သျှမ်းပြည်မြောက်ပိုင်း၊ကျောက်မဲမြို့နယ် မိုင်းလုံမြို့ ပန်ဝိုးကျေးရွာအုပ်စုတွင်းရှိ ရှဲဆန်သတ္တုကုမ္ပဏီကို အပစ်ခတ်ရပ်စဲထားသည့် စစ်ကောင်စီက ပေါင် (၅၀၀)ဗုံးဖြင့် (၂)ကြိမ် လာရောက်ဗုံးကြဲခဲ့သည်ဟု TNLAမှ ထုတ်ပြန်လာသည်။

ပြီးခဲ့သည့် မေလ (၁၁)ရက် မွန်းလွဲပိုင်း (၁၂)နာရီခွဲ အချိန်တွင် စစ်ကောင်စီတပ်မှ ရှဲဆန်သတ္တုကုမ္ပဏီကို ဗုံးကြဲခဲ့ခြင်းကြောင့် ဘတ်ဖိုး (၁)စီး၊ သတ္တုထုတ်စက် (၁)လုံး၊စက်ပစ္စည်းများထားရှိသောဂိုဒေါင် (၁)လုံးနှင့် အခြားသောပစ္စည်းများစွာ ထိမှန်ပျက်စီး ဆုံးရှုံးသွားကြောင်း ထုတ်ပြန်ချက်တွင် ထည့်သွင်းထားသည်။

စစ်ကောင်စီတပ်သည် TNLAထိန်းချုပ်ထားသည့် နောင်ချိုမြို့နယ်၊ ဒိုးပင်ကျေးရွာအုပ်စု၊ ရတနာသင်္ဂီကျေးရွာအနီးတွင် တိုက်ပွဲဖြစ်ပွားခြင်းရှိဘဲ ပေါင် (၂၅၀)ဗုံး (၆)လုံးဖြင့် လာရောက်ကြဲချသွားခဲ့သည်ဟု သိရသည်။

စစ်ကောင်စီတပ်သည် ပြီးခဲ့သည့် မေလ (၆)ရက်မှ (၃၀)ရက်အထိ အပစ်ခတ်ရပ်စဲရေးကာလ ထပ်တိုးထားသော်လည်း TNLAထိန်းချုပ်ထားသော် နယ်မြေများကို မြေပြင်ထိုးစစ်ဆင်ခြင်း၊ ရည်ရွယ်ချက်ရှိရှိလက်နက်ကြီး ပစ်ခတ်ခြင်းနှင့် နေ့စဉ်နီးပါး ဒရုန်းဖြင့် ဗုံးကြဲတိုက်ခိုက်ခြင်းများ လုပ်ဆောင်နေသည်။

ထိုသို့ လုပ်ဆောင်နေသောကြောင့် ဒေသခံများအနေဖြင့် စစ်ရေးအမြဲသတိရှိသင့်ကြောင်း TNLAမှ ထုတ်ပြန်အကြံပြုထားသည်။

ဧပြီလကုန်တွင် ပြုလုပ်ခဲ့သည့် တရုတ်နိုင်ငံ ကူမင်းဆွေးနွေးပွဲ ပျက်ပြီးနောက် စစ်ကောင်စီတပ်က TNLAထိန်းချုပ်ထားသည့် ကျောက်မဲ၊မန်တုံ၊မိုးကုတ်နှင့် မိုင်းငေါ့ စသည့်နေရာတို့ကို လေကြောင်းဖြင့် ဗုံးကြဲတိုက်ခိုက်ခြင်းများ ပြုလုပ်နေပြီး အရပ်သားသေဆုံးမှုများလည်း ရှိနေသည်ဟု သိရသည်။