သျှမ်း-မန္တလေးနယ်စပ် မိုးကုတ်မြို့တွင် လူနေရပ်ကွက်အတွင်း လက်ပစ်ဗုံး ပစ်ခတ်ပြီး ပေါက်ကွဲမှုကြောင့် အရပ်သား ၅ ဦး ထိခိုက်ဒဏ်ရာ ရရှိခဲ့ကြောင်း စုံစမ်းသိရသည်။

မေလ ၂၃ ရက် ညနေ ၄ နာရီခွဲခန့်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် မိုးကုတ်မြို့အရှေ့ပိုင်း ကန်တော်ရပ်ကွက် ကားဂိတ်ဘက်တွင် အမည်မသိ အမျိုးသားနှစ်ဦးမှ ဆိုင်ကယ်ဖြင့် လက်ပစ်ဗုံး ၂ လုံး လာရောက်ပစ်ခတ်ခဲ့ရာ ပေါက်ကွဲမှုဖြစ်ပွားခဲ့ပြီး အရပ်သား ၅ ဦး ထိခိုက်ဒဏ်ရာ ရရှိခဲ့ကြောင်း ဒေသခံများက ပြောသည်။

“ကန်တော်က ကားဂိတ်ဘက်မှာ ပစ်ခံရတာ။ အဲ့ဘက်ကို လူငယ်နှစ်ယောက် ဆိုင်ကယ်စီးလာပြီး အိမ်နား လက်ပစ်ဗုံး ချသွားတာ၊ အပြင်မှာ ရှိတဲ့လူက လွတ်ပြီး အထဲက ၅ ယောက် ထိသွားတယ်။ လာပစ်တာက ဘယ်အဖွဲ့ကမှန်း မသိဘူး၊ မဖမ်းမိဘူး။ ဗုံးပစ်ခံရတာ အခုမှမဟုတ်ဘူး၊ နှစ်ခါသုံးခါ ဖြစ်နေပြီ”ဟု မိုးကုတ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

အလားတူ မေလ ၁၂ ရက် ညပိုင်း၌ မိုးကုတ်မြို့အရှေ့ပိုင်း လယ်ဦးရပ်ကွက်တွင် ကင်းလှည့်နေသည့် TNLA လက်အောက်ခံ ရဲတပ်ဖွဲ့ကို အမည်မသိ အမျိုးသားများမှ ဆိုင်ကယ်နှစ်စီးဖြင့် လာရောက်၍ လက်ပစ်ဗုံး သုံးလုံး ပစ်ခတ်ခဲ့ရာ TNLA ဘက်မှ သေနတ်ပြန်လည် ပစ်ခတ်ခဲ့သည်။

၎င်းနောက် လက်ပစ်ဗုံး လာရောက်ပစ်ခတ်သည့် အဖွဲ့ထဲမှ အသက် (၁၇) နှစ်အရွယ် လူငယ်တစ်ဦးကို TNLA ဘက်မှ ဖမ်းဆီးရမိထားပြီး ကျန်ရှိနေသူများကို ဖမ်းဆီးနိုင်ရန် ဆက်လက်စုံစမ်းနေကြောင်း ၎င်းဒေသခံ အမျိုးသားက ဆက်ပြောသည်။

ပြီးခဲ့သည့် မေလ ၁၁ ရက် ညအချိန်တွင်လည်း စစ်ကောင်စီတပ်၏ လေယာဉ်ပျံဝဲလာစဉ် မိုးကုတ်မြို့အရှေ့ပိုင်း ဘီးတောင်ရပ်ကွက်ရှိ Music Zone KTV ရှေ့တွင် အမည်မသိ အမျိုးသားနှစ်ဦးမှ လက်ပစ်ဗုံးနှစ်လုံး ပစ်ခတ်ခဲ့ရာ ပေါက်ကွဲမှု ဖြစ်ပွားခဲ့ပြီး လူထိခိုက်မှု မရှိသော်လည်း ဒေသခံများ စိုးရိမ်ထိတ်လန့်မှု ဖြစ်ပွားခဲ့ကြောင်း သိရသည်။