သျှမ်းပြည်မြောက်ပိုင်း မူဆယ်မြို့ စျေးရပ်ကွက်ရှိ ရွှေဆိုင်တစ်ခုကို အမည်မသိလက်နက်ကိုင် လူတစ်စုက ဝင်ရောက် ဓားပြတိုက်ခဲ့ကြောင်း သတင်းရရှိသည်။
ယမန်နေ့ (မေလ ၂၁ ရက်) နံနက် ၆ နာရီခန့်တွင် မူဆယ်မြို့ ဈေးရပ်ကွက်ရှိ ရွှေဆိုင်တစ်ခုကို အမည်မသိ လက်နက်ကိုင်လူတစ်စုမှ အဖြူရောင် Crown ကားတစ်စီးဖြင့် ဝင်ရောက် ဓားပြတိုက်ခဲ့ပြီး ဆိုင်ပိုင်ရှင်ကို ရိုက်နှက်မှုများလည်း ပြုလုပ်ခဲ့ကြောင်း မူဆယ်မြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ဓားပြတိုက်တဲ့လူတွေက ၅ ယောက်လောက်ရှိတယ်၊ စကားပြောစက်ထဲမှာ တရုတ်စကားတွေနဲ့ ပြောနေကြတာ။ ဝင်လာတာ လက်နက် အတိုအရှည်နဲ့။ အိမ်ရှင်ကိုလည်း ရိုက်နှက်ပြီးတော့ မီးခံသေတ္တာ ဖွင့်ခိုင်းတာ၊ ပါသွားတာလည်း များတယ် အကုန်ယူသွားတာ။ တရုတ်ငွေကော မြန်မာငွေကော ဖုန်းတွေကော ပါသွားတယ်”ဟု ဖြစ်စဉ်သိရှိသူ ၎င်းအမျိုးသားက ပြောသည်။
အဆိုပါ ဓားပြလာတိုက်သည့် အမျိုးသား ၅ ဦးသည် အသက်၂၀ ကျော်အရွယ် လူငယ်များဖြစ်ပြီး သေနတ် အတို၊ အရှည်နှင့် စကားပြောစက်များ အသုံးပြု၍ ဝင်ရောက် ဓားပြတိုက်ခိုက်ခဲ့ကာ ဖုန်းနှင့် ရွှေငွေများကို လုယက်ဓားပြတိုက်သွားခဲ့ကြောင်း ဒေသခံများက ပြောသည်။
မူဆယ်မြို့တွင် လက်နက်ကိုင် အယောင်ဆောင်အဖွဲ့များက ဒေသခံပြည်သူများထံ အွန်လိုင်းစာပို့ ငွေညှစ်တောင်းခံခြင်း၊ ဓားပြတိုက်မှုနှင့် လူပြန်ပေးဆွဲမှုများကို ခပ်စိပ်စိပ် လုပ်ဆောင်လာခြင်း ကြောင့် လုံခြုံမှု မရှိသည့် နယ်စပ်မြို့ဖြစ်လာသည်။
ထို့ပြင် မူဆယ်မြို့၏ ဘေးပတ်ပတ်လည်တွင် တိုင်းရင်းသားလက်နက်ကိုင်တပ်ဖွဲ့များ လှုပ်ရှားနေသကဲ့သို့ စစ်ကောင်စီလက်အောက်ခံ ပြည်သူ့စစ်အဖွဲ့များမှာ ကောင်းခါး၊ မြို့မ၊ ပန်းဆေး၊ လုံထန်၊ ပိန်းဆာ၊ မန်ဂျယ်၊ စိန်ကျော့၊ မန်ပြိန်း၊ ရှောက်ဟော်၊ တာမိုးညဲ၊ မုံးပေါ် စသည်ဖြင့် ၁၅ ဖွဲ့ထက်မနည်း ရှိကြောင်း သိရသည်။
ပုံ(၂၊ ၃) – မေလ ၁၈ ရက်တွင် စနိုက်ဘာပစ်ခတ်ခံရပြီး သေဆုံးသွားသည့် စစ်ဘေးရှောင် အမျိုးသား (ဓာတ်ပုံ – TNLA)
Leave a Comments