ထိုင်းနိုင်ငံ ချင်းတောင်း (Chiang Dao) ခရိုင် Ban Mae Cha Nuea ရှိ တောလမ်းတွင် ထိုင်းနယ်ခြားစောင့်ရဲတပ်ဖွဲ့ အမှတ် ၃၃၅ မှ စိတ်ကြွဆေးပြား ၂,၃၀၀,၀၀၀ ပြားကို သိမ်းဆည်းရမိကြောင်း မယ်ဆိုင်သတင်းက ဖော်ပြသည်။

ယမန်နေ့ မေလ ၂၇ ရက် ညနေ့ပိုင်းတွင် Ban Mae Cha Nuea ရှိ တောင်ကုန်းတစ်ခုပေါ်တွင် လူတစ်စု၏ ခြေရာများကို တွေ့ရှိသဖြင့် အနီးပတ်ဝန်းကျင်ကို စောင့်ကြည့်ရန် တပ်ဖွဲ့ဝင်များ ဖွဲ့စည်းခဲ့ပြီး စောင့်ဖမ်းရာမှ စိတ်ကြွဆေးပြားများ သိမ်းဆည်းရမိကြောင်း သိရသည်။

ယမန်နေ့ ည ၉ နာရီခန့်တွင် လူ ၁၀ ဦးခန့် တောင်ကုန်းအမြင့်တစ်နေရာမှ ဆင်းလာကာ လှုပ်ရှားသွားလာနေသည်ကို တွေ့ရှိရသဖြင့် ထိုင်းနယ်ခြားစောင့်ရဲတပ်ဖွဲ့မှ ဖမ်းဆီးရန်ကြိုးစားနေချိန်မှာ ထွက်ပြေးလွတ်မြောက်သွားခဲ့ပြီး စိတ်ကြွဆေးပြားများအား သိမ်းဆည်းရမိကြောင်း မယ်ဆိုင်သတင်း၌ ဖော်ပြသည်။

သိမ်းဆည်းရမိသည့် စိတ်ကြွဆေးပြားသည် စာလာအိတ် ၁၅ အိတ်ရှိပြီး စိတ်ကြွဆေးပြား စုစုပေါင်း ၂,၃၀၀,၀၀၀ ပြားရှိကြောင်း သိရသည်။

ယမန်နေ့ မေလ ၂၇ ရက်နေ့တွင် ထိုင်းနိုင်ငံ မူးယစ်ဆေးဝါးထိန်းချုပ်ရေးအဖွဲ့ချုပ် (ONCB) တွင် ပြုလုပ်သည့် မူးယစ်ဆေးဝါး တားဆီးနှိမ်နင်းရေး အစီအမံများနှင့် ပတ်သက်၍ ဆွေးနွေးစဉ် ထိုင်းဝန်ကြီးချုပ်ဟောင်း သက်ဆင်မှ လက်ရှိ မူးယစ်ဆေးဝါး ထုတ်လုပ်သူ အများစုသည် ‘ဝ’တပ်ဖွဲ့ UWSA လက်အောက်တွင် လုပ်ငန်းလည်ပတ်နေကြောင်း ပြောကြားခဲ့သည်။

ထိုင်းနိုင်ငံသို့ နယ်စပ်ဖြတ်ကျော် ဝင်ရောက်နေသည့် ‘ဝ’တပ်ဖွဲ့ UWSA နှင့် ဆက်နွှယ်နေသော မူးယစ်ဂိုဏ်းများကို နှိမ်နှင်းရန် ထိုင်းဝန်ကြီးချုပ်ဟောင်း သက်ဆင် ရှင်နာဝပ်မှ တိုက်တွန်းတောင်းဆိုထားသည်။