ထိုင်းနိုင်ငံ နွန်ထပူရီခရိုင် နွန်ထပူရီမြို့ရှိ နာမည်ကြီး အဆင့်မြင့်ကာရာအိုကေဆိုင် တစ်ဆိုင်ကို ထိုင်းရဲတပ်ဖွဲ့က ဧည့်သည်အသွင်ဆောင်ပြီး ဝင်ရောက်စစ်ဆေးရာတွင် မြန်မာလုပ်သားများ ဖမ်းဆီးခံရကြောင်း သိရသည်။

ပြီးခဲ့သည့် မေလ ၂၀ ရက်နေ့တွင် နွန်ထပူရမြို့ Bang Kraso ရပ်ကွက်ရှိ နာမည်ကြီး အဆင့်မြင့်ကာရာအိုကေဆိုင် တစ်ဆိုင်တွင် အထောက်အထားမဲ့ အလုပ်သမားများ အလုပ်ခန့်ထားကြောင်း သတင်းပေးပို့ချက်အရ ထိုင်းရဲတပ်ဖွဲ့က ဧည့်သည်အသွင်ဆောင်ပြီး သွားရောက်စုံစမ်းခဲ့ကြောင်း Khaosod သတင်းတွင် ဖော်ပြထားသည်။

ရဲတပ်ဖွဲ့များသည် ဆိုင်ထဲသို့ဝင်သွားပြီးနောက် အရက်လာငှဲ့ပြီး ဝန်ဆောင်မှုပေးသည့် ဆိုင်ဝန်ထမ်းတစ်ဦးထံမှ ကျသင့်ငွေအား QR ကုတ်ဖြင့် ရှင်းရာတွင် ငွေလက်ခံသည့်အကောင့်ပိုင်ရှင်မှာ မြန်မာအမည်ဖြစ်နေကြောင်း တွေ့ရှိခဲ့သည်ဟု သိရသည်။

ထိုကြောင့် လူဝင်မှုကြီးကြပ်ရေးဌာန (လဝက) အမှတ် ၃ မှ သွားရောက်စစ်ဆေးဖမ်းဆီးခဲ့ပြီး မြန်မာအလုပ်သမား ၇ ဦး ဖမ်းဆီးရမိကြောင်း သတင်း၌ ဖော်ပြထားသည်။

ထိုအပြင် ဆိုင်ပိုင်ရှင်အမည်ခံ ထိုင်းအမျိုးသမီးတစ်ဦးကိုလည်း တရားဝင်ခွင့်ပြုချက်မရှိဘဲ နိုင်ငံခြား အလုပ်သမားများကို အလုပ်ခန့်မှုသဖြင့် ဖမ်းဆီးအရေးယူထားကြောင်း သိရသည်။

အဆိုပါ မြန်မာအလုပ်သမားများသည် လုပ်ပိုင်ခွင့်မရှိသောအလုပ်များကို လုပ်ကိုင်ပြီး ဥပဒေချိုးဖောက်သည့်အတွက် အမည်ပျက် (Blacklist) စာရင်းသွင်းကာ ပြည်နှင်ဒဏ်ပေးသွားမည် ဖြစ်ကြောင်း တာဝန်ရှိသူများက ပြောကြားခဲ့ကြောင်း Khaosod သတင်းတွင် ဖော်ပြထားသည်။