သျှမ်းပြည် လွိုင်လင်မြို့နယ် ပင်လုံမြို့ရှိ မြို့လယ်ရေကန်ထဲတွင် ငါးများ အဆိပ်သင့်ကာ အစုလိုက်အပြုံလိုက် သေဆုံးနေကြောင်း သတင်းရရှိသည်။
ယနေ့ (ဇွန်လ ၂ ရက်) နံနက်ပိုင်းတွင် ပင်လုံမြို့ရှိ မြို့လယ် ရေကန်ထဲတွင် ငါးများ အစုလိုက်အပြုံလိုက် အဆိပ်မိပြီး သေဆုံးနေကြောင်း စည်ပင်သာယာရေးဌာနမှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
“ငါးတွေ သေတာများတယ်၊ အကောင် ၁ထောင်ကျော်မယ်။ ခရိုင်က ငါးလုပ်ငန်းဦးစီးဌာနကို အကူအညီခေါ်ပြီး စစ်ဆေးကြည့်တော့ အဆိပ်မိတယ်လို့ သိရတယ်။ ရေမကောင်းလို့ ဒီတိုင်းသေရင် ပုပ်နံ့မထွက်သင့်သေးဘူး။ အခုက သေပြီးခဏမှာပဲ အနံ့ဆိုးတွေ ထွက်တယ်”ဟု စည်ပင်သာယာရေးဌာနမှ ၎င်းတာဝန်ရှိသူက ပြောသည်။
ထိုသေဆုံးသွားသည့် ငါးများကို မြို့၏ အခြားနေရာတွင် မြေမြှုပ်လိုက်ပြီး အခြားသော တိရစ္ဆာန်များအတွက် အန္တရာယ်မဖြစ်အောင် ပြုလုပ်ခဲ့ပြီး မြို့လယ်ရေကန်ထဲမှ ရေများကို လဲလှယ်သွားမည် ဖြစ်ကြောင်း သိရသည်။
အလားတူ ပြီးခဲ့သည့် မေလ ပထမပတ်တွင်လည်း မိုးဗြဲမြို့ရှိ ဆည်၊ မြောင်းထဲတွင် အကြောင်းရင်း မသိရဘဲ ငါးများ အစုလိုက်အပြုံလိုက် သေဆုံးခဲ့ကြောင်း ဒေသခံများထံမှ သိရသည်။
Leave a Comments