အရှေ့ပိုင်းတိုင်းစစ်ဌာနချုပ်မှ ပအိုဝ်းပြည်သူ့စစ် PNO/PNA ကို မြို့ဝင်ခွင့်နှင့် လက်နက်ကိုင်ဆောင်ခွင့် တင်းကြပ်လိုက်ကြောင်း ပြီးခဲ့သည့် မေလ (၁၃)ရက်စွဲဖြင့် ထုတ်ပြန်လာသည်။

PNO ပြည်သူ့စစ်သည် ပြီးခဲ့သည့် မေလ (၂)ရက် ညတွင် တောင်ကြီးမြို့မဈေး အနီးတွင် စစ်ကောင်စီလက်အောက်ခံ ရဲ၏ စစ်ဆေးမှုကို မခံဘဲ သေနတ်ဖြင့် ပစ်သတ်ခဲ့သည်။

ထို့အပြင် ပြီးခဲ့သည့် ဧပြီလ (၂၈)ရက်နေ့တွင်လည်း ဟဲဟိုးမြို့တွင်ရှိသည့် ဓာတ်ဆီဆိုင်ရှေ့တွင် PNO ပြည်သူ့စစ်မှ ပြည်သူများ၏သွားလာမှုကို တားဆီး၍ ပြည်သူများထံ ပါးရိုက်ကာ ငွေတောင်းမှုများပြုလုပ်ခဲ့သည်။

အဆိုပါ ကိစ္စရပ်များကြောင့် ရပခ မှ PNOကို မြို့တွင်းသို့ တာဝန်ချိန်မှအပ လက်နက်ယူဆောင်သွားခြင်း၊ယူနီဖောင်း ဝတ်သွားခွင့် မပြုကြောင်းနှင့်အကယ်၍ ခွင့်ပြုချက်မရှိဘဲ လက်နက်ကိုင်ဆောင်လျှင် သိမ်းဆည်းမည် ဖြစ်ပြီး စစ်ကောင်စီတပ်သားများမှ PNOကို စစ်ဆေးလျှင်လည်း အသာတကြည် စစ်ဆေးခံရန် အဆိုပါ ထုတ်ပြန်ချက်တွင် ဖော်ပြထားသည်။

“ဒီလို ရပခ က ထုတ်ပြန်လိုက်တယ် ဆိုတာက ထွေထွေထူးထူး ကိစ္စတော့ မဟုတ်နေဘူး။ကျနော်တိုက စစ်ကောင်စီ ထုတ်ပြန်တယ်ဆိုတော့ လိုက်နာရမယ်။ဥပဒေနဲ့ အညီသွားတာ။အောက်ခြေက စည်းကမ်းမဲ့နေတာကို ထိန်းသိမ်းပေးတဲ့ သဘောပါပဲ။ ဘာမှ သက်ရောက်မှုမရှိဘူး။ ဘယ်အစိုးရတက်တက် ကျနော်တို့က ဥပဒေအောက်ကနေ သွားမယ်။” ဟု PNO အတွင်းရေးမှူးချုပ် ဖြားခွန်သိန်းဖေမှ သျှမ်းသံတော်ဆင့်ကို ပြောသည်။

ဆက်လက်ပြီး PNOမှ ကျေးရွာများအတွင် မလိုအပ်ဘဲ ဂိတ်မထားရန်နှင့် ပြည်သူများထံမှ ဆက်ကြေးမကောက်ရန် တို့ပါဝင်ပြီး PNO/PNAမှ ရပခ ၏အမိန့်ကို လိုက်နာပေးရမည်ဟု ပါဝင်သည်။
PNOပြည်သူ့စစ်သည် ကျေးရွာများအတွင်း လက်နက်အားကိုး၍ ဆက်ကြေးကောက်ခြင်း လူသတ်ခြင်းများ မကြာခဏကျူးလွန်သောကြောင့် ယခုကဲ့သို့ စစ်ကောင်စီဘက်မှ ထိန်းချုပ်သင့်ကြောင်း ပအိုဝ်းလူငယ် အမျိုးသားတစ်ဦးက ပြောသည်။

“PNOက ဗမာစစ်တပ်ကို အားကိုးပြီး ကျေးရွာမှာ လူသတ်ချင်တိုင်း သတ်နေတာ။ ရွာတွေမှာလည်း လက်နက်ကိုင်ပြီး သေနတ်တွေ ဖောက်ပြနေတာ။ အခွန်တွေလည်း ကောက်နေတာ အများကြီးပဲ။အဲတာတွေက စစ်တပ်ရဲ့ပုံရိပ်နဲ့ လုပ်စားနေတာ။ ဗမာစစ်တပ်အနေနဲ့လည်း သူတို့ရဲ့လူ PNOကို အခုလို ပြန်ထိန်းချူပ်သင့်တယ်။” ဟု အဆိုပါ လူငယ် အမျိုးသားက ပြောသည်။

PNOပြည်သူ့စစ်သည် တောင်ကြီး၊ဟိုပုံး၊ဆီဆိုင် ၊ပင်လောင်းနှင့် အင်းလေးဘက်တွင် အဓိက လှုပ်ရှားနေပြီး စစ်ကောင်စီနှင့် ပူးပေါင်း၍ အင်းလေး၊စံကား ဒေသဘက်တွင် ထိုးစစ်ဆင်မှုများ ပြုလုပ်နေသည်။