Monday, July 22, 2024

ထိုင်းနိုင်ငံတွင်း မြန်မာလုပ်သား ၁ ဦး ဓားထိုးခံရပြီး သေဆုံး

Must read

ထိုင်းနိုင်ငံ စမွတ်ဆာခွမ်းခရိုင်အတွင်း မြန်မာရွှေ့ပြောင်းအလုပ်သမား ၁ ဦးကို အမည်မသိ လူတစ်စုမှ ဓားဖြင့် ဝိုင်းဝန်းထိုး၍ သေဆုံးသွားခဲ့ကြောင်း စုံစမ်း သိရသည်။

ဖြစ်စဉ်မှာ စက်တင်ဘာလ ၂၆ ရက် မနက်ပိုင်း ၁ နာရီဝန်းကျင်တွင် အသက် ၂၀ နှစ်အရွယ် မြန်မာလုပ်သားတစ်ဦးသည် အိမ်သို့ ပြန်လာနေစဉ် ပန်ယာဖျတ်အုပ်စု ဝပ်ကမ်ဖရားဘုန်းကြီးကျောင်းအနီးရှိ အဝတ်လျော်စက်တစ်ဆိုင်၌ ဆိုင်ကယ် ဦးထုပ်စောင်းထားသော အမည်မသိ လူ ၄ ဦးမှ ရောက်ရှိလာပြီး ဓားဖြင့် ဝိုင်းဝန်းထိုးခဲ့ကြောင်း ထိုင်းသတင်းဌာနတစ်ခုတွင် ရေးသားဖော်ပြထားသည်။

ယင်းကဲ့သို့ ဓားထိုးခံရပြီးနောက် ဆေးရုံလူမှုကယ်ဆယ်ရေးအဖွဲ့မှ လာရောက်ကူညီပြီး စမွတ်ဆာခွမ်းဆေးရုံသို့ ပို့ဆောင်ခဲ့ပေမယ့် ပြင်းထန်သည့် ဒဏ်ရာဖြင့် သွေးထွက်လွန်ကာ သေဆုံးသွားခဲ့ကြောင်း တာဝန်ရှိသူ ထိုင်းရဲတပ်ဖွဲ့မှ ထိုင်းသတင်းမီဒီယာများကို ပြောကြားထားသည်။

“သူတို့ ၄ ယောက်စလုံးက ဆိုင်ကယ် ဦးထုပ်စောင်းထားတယ်။ ဆိုင်ကယ် နံပါတ်ပြားလည်း မတွေ့ရဘူး။ သူ့ (မြန်မာလုပ်သား) ကို ရှေ့နောက်လာတားပြီး ဓားနဲ့ ဝိုင်းထိုးကြတယ်။ သူလည်း ဓားထိုးခံရပြီး ဆေးရုံကိုရောက်သွားတဲ့ အချိန်ခဏမှာပဲ ဆုံးသွားတယ် “ ဟု ထိုင်းရဲတပ်ဖွဲ့မှ ထိုင်း မီဒီယာများကို ပြောကြားထားသည်။

အဆိုပါ လူသတ်မှု နှင့် ပတ်သက်ပြီး ပုဂ္ဂိုလ်ရေးကြောင့် ဖြစ်နိုင်ပြီး၊ တရားခံလူသတ်မှု ကျူးလွန်သူ ၄ ဦးကို လမ်းထိပ်၌ တပ်ဆင်ထားသော CCTV မှတ်တမ်းမှ ခြေရာခံ လိုက်လံစုံစမ်း စစ်ဆေးဖမ်းဆီးသွားမည်ဟု တာဝန်ရှိသူ ထိုင်းရဲတပ်ဖွဲ့မှ ထိုင်းမီဒီယာများကို ပြောကြားခဲ့သည်။

ဘန်ကောက်မြို့ မြန်မာလုပ်သားအရေး တက်ကြွဆောင်ရွက်သူ ခွန်ရက်လွို က ထိုင်းနိုင်ငံအတွင်း ဉပဒေနှင့် ပတ်သက်ပြီး ယခုလို ပြောဆိုထားသည်။

“ကျနော်တို့ နေတဲ့နေရာမှာလည်း ဖြစ်ခဲ့ဖူးပါတယ်။ ထိုင်းနိုင်ငံမှာ ၁၀ နာရီနောက်ပိုင်းဆို ဆူညံလို့ မရတော့ဘူး။ ဒါပေမယ့် ကျနော်တို့ မြန်မာလုပ်သား တွေက ညပိုင်းဆိုရင် အရက်သောက်မူးပြီး ဆူညံတာ၊ သွေးဆူပြီး ရန်ရှာတတ်တာ။ အဲ့လိုတွေကြောင့် ဓားနဲ့အပိုင်းပိုင်း ခုတ်ခံရပြီး သေဆုံးသွားတဲ့ ကလေးတွေအများကြီး ရှိတာပေါ့နော်။ သူများနိုင်ငံမှာနေရင် သတိဝီရိယ ထားဖို့လိုတယ် “ ဟု ခွန်ရက်လွို ကပြောသည်။

စစ်တပ်က အာဏာသိမ်းပြီးနောက်ပိုင်း မြန်မာနိုင်ငံတွင် နိုင်ငံရေးမတည်ငြိမ်မှု၊ စစ်ရေးပဋိက္ခများ ဖြစ်ပွားမှုကြောင့် အလုပ်အကိုင် ရှားပါးလာသဖြင့် ပြည်သူများသည် တိုင်းတစ်ပါးကို အလုပ်လုပ်ကိုင်ဖို့အတွက် ထွက်ခွာလာခဲ့ရခြင်းဖြစ်ကြောင်း သိရသည်။

Leave a Comments

- Advertisement -spot_img

Latest article