ကချင်ပြည်နယ် မြစ်ကြီးနားမြို့ရှိ ဧရာဝတီမြစ်ရေသည် စိုးရိမ်ရေမှတ် အထက်တွင်ရှိနေပြီး မြစ်ကမ်းဘေးနှင့် မြေအနိမ့်ပိုင်းတွင် နေထိုင်သည့် နေအိမ်များ ရေကြီးမှုကြုံနေရသဖြင့် ပြောင်းရွှေ့နေရကြောင်း သတင်းရရှိသည်။

ယမန်နေ့ (ဇွန်လ ၁ ရက်) မှ ယနေ့အချိန်ထိ မြစ်ကြီးနားမြို့ရှိ ဧရာဝတီ မြစ်ဘေးအနီးနှင့် မြေနိမ့်ပိုင်းတွင် နေထိုင်နေသည့် ဒေသခံများသည် ဘေးလွတ်ရာသို့ ပြောင်းရွှေ့နေထိုင်နေကြပြီး၊ ရပ်ကွက်အတွင်း ရေကြီးရေလျှံခြင်း၊ နေအိမ်ရေနစ်မြုပ်ခြင်းများ ကြုံတွေ့နေရကြောင်း မြစ်ကြီးနားမြို့ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။

“အခု မြေနိမ့်ပိုင်း ရပ်ကွက်တွေမှာရှိတဲ့ နေအိမ်တွေ ရေဝင်နေပြီ။ အဲ့နားတွေမှာ နေတဲ့လူတွေက ကုန်းမြင့်ပိုင်းကို ပြောင်းနေရတယ်။ စာရင်းတွေက အတိအကျတော့ မရသေးဘူး။ ဒီနှစ်က အရင်နှစ်လိုတော့ အခြေအနေ မဆိုးသေးဘူး။ မိုးဆက်တိုက် ရွာခဲ့မယ်ဆိုရင်တော့ မနှစ်ကလို ရပ်ကွက်တော်တော်များများ ရေကြီးနိုင်လို့ စိုးရိမ်ရတယ်”ဟု မြစ်ကြီးနားမြို့ ဒေသခံအမျိုးသမီးတစ်ဦးက ပြောသည်။

မြစ်ကြီးနားမြို့‌ပေါ်ရှိ ကြက်ပေါင်ခြံ၊ ရမ်ပူ၊ အလယ်ကုန်း၊ မြို့သစ်တည်၊ ဂျာမိုင်းဂေါင်းနှင့် မနောကွင်း စသည့် ရပ်ကွက်တို့တွင် ရေကြီးနေပြီး ယနေ့ (ဇွန်လ ၂ ရက်) နေ့လည်တွင် ရပ်ကွက်အချို့၌ ရေပြန်ကျသွားကြောင်း ၎င်းကပြောသည်။

ပြီးခဲ့သည့် မေလ နောက်ဆုံးပတ်ကတည်းက ကချင်ပြည်နယ်တွင် မိုးအဆက်မပြတ် ရွာသွန်းခြင်းကြောင့် မေခ၊ မလိခ မြစ်ရေကြီးပြီး ဧရာဝတီမြစ်ကြောင်းတလျှောက် ရေတဟုန်ထိုး တက်လာကြောင်း သိရသည်။

စစ်ကောင်စီလက်အောက်ခံ မိုးလေဝသနှင့် ဇလဗေဒညွှန်ကြားရေးဦးစီးဌာနမှ မြန်မာနိုင်ငံတဝန်း မြစ်ရေကြီးခြင်း၊ မိုးသည်းထန်စွာ ရွာသွန်းခြင်းများ ဖြစ်ပေါ်နိုင်ခြင်းကြောင့် မြေနိမ့်ပိုင်းရပ်ကွက်နေ ပြည်သူများအနေဖြင့် သတိပြုနေထိုင်ကြရန် သတိပေး ထုတ်ပြန်ထားသည်။

မြစ်ကြီးနားမြို့ ဧရာဝတီမြစ်ရေ စိုးရိမ်ရေအမှတ်မှာ ၁၂၀၀ စင်တီမီတာဖြစ်ပြီး ၁၄၀၀ စင်တီမီတာသို့ရောက်ရှိပါက အရေးပေါ်အခြေအနေအဖြစ် သတ်မှတ်ကြောင်း သိရသည်။

ပြီးခဲ့သည့် ၂၀၂၄ ခုနှစ်တွင် မြစ်ကြီးနားမြို့၌ စိုးရိမ်ရေမှတ်အထက် ၁၄၀၆ စင်တီမီတာအထိ မြင့်တက်ခဲ့သောကြောင့် မြို့အတွင်းရှိ ရပ်ကွက်များမှာ သုံးပုံနှစ်ပုံခန့် ရေဝင်ရောက်ခဲ့ပြီး ၂၀၀၄ ခုနှစ်ကလည်း ဧရာဝတီမြစ်ရေမှာ ၁၄၀၈ စင်တီမီတာအထိ မြင့်တက်ခဲ့ကြောင်း သိရသည်။