုသည်။

ထို့ပြင် ရာဇသတ်ကြီးပုဒ်မ ၅၀၅-က ဖြင့် အမှုဖွင့်လှစ်ခံရပြီး ပြည်ပသို့ ထွက်ပြေးတိမ်း အဆိုတော် ချမ်းချမ်း၏ ခိုင်စေချက်အရ ပြည်ပမှတရားမဝင်တင်ပို့လိုက်သော နိုင်ငံခြားဖြစ်ပစ္စည်းများအား အခကြေးငွေဖြင့် ထပ်ဆင့် ဖြန့်ဝေရောင်းချခြင်း၊ ငွေကြေးကောက်ခံပေးခြင်းနှင့် အဆိုတော်ချမ်းချမ်း ပေးပို့စေလိုသော အဖွဲ့အစည်းများအား ငွေကြေးထောက်ပံ့ပေးခြင်းများ ဆောင်ရွက်ရသူများဖြစ်ကြောင်း စစ်ကောင်စီက ဆိုသည်။

ထိုကြောင့် ဖမ်းဆီးရမိသူနှစ်ဦးကို မှတ်ပုံတင် လက်မှတ်မရှိဘဲ ပြည်တွင်း/ ပြည်ပမှ တရားမဝင်ရောင်းချခြင်း၊ ပြည်ပမှ ဥပဒေမဲ့တင်သွင်းရောင်းချသူများနှင့် ချိတ်ဆက်၍ ထပ်ဆင့်ဖြန့်ဝေရောင်းချခြင်းကြောင့် ဥပဒေနှင့်အညီ ထိရောက်စွာအရေးယူမည်ဟု စစ်ကောင်စီက ထုတ်ပြန်ထားသည်။

အမျိုးသားညီညွတ်ရေး အစိုးရ (NUG)၊ ပြည်သူ့ကာကွယ်ရေးတပ် (PDF) အဖွဲ့အစည်းများအား ထောက်ပံ့နိုင်ရန် လူမှုကွန်ရက်များပေါ်တွင် တရားမဝင် ဈေးရောင်းချနေသည့် ဆယ်လီများထံမှ ကုန်ပစ္စည်း ဝယ်ယူပါက အကြမ်းဖက်ဥပဒေနှင့်အညီ ထိရောက်စွာအရေးယူမည်ဟုလည်း စစ်ကောင်စီကဆိုထားသည်။