ထိုင်း-မြန်မာနယ်စပ် မြေရှားသတ္တုနှင့် ရွှေတူးဖော်မှုများမှ စွန့်ပစ်ပစ္စည်း ညစ်ညမ်းမှုများကြောင့် နမ့်ခုတ်မြစ်အတွင်း အာဆင်းနစ် ပါဝင်မှု သတ်မှတ်စံချိန်ထက် လွန်ကဲနေသည့် ကိစ္စရပ်များကို ဆွေးနွေးရန် စစ်ကောင်စီနှင့် တွေ့ဆုံမည်ဟု ထိုင်းနိုင်ငံ ဒုဝန်ကြီးချုပ် ပရာဆတ် ချန်တရာရွန်ထောင် (Prasert Jantararuangtong) က ပြောသည်။

ယမန်နေ့ (မေလ ၂၇ ရက်) တွင် ထိုင်းနိုင်ငံ ချင်းရိုင်းခရိုင် မြို့တော်ခန်းမ၌ ပြုလုပ်ခဲ့သည့် အစည်းအဝေးအတွင်း ထိုင်းဒုဝန်ကြီးချုပ် မစ္စတာ ပရာဆတ်က ထိုကဲ့သို့ ပြောဆိုခဲ့ကြောင်း ဘန်ကောက်ပိုစ့်သတင်း၌ ဖော်ပြထားသည်။

နမ့်ခုတ်မြစ်ရေ ညစ်ညမ်းမှုနှင့် ပတ်သက်၍ ဆွေးနွေးမှုများ ပြုလုပ်ခဲ့သော်လည်း မူဝါဒ ချမှတ်နိုင်သည့် အဆင့်ထိ ဆွေးနွေးမှု မပြုလုပ်ရသေးကြောင်း၊ ထိုင်းနိုင်ငံခြားရေးဝန်ကြီးဌာနသည် ဒုဝန်ကြီးချုပ်ခရီးစဉ် မတိုင်မီ မြန်မာအာဏာပိုင်များနှင့် တွေ့ဆုံညှိနှိုင်းရမည့် နေ့ရက်များကို စီမံနေကြောင်း မစ္စတာ ပရာဆတ်က ပြောသည်။

သို့သော် စစ်ကောင်စီနှင့် တွေ့ဆုံဆွေးနွေးရန် မြန်မာနိုင်ငံသို့ လာရောက်မည့် ခရီးစဉ်နှင့် ပတ်သက်၍ အသေးစိတ်ကို မသိရသေးပေ။

ထိုင်းနိုင်ငံမြောက်ပိုင်း ချင်းမိုင်နှင့် ချင်းရိုင်းခရိုင်တို့တွင် ဖြတ်သန်းစီးဆင်းနေသည့် နမ့်ခုတ်မြစ်အတွင်း ရေထုညစ်ညမ်းမှုဆိုင်ရာ စိုးရိမ်မှုများကို ထိုင်းအစိုးရက ဦးစားပေး လုပ်ဆောင်နေကြောင်း ရေအရင်းအမြစ် အရည်အသွေး မြှင့်တင်ရေးအထူးဆပ်ကော်မတီ ဥက္ကဋ္ဌလည်းဖြစ်သည့် မစ္စတာ ပရာဆတ်က ပြောသည်။

စစ်ကောင်စီနှင့် ‘ဝ’တပ်ဖွဲ့ UWSA ပူးတွဲထိန်းချုပ်ထားသည့် မိုင်းဆတ်ခရိုင်အတွင်း မြေရှားသတ္တုနှင့် ရွှေတူးဖော်မှုများကြောင့် နမ့်ခုတ်မြစ်ရေ ညစ်ညမ်းမှုနှင့် ပတ်သက်၍ မြန်မာနိုင်ငံ အာဏာပိုင်များနှင့် ညှိနှိုင်းရန်ရှိသော်လည်း အကဲဆတ်နိုင်သည်ဟုလည်း ၎င်းက မှတ်ချက်ပြုသည်။

ထိုင်း-မြန်မာနယ်စပ် နမ့်ခုတ်မြစ်ရေ ညစ်ညမ်းမှုပြဿနာကို ဖြေရှင်းရာတွင် မူလဇာစ်မြစ်ကို နှစ်နိုင်ငံစလုံးက သဘောတူရမည် ဖြစ်ကြောင်း၊ ထိုင်းနိုင်ငံအနေဖြင့် ဂြိုလ်တုဓာတ်ပုံများ ရရှိထားကြောင်း မစ္စတာ ပရာဆတ်က ပြောသည်။

ထို့အပြင် နမ့်ခုတ်မြစ်ထဲရှိ ငါးများ၏ အရေပြားပေါ်တွင် အနီရောင်အဖုများ တွေ့ရှိသည့် အစီရင်ခံစာများနှင့် ပတ်သက်ပြီး စိုးရိမ်ပူပန်မှုများကို မစ္စတာပရာဆတ်က ရှင်းလင်းပြောကြားခဲ့ပြီး ယင်းအခြေအနေမှာ အာဆင်းနစ်ကြောင့် မဟုတ်သော်လည်း ရေထဲရှိ အခြားသော ဘက်တီးရီးယားပိုးများကြောင့် ဖြစ်နိုင်ကြောင်း ဆိုသည်။

ရေအရည်အသွေး စမ်းသပ်မှုရလဒ်များသည် အများအားဖြင့် ပုံမှန်အခြေအနေ ရှိခဲ့သော်လည်း အာဆင်းနစ် ပါဝင်မှု ပမာဏသည် ထိုင်း-မြန်မာနယ်စပ်၌ ပုံမှန်ထက် ပိုများနေခြင်းကြောင့် နမ့်ခုတ်မြစ်အတွင်း ရေများကို တိုက်ရိုက်ထိတွေ့ခြင်း သို့မဟုတ် သောက်သုံးခြင်းပြုရန် မစ္စတာ ပရာဆတ်က သတိပေးခဲ့သည်။

မြေရှားသတ္တုနှင့် ရွှေတူးဖော်မှုများ တည်ရှိရာ ‘ဝ’ပြည်သွေးစည်းညီညွတ်ရေးတပ်မတော် UWSA ထိန်းချုပ်နယ်မြေသည် စစ်ကောင်စီမှ အပြည့်အဝ စိုးမိုးထားသည့် နယ်မြေမဟုတ်သောကြောင့် ထိုင်းအစိုးရအနေဖြင့် စစ်ကောင်စီနှင့် ညှိနှိုင်းခြင်းဖြင့် ပြဿနာဖြေရှင်းရာတွင် ထိရောက်မည် မဟုတ်သကဲ့သို့ တရုတ်နှင့်သာ ညှိနှိုင်းဆွေးနွေးသင့်ကြောင်း ထိုင်းလွှတ်တော်မှ အတိုက်အခံအမတ်ဖြစ်သူ မစ္စတာ ကန်နဝီက ပြောဆိုထားသည်။