သျှမ်းပြည် တောင်ကြီးမြို့တွင် လိုင်စင်မဲ့ မော်တော်ကားနှင့် ဆိုင်ကယ်များကို နေအိမ်၊ ဘုန်းကြီးကျောင်းထဲအထိ ဝင်ရောက်ဖမ်းဆီးနေသောကြောင့် သွားရေးလာရေးအတွက် အဆင်မပြေ ဖြစ်နေကြရသည်ဟု စုံစမ်းသိရှိရသည်။

ယမန်နေ့ (ဇွန်လ ၁ ရက်)တွင် စစ်ကောင်စီလက်အောက်ခံ ရဲတပ်ဖွဲ့နှင့် ယာဉ်ထိန်းရဲများက တောင်ကြီးမြို့ လမ်းဆုံ၊ ရပ်ကွက်လမ်းများတွင် လိုင်စင်မဲ့ ကားနှင့် ဆိုင်ကယ်များကို ပိတ်ဆို့ဖမ်းဆီးနေပြီး ဖမ်းဆီးခံရသည့် ကားနှင့် ဆိုင်ကယ်များကို ပြန်လည်ရွေးထုတ်၍ မရတော့ကြောင်း မြို့ခံများက ပြောသည်။

“ကျနော်ပင်ပင်ပန်းပန်းစုပြီး ဝယ်ထားတဲ့ ကားလေးကတော့ ပါသွားပြီဗျာ။ မြင်းရုပ်နားမှာ မနေ့က ဖမ်းခံရတာ၊ ဒီတိုင်းပဲ သိမ်းသွားတာ။ ဘယ်မှာ လိုက်ရွေးလို့ ရတယ်ဆိုတာလည်း ဘာမှ မပြောခဲ့ဘူး၊ သူတို့က အကုန်ကို သိမ်းတော့တာပဲ။ တချို့က ဘုန်းကြီးကားဆို မသိမ်းလောက်ဘူး ဆိုလို့ ဘုန်းကြီးကျောင်း သွားထားတာ၊ ဘုန်းကြီးကျောင်းထဲပါ ဝင်ဖမ်းတာ။ သတင်းပေးတဲ့လူရှိရင် နေအိမ်အထိပါ ဝင်စစ်ပြီး ဖမ်းတာ” ဟု ကားသိမ်းခံလိုက်ရသည့် တောင်ကြီးမြို့ခံ အမျိုးသားတစ်ဦးက ပြောသည်။

ထိုသို့ လိုင်စင်မဲ့ကားများ ဖမ်းဆီးရာတွင် စစ်ကောင်စီလက်အောက်ခံ ယာဉ်ထိန်းရဲ အစရှိသည့် အရာရှိများနှင့် ရင်းနှီးမှုရှိလျှင် ပြန်လည်ရွေးထုတ်နိုင်ကြောင်း ၎င်းက ဆက်ပြောသည်။

မော်တော်ကားနှင့် ဆိုင်ကယ်များကို လိုင်စင်လုပ်ဆောင်လျှင် နှစ်စီးစာ ကုန်ကျသောကြောင့် လိုင်စင်မလုပ်ကြဘဲ စစ်ဆေးခံရ၍ ဖမ်းဆီးမိသည့်အခါ ငွေအနည်းငယ်မျှ ပေးပြီး ဖြေရှင်းသွားလာ ခဲ့ကြသည်ဟု မြို့ခံအမျိုးသားတစ်ဦးက ပြောသည်။

“လိုင်စင်တစ်ခါလုပ်ရင် သူ့ရဲ့ လမ်းစဉ်က အရမ်းကြာတယ်။ ကားဝယ်တာက ကျပ်သိန်း(၁၀၀)ဆို လိုင်စင်လုပ်တာက သိန်း (၂၀၀)လောက် ကုန်တာ။ ကိုယ်ဝယ်တဲ့ ဆိုင်ကယ်နဲ့ ကားရဲ့ နှစ်စီးစာဆိုတော့ ဘယ်သူက လုပ်တော့မလဲ။ နောက်ပြီး အစိုးရဝန်ထမ်းပိုင်းတွေနဲ့ ဆက်ဆံတဲ့ အခါ အဆင်မပြေတာတွေ များတော့ မလုပ်ကြတာပါတယ်။ လမ်းမှာ အစစ်အဆေးတွေ့ရင် ကျပ်(၅၀၀၀) (၁၀၀၀၀) ပေးပြီး စီးလာတာ” ဟု အဆိုပါ အမျိုးသားက ပြောသည်။

ထို့အပြင် တောင်ကြီးမြို့ပေါ်ရှိ ဆိုင်ကယ်အရောင်းပြခန်းအထိ လိုင်စင်မဲ့ ဆိုင်ကယ်များအား ယမန်နေ့ (ဇွန်လ ၁ ရက်) တွင် လိုက်လံ စစ်ဆေးဖမ်းဆီးနေကြောင်း ၎င်းက ဆက်ပြောသည်။

ယခုရက်ပိုင်းအတွင်း လိုင်စင်မဲ့ယာဉ်များ ဖမ်းဆီးမှု ပိုမိုများပြားလာသောကြောင့် ဈေးဝယ်ရန်နှင့် ကလေးကျောင်းကြိုပို့ရန်အတွက် အခက်အခဲဖြစ်နေရပြီး လမ်းသွားလမ်းလာများအား သတိထား သွားလာရန်၊ ကားနှင့်ဆိုင်ကယ်များကို လုံခြုံသည့်နေရာသို့ ပို့ဆောင်ထားရန် မြို့ခံ အမျိုးသမီးတစ်ဦးက အကြံပြုပြောကြားသည်။

ပြီးခဲ့သည့် မေလ (၃၁)ရက်တွင်လည်း လိုင်စင်မဲ့ မော်တော်ယာဉ်များအား လိုက်လံဖမ်းဆီးနေသောကြောင့် ဆန္ဒပြရန် ထီလက်မှတ်နှင့် ငွေစက္ကူပေါ်တွင် “ဟွန်းတီး ဆန္ဒပြပါ” ဟု စာရေးသား၍ လူအများ စုဝေးတတ်သည့် နေရာများတွင် ဖြန့်ကြဲထားကာ စည်းရုံးလှုံ့ဆော်မှု ပြုလုပ်ခဲ့သည်ဟု သိရသည်။

အလားတူ သျှမ်းပြည်တောင်ပိုင်း မြို့ကြီးများဖြစ်သည့် အောင်ပန်း၊ ရပ်စောက်၊ ပင်လောင်း၊ ဟဲဟိုး၊ ညောင်ရွှေ အပါအဝင် သျှမ်းပြည်အရှေ့ပိုင်း တာချီလိတ်မြို့တွင်လည်း လိုင်စင်မဲ့ ယာဉ်များကို စစ်ကောင်စီလက်အောက်ခံ ယာဉ်ထိန်းရဲတပ်ဖွဲ့မှ လိုက်လံရှာဖွေ ဖမ်းဆီးပြီး သိမ်းယူနေကြောင်း ဒေသခံများက ပြောသည်။