သျှမ်းပြည်မြောက်ပိုင်း မူဆယ်မြို့ရှိ ရွှေဆိုင်တစ်ဆိုင်ကို ဓါးပြဝင်တိုက်ခဲ့သော အမျိုးသား (၅) ဦးအနက် (၂) ဦးကို ပြန်လည်ဖမ်းဆီးရမိကြောင်း စုံစမ်းသိရသည်။
ပြီးခဲ့သည့် မေလ ၂၁ ရက်နေ့တွင် မူဆယ်မြို့ စျေးရပ်ကွက်ရှိ ရွှေဆိုင်တစ်ဆိုင်ကို လက်နက်ကိုင်ကာ ဓါးပြတိုက်ခဲ့ ပြီး ဆိုင်ရှင်ကို ရိုက်နက်ခဲ့သည့် ပြည်သူ့စစ် အဖွဲ့ဝင် (၅) ဦးအနက် (၂)ဦးကို ယမန်နေ့ မေလ ၂၂ ရက်နေ့တွင် ဖမ်းဆီး ရမိထားကြောင်း အမည်မဖော်လိုသည့် မူဆယ်ဒေသခံတစ်ဦးက သျှမ်းသံတော်ဆင့်သို့ပြောသည်။
“၂ ယောက်ဖမ်းမိထားတယ်၊ ပြည်သူ့စစ် အဖွဲ့ဝင် တရုတ်ကလေးတွေ၊ ပါသွားတဲ့ ရွှေထည်ပစ္စည်း တစ်ချို့ကို ပြန် ရတာရှိတယ်၊ အကုန်လုံးတော့ မဟုတ်သေးဘူးပေါ့၊ တချို့ကလဲလွတ်မြှောက်နေသေးတယ်” ဟု ထိုဒေသခံက ပြောသည်။
ပြန်လည်ဖမ်းဆီးရမိသည့် ဓါးပြ ဟု ယူဆရသူ နှစ်ဦးသည် အသက် (၂၀) အရွယ် ဝန်းကျင် လူငယ်များဖြစ်ကြ ပြီး စစ်ကောင်စီလက်အောက်ခံ ပြည်သူ့စစ်တပ်ဖွဲ့ဝင်များဖြစ်သည်ဟု ထို ဒေသခံက ဆက်ပြောသည်။
“တရုတ်ကလေးတွေ၊ သေချာတာကတော့ ပြည်သူ့စစ်ထဲက၊ သူတို့ဆီမှာ သက်သေခံကတ်ပြားပါတယ်လေ၊ အမှတ် (၁၄) စစ်ဆင်ရေး ကွပ်ကဲမှုဌာနချုပ်၊ သေနတ်ကလဲ အဲ့ဒီ တပ်မ ကနေ ထုတ်ပေးတဲ့ သေနတ်တွေ” ဟုပြောသည်။
ဖမ်းဆီးရသူနှင့်အတူ တြိဂံဒေသတိုင်းစစ်ဌာနချုပ် လက်အောက် အမှတ် (၁၄) စစ်ဆင်ရေး ကွပ်ကဲမှုဌာနချုပ် (စကခ ၁၄) မှထုတ်ပေးသော သက်သေခံကတ်ပြား၊ ကျည်ဖြည့်ထားသော ပစ္စတို တစ်လက်နှင့် ရွှေထည်အချို့ကို သိမ်းဆည်းရမိကြောင်း၊ ထိုသူများသည်ပြည်သူ့စစ်အမည်ခံများ ဖြစ်နိုင်ကြောင်း မူဆယ်ဒေသခံများ ကပြောသည်။
ထို့ပြင် မူဆယ်မြို့ထဲတွင် ကာစီနိုလောင်းကစားဝိုင်း၊ KTV၊ အွန်လိုင်းဂိမ်းရုံ တို့ကို စစ်ကောင်စီလက်အောက်ခံ ပြည်သူ့စစ်များကို လုံခြုံရေးယူထားပေးပြီး၊ ကောင်းခါး၊ နမ့်ခမ်းမြို့မ၊ ပန်းဆေး၊ လုံထန် အစရှိသည့် ပြည်သူ့စစ် အဖွဲ့ပေါင်းများစွာရှိသည့်အပြင် တြိဂံဒေသတိုင်းစစ်ဌာနချုပ် လက်အောက် အမည်ခံပြည်သူ့စစ်အဖွဲ့များလည်း ယခုကဲ့သို့ ရောက်ရှိပြီး မူဆယ်မြို့တွင်းလှုပ်ရှားနေကြကြောင်း သိရသည်။
အလုပ်သင် သတင်းထောက် စိုင်းဟန်မော(ဝ်) ရေးသားသည်။
Leave a Comments