သျှမ်းပြည်မြောက်ပိုင်း နမ့်ခမ်းမြို့နယ်အတွင်း TNLA မှ ကားခွန် လျှပ်စစ်မီဝာာခွန် လမ်းတံတားကြေးနှင့် တခြား သော အခွန်နှုန်းထားများ တိုးမြှင့်ကောက်ခံနေသောကြောင့် ဒေသခံ ပြည်သူများ အခက်ခဲ ကြုံတွေနေရကြောင်း စုံစမ်းသိရသည်။

၂၀၂၅ ခုနစ် မေလဆန်းပိုင်းမှစ၍ ယနေ့အထိ နမ့်ခမ်းမြို့အတွင်း TNLA တိုးမြှင့်ကောက်ခံနေသော အခွန်နှုန်းထား များမှာ အိမ်သုံး လျှပ်စစ်မီတာ တစ်ယူနစ် ၃၅ ကျပ်မှ ကျပ်ငွေ ၅၀ အဖြစ်လည်းကောင်း၊ ယခင်က ဒေသခံအနေ ဖြင့် တံတားဖြတ်ခ/လမ်းကြေး ကောက်ခံမှု မရှိရာကနေ ယခု ကားသေးတစ်စီး တစ်ထောင်ကျပ် ပေးဆောင် နေရသည့်အပြင် ယာဉ်မှတ်ပုံတင်ခ လည်း TNLA မှ ကောက်ခံသွားမည်ဟုဆိုသည်။

“တစ်ယူနစ်ကို တစ်ဝက်လောက် စျေးတက်လာတယ်၊ အရင်က အိမ်မှာ ၃၀၀ ယူနစ်လောက်ပဲသုံးတာကို အရင်လက ယူနစ် ၆၀၀ ကျော်ကျသွားတာ၊ အိမ်မှာကလဲ ဘာမှထွေထွေထူးထူး သုံးတာမရှိဘူး၊ မီတာခ လည်း အရင်က ၃သောင်းကျော်လောက်ပဲကျတာ ခုတော့ ၁သိန်းခွဲ လောက်ကျတယ်၊ တော်တော်များများက မခံနိုင်လို့ လျှပ်စစ်ရုံးသွားတိုင်တာကို မီတာဘောက် အသစ်လဲခိုင်းနေတာ ဘာမှမလုပ်ပေးဘူး” – ဟု အမည်မဖေါ်လိုသည့် ဒေသခံ အမျိုးသမီး တစ်ဉီးက ပြောသည်။

၁၀၂၇ စစ်ဆင်ရေးနောက်ပိုင်း TNLA မှ ကုန်သည်များထံ အခွန်ကောက်ခံမှုကြောင့် စားသောက်ကုန်၊ ဆေးဝါးနှင့် အခြားကုန်ပစ္စည်းများ စျေးနှုန်းမြင့်တက်လာသည်ဟု နမ့်ခမ်းမြို့ခံများကပြောသည်။

“၁၀၂၇ စစ်ပွဲနောက်ပိုင်း သျှမ်းမြောက်တစ်ခွင်လုံးကို ယှဉ်ကြည့်မယ်ဆို နမ့်ခမ်းက ကုန်စျေးနှုန်း အမြင့်ဆုံးပဲ၊ အရင်က နမ့်ခမ်းက ကုန်စျေးနှုန်းအပေါဆုံးလေ၊ TNLA က ကုန်သည်တွေကို သွယ်ဝိုက်ခွန် ကောက် တော့ ကုန်သည်တွေမထိဘူးလေ ပြည်သူတွေကိုပဲထိတာ၊ အခွန်တွေတော့ ကောက်သလားမမေးနဲ့၊ မြို့ တိုးတက်ရာ တိုးတက်ကြောင်းတော့ ဘာမှလုပ်မပေးဘူး၊ KTV ၊ မာဆတ်၊ မူးယစ်ဆေးဝါးတွေတော့ ပေါလာတယ်” ဟု အမည်မဖေါ်လိုသည့် ဒေသခံအမျိုးသားတစ်ဉီးက ပြောသည်။

TNLA သည် နမ့်ခမ်းမြို့ပေါ်ရှိ မော်တော်ယာဉ်များ မှတ်ပုံတင်ရန် ပိုစတာနှင့် လက်ကမ်းစာစောင်များကို ရပ်ကွက် တိုင်း တွင်ဖြန့်ဝေထားပြီး ကားသေး ကို မော်ဒယ်လ် အလိုက် ၂ သိန်းမှ ၃ သိန်းထိ၊ ကားလတ် ၃ သိန်းမှ ၄ သိန်း ထိ၊ ကားကြီးများကို ၄ သိန်းမှ ၅ သိန်းထိ သတ်မှတ်ပြီး လာမည့် မေလ(၂၅) ရက်တွင်စတင်ကောက်ခံမည်ဖြစ် ကြောင်း ပိုစတာတွင် ပါရှိသည်။

ထို့ပြင် နမ့်ခမ်းမှ ကချင် ပြည်နယ် သို့ သွယ်တန်းထားသော ရွှေလီကြိုးတံတားတွင် ယခင်ကောက်ခံမှုမရှိသည့် တံတားကြေးကို လည်း ပေး ဆောင်နေရကြောင်း၊ နမ့်ခမ်း-မူဆယ်လမ်းပိုင်းရှိ နောင်ခန် တိုးဂိတ်တွင်လည်း လမ်းကြေးကောက်ခံ ကြောင်း ဒေသခံများပြောကြားချက်အရ သိရသည်။