သျှမ်းပြည် ညောင်ရွှေမြို့နယ်အတွင်း စစ်ကောင်စီ ၊ ပအိုဝ်းပြည်သူ့စစ် PNO နှင့် တော်လှန်ရေး တပ်ပေါင်းစုတို့ စစ်ရေးဆက်လက်တင်းမာနေကြောင်း စုံစမ်းသိရသည်။
မေလ ပထမပတ်မှစတင်၍ စစ်ကောင်စီသည် စစ်အင်အားများဖြည့်ပြီး ညောင်ရွှေမြို့နယ်အတွင်းရှိ စန့်စွဲ၊ စန်းလိပ်၊ နားကုန်း၊ ရေပူ၊ တောင်ပို့ကွဲ နှင့် ဖယ်ခုံမြို့နယ် လွယ်ပေါရွာ အနီးတဝိုက်ကို စစ်ကြောင်းထိုးတိုက်ခိုက်ခဲ့ခြင်းကြောင့် ယမန်နေ့ (မေလ ၁၃ ရက်) အထိတိုက်ပွဲများ ပြင်းထန်ခဲ့ကြောင်း သတင်းအရင်းမြစ်တစ်ဦးက သျှမ်းသံတော်ဆင့်ကို ပြောသည်။
“မနေ့ထိတော့ နှစ်ဘက်တိုက်ပွဲတွေပြင်းထန်နေပါတယ်။ဒီနေ့တော့ငြိမ်နေတယ် ဘယ်လို လာမယ်မသိသေးဘူး။ ပြီးခဲ့တဲ့ရက်တွေမှာ စစ်ကောင်စီကကျေးရွာထဲက နေအိမ်အချို့ကို မီးရှို့ဖျက်ဆီးမှု တွေလုပ်တာလည်းရှိပါတယ်။”ဟု ၎င်းကပြောသည်။
ထိုအပြင် စစ်ကြောင်းထိုးလာသည့် စစ်ကောင်စီ နှင့် လက်အောက်ခံ ပအိုဝ်းပြည်သူ့စစ်တို့သည် စန့်စွဲ ကျေးရွာရှိနေအိမ်အချို့ကို မီးရှိုးပျက်စီးမှုများ ပြုလုပ်ခဲ့ကြောင်း ဖယ်ခုံ(၁၀၀၆တပ်ရင်း) မှ ယမန်နေ့ (မေလ ၁၄ ရက်)တွင် ထုတ်ပြန်ခဲ့သည်။
“ကျနော်တို့ တပ်ပေါင်းစုကနေ မကြာခင်မှာ အသေးစိတ်ပြန်ပြီး သတင်းထုတ်ပြန်သွားမှာပါ။ လောလောဆယ် ဒီနေ့မှာတော့ တိုက်ပွဲဖြစ်ပွားမှုမရှိပေမဲ့ စစ်ရေးတွေ ဆက်တင်းမာနေပါတယ်။”ဟု ဖယ်ခုံ(၁၀၀၆တပ်ရင်း) မှ တာဝန်ရှိသူတစ်ဦးက ပြောသည်။
စန့်စွဲကျေးရွာရှိ ပြည်သူ့နေအိမ်များကို စစ်ကောင်စီ နှင့် PNO ပြည်သူ့စစ်တို့က စစ်ကြောင်းထိုးမှု (၄) ရက်တာကာလပတ်လုံး အဆက်မပြတ်မီးရှို့နေခဲ့ပြီး မေလ(၉)ရက်နေ့တွင် အိမ်အခြေ အလုံး(၂၀)နီးပါ မီးရှို့ဖျက်ဆီးခံခဲ့ကြောင်း ထုတ်ပြန်ချက်တွင် ဖော်ပြထားသည်။
အလားတူ ယနေ့ မေလ ၁၄ ရက် မိုးဗြဲမြို့တွင်လည်း စစ်ကောင်စီ မှ စစ်ကြောင်းထိုးရန် ပြင်ဆင်နေပြီး နှစ်ဖက် စစ်ရေးတင်းမာမှုများ ဆက်လက်ဖြစ်ပွားနေကြောင်း သတင်းရင်းမြစ်တစ်ဦးက ပြောသည်။
ပြီးခဲ့သည့် ဧပြီလ နောက်ဆုံးပတ်စတင်၍ စစ်ကောင်စီ နှင့် လက်အောက်ခံ ပအိုဝ်းပြည်သူ့စစ်တို့သည့် ညောင်ရွှေမြို့နယ် ၊ ဖယ်ခုံ နှင့် မိုးဗြဲ တကြောင့် ပြန်လည်ထိုးစစ်ဆင်းမှုအပြင်းအထန်ပြင်လုပ်နေပြီး လေကြောင်းဗုံးကြဲတိုက်ခိုက်မှု၊ လက်နက်ကြီး ပစ်ခတ်မှု၊ မီးလောင်ဗုံး၊ အဆိပ်ငွေ့ဗုံးများကို အသုံးပြုတိုက်ခိုက်သည့်အပြင် ကျေးရွာရှီ နေအိမ်များကိုပါ မီးရှို့ဖျက်စီးမှုများ ပြုလုပ်နေသည်။
Leave a Comments