သျှမ်းပြည်တောင်ပိုင်း နမ့်စန်မြို့ရှိ စစ်ကောင်စီလက်အောက်ခံ အထွေထွေအုပ်ချုပ်ရေးဦးစီးဌာနမှ မြို့ပေါ်ရပ်ကွက်နေ ပြည်သူများကို စစ်မှုထမ်းအပတ်စဉ်သစ် အတွက် မဲနှိုက်ရန် ဆင့်ခေါ်စာပို့ထားကြောင်း စုံစမ်းသိရသည်။
မေလ နောက်ဆုံးပတ်မှ စတင်ပြီး နမ့်စန်မြို့ရှိ စစ်ကောင်စီတပ်နှင့် ၎င်းလက်အောက်ခံ ထွေအုပ်ရုံးမှ မြို့ပေါ်ရပ်ကွက် (၄) ခုအတွင်း နေထိုင်သည့် စစ်မှုထမ်းအကျုံးဝင် အမျိုးသားရှိရာ နေအိမ်များသို့ ဆင့်ခေါ်စာပေးပို့ခဲ့ပြီး ၎င်းစာထဲတွင် ထွေအုပ်ရုံး၌ မဲနှိုက်ရန် ပါရှိကြောင်း ဒေသခံများက ပြောသည်။
လာမည့် ဇွန်လ (၂) ရက်နေ့တွင် နမ့်စန်မြို့ ရပ်ကွက်(၁) မှ ၂၀ ဦး၊ ရပ်ကွက် (၂) မှ ၁၀ ဦး မဲနှိုက်ရန် ကနဦး သိရှိထားပြီး ကျန်ရှိသည့် ရပ်ကွက်များမှလည်း ထွေအုပ်ရုံးသို့ မဲနှိုက်ရန် သွားရောက်ရမည်ဖြစ်ကြောင်း ဆိုသည်။
“အခုက ရပ်ကွက်ထဲ ခေါ်နေပြီ။ ရပ်ကွက် (၁) က အယောက် ၂၀ ခေါ်တယ်၊ အဲ့တာကို မဲနှိုက်ပြီး ၆ ယောက် သွားရမယ်လို့ ပြောတယ်။ ရုံးကို ခေါ်သွားပြီး မဲနှိုက်မယ်လို့ ပြောတယ်။ နောင်ဖာမှာ ၃ ယောက်၊ ရေငုပ်ကျောင်းဘက် ၂ ယောက်၊ ကုလားရပ် ၅ ယောက် သိထားတာ”ဟု နမ့်စန်မြို့မှ လူငယ်တစ်ဦးက သျှမ်းသံတော်ဆင့်ကို ပြောသည်။
နမ့်စန်မြို့ပေါ် ရပ်ကွက်များတွင် ယခုကဲ့သို့ စာပို့၍ စစ်မှုထမ်းဆင့်ခေါ်ခြင်း မရှိခဲ့ဖူးဘဲ ယခင်က စစ်မှုထမ်းသင်တန်းများသို့ စစ်ကောင်စီလက်အောက်ခံ ရဲတပ်ဖွဲ့မှ မူးယစ်ဆေးဝါး သုံးစွဲသူများကို လိုက်လံဖမ်းဆီးကာ ပို့ဆောင်ခဲ့ခြင်းကြောင့် စစ်မှုထမ်းမဲနှိုက်ရန် စာပို့ခံရသည့် နေအိမ်များမှ မိဘဆွေမျိုးများမှာ စိုးရိမ်ထိတ်လန့်နေကြောင်း သိရသည်။
“အရင်က အရက်သမားနဲ့ ဆေးသုံးတဲ့လူတွေ ထည့်လိုက်တာ၊ အခုက ကုန်သလောက် ဖြစ်နေပြီ။ မဲနှိုက်လို့ စစ်မှုထမ်းရမယ့်အထဲ ပါရင်တော့ ညှိနှိုင်းပြီး ပြန်ခေါ်လာဖို့က ခက်သွားပြီ၊ လူစားထိုးလို့လည်း မရဘူး။ စာပို့ခံရတဲ့အိမ်က မိဘတွေဆို စိုးရိမ်လွန်ပြီးတော့ မအိပ်နိုင် မစားနိုင် ဖြစ်နေကြပြီ”ဟု နမ့်စန်ဒေသခံ ၎င်းလူငယ်က သျှမ်းသံတော်ဆင့်ကို ဆက်ပြောသည်။
နမ့်စန်မြို့နယ်အတွင်းရှိ ခိုလမ်မြို့အခြေစိုက် အရှေ့အလယ်ပိုင်း တိုင်းစစ်ဌာနချုပ် (ရလခ) မှ စစ်မှုထမ်းသင်တန်း အမှတ်စဉ် (၁၃) ကို ကျိုင်းတောင်းမြို့ရှိ လေ့ကျင့်ရေးကျောင်းတွင် မေလ ၁၉ ရက်နေ့က ရလခ တိုင်းမှူး ဗိုလ်ချုပ် မျိုးမင်းထွန်း ကိုယ်တိုင် ဖွင့်ပွဲတက်ရောက်ခဲ့ကြောင်း စစ်ကောင်စီထိန်းချုပ် တယ်လီဂရမ်ချန်နယ်များတွင် ဖော်ပြသည်။
စစ်ကောင်စီတပ်သည် တိုင်းရင်းသားလက်နက်ကိုင် တော်လှန်ရေးတပ်ဖွဲ့နှင့် PDF များထံ လက်လွှတ်ဆုံးရှုံးထားသည့် နယ်မြေများကို ၆ လအတွင်း ပြန်လည်သိမ်းယူရေးအတွက် မိုးတွင်းကာလတွင်ပါ လေကြောင်းတိုက်ခိုက်မှုများနှင့် နယ်မြေရှင်းလင်းမှုများ အဆက်မပြတ် လုပ်ဆောင်သွားရန် မေလ ၁၅-၁၆ ရက်နေ့များတွင် ပြုလုပ်ခဲ့သည့် စစ်ရေးဆိုင်ရာ အစည်းအဝေးတွင် ဆုံးဖြတ်ခဲ့ကြောင်း ဆိုသည်။
စစ်ကောင်စီ ကျင်းပမည့် ရွေးကောက်ပွဲမတိုင်ခင် ၆ လအတွင်း ဆုံးရှုံးနယ်မြေများကို ပြန်လည်ရရှိရေး ထိုးစစ်များတွင် စစ်မှုထမ်းသင်တန်းဆင်း တပ်သားသစ်များ၏ အင်အားကို အဓိကထား အသုံးပြုမည်ဖြစ်ကြောင်း နေပြည်တော်စစ်ရေး သတင်းရင်းမြစ်ကို ကိုးကား၍ ခေတ်သစ်သတင်းဌာနက မေလ ၂၀ ရက်တွင် သတင်းရေးသားထားသည်။
Leave a Comments